KA HMANGAIH CHE Part-2

• Lalchuangliana

Kar khat hnuah chuan a lehkha hi a lo thleng a. “I mi rawn ang khan ka thlen ve leh Rachel-i nen chuan kan inbe ta a. ‘Ka hmangaih che’ ka han tih chuan a tap zawih zawih a , kan inkuah a, ani pawh chuan ‘Kei pawhin ka hmangaih che’ min ti a, kan inkar boruak a fel duak ta mai, ‘it is honeymoon all over again’ ” ti hian a rawn ziak a. Ka lawmzia kha aw….Pathian hnenah
lawmthu ka sawi a.

A kar leh maiah chuan Dr Samson chu Saprama a kal a lo hun ta a, an chhungkuain amah thlah turin Delhi- ah an lo kal a, in ngai leh inthlahlel em emin Samsona chu an bye-bye liam ta a. An hlim hmel hmuh a nuam ngei mai. Sapram chu a vawh theih em avangin ka Jacket lum tha deuh mai, U Zosangin a pasal U Nghaka ( Dr. RK Nghakliana) a boral takah min rochuntir chu ui deuh chung hian ka pe ve leh thung a. Hun leh kumte chu a ral zel a. Keipawh Pathianin EHA-a ka rawngbawlna tur min pek chu ka  hlen thawkhat hian ka hria a, kum 22 lai ka lo awm tawh a. North India-ah chuan EHA chu Christian Organisation puitling leh rintlak taka mi ngaihte pawh a lo ni ta a. Pathianin kawng dangah min hruai leh ta daih a, North India Harvest Network leh CONCERN tih chu ka buaipui chho leh ta a.

Ni khat chu EHA Office atang hian min rawn bia a, Dr. Samson-a nupui Rachel-i a na hle mai a, Ambulance in Delhi lam an rawn panpui mek tih min hrilh a. Ambulance lo thleng tur hmuak tur chuan ka thawk chhuak a, mahse kawngah rei lo te chauh an ding a, Rachel-i chu biak theih pawh a ni tawh lo va, St. Stephen’s Hospital panin an tlan leh nghal a. Dr. Samson chu ka khawngaih hle mai a, tawngtaipui chu kan tih theih tawk a ni mai si. Rachel-i chu a tha ve leh mai ang chu tia kan beisei laiin a tuk maiah chuan a boral ta a. A chanchin ka han hriat chian chuan a ruang chu Chhatarpur lamah an lo chhuahpui leh hman tawh a.

Rei tak chu an chhungkua kha ka mitthlaah an cham a, ka lung an tileng hle thin. Dr. Samson-an Racheli a sun nite chu a lo ral ve leh mai a,  an Hospital-a thawk ve bawk Nurse Priscilla nen an innei a, fapa pakhat an nei. EHA-ah ka awm tawh loh vangin chanchin bul bal kan inhre reng tawh lo va. Dr. Samson pawh chuan EHA chhuahsanin an chhungkuain Nepalah an chho va,  Patan Hospital, Khatmandu- ah an nupain an han thawk leh a. He Hospital hi kum 1954 ah United Mission to Nepal in an din a ni a, chutih lai chuan Shanta Bhawan Hospital tia hriat a ni. Tunah chuan Patan Academy of Health Sciences hnuaia awm niin secular institution a ni. Dr. Samson te pawh chuan Patan chu chhuahsanin hmun hrang hrangah Community Health Care enkawlin Project an kalpui mek a ni. Chhatarpur Christian Hospital kha America rama Evangelical Friends Mission te rawn din a ni a, an hnen atangin EHA khan a la chhawng a ni. Nepal-ah chuan Dr. Samson-te hi EFM te nen chuan an thawk ho thin a ni.

Hmanni lawk khan Dr Samson nen hian Phone-in kan inbe reng a, ani chu a la chak that hmel hle. “I chanchinte hi ka ziak dawn a nia,” ka ti a, “Tha i tih ang angin lo ziak rawh” min ti a. Tihian ka han ziak ta duah a ni. Kan thupui kha “KA HMANGAIH CHE” tih a nih kha, kan la sawi zo lo ania. New Delhi, Dwarka-ah khuan Mizo nu fel leh hmeltha deuh mai, Pu Vanhela Pachuau IAS (Rtd) te tunu hi a awm a, Pi Zotluangi. Ani Zotluangi hi Dr. Samsona monu (daughter-in-law) Samson leh Rachel-te fapa Benjamina nupui a ni.

Kan thupuiah lut dawn ta ila!  He tawngkam mawi tak, thiltithei tak mai hi hmelma pa Setana chuan min lo ‘hijack’ sak tawh mah se a hmang duhtu  Samsona leh Racheli te chuan an  nupa kar buai tak, inthen mai an peih laiah, Pathianin damna ‘wholeness’ a rawn thlen nan an hman thute kha kan hria a. Mahse Kristiana leh Beiseiate thian dun Milianbeidawnga Rinhlelhna Kulh-a an tang reng mai ang kha mi tam ber chu kan ni. Kristianan a ipte a han zen a, kawngkhar zawng zawng hawn theihna chabi chu a lo ak reng si a, ‘Ka va a tak em!’ a ti thlawt mai. Chu chabi ‘Pathian Thutiam’ chuan kawngka zawng zawng an hawng a, an tlan chhuak ta daih mai. Pathian ringtu inti si, nupa inbe tui lo, fate nen pawha in be peih lote hi kan awm nual awm si a, “Ka hmangaih che” han tih mai chabi hi hmang ila chuan kan mu tanna ata kan chhuak mai tur! 

He thu post lo chhiartu pa zawng zawngte ka zawt a che u : In nupuite leh in fate hi vawi khat tal, “Ka hmangaih che” in ti tawh ngai em? Nute pawh ka zawt a che u. In pate leh in fate hi ” Ka hmangaih che” tiin vawi khat tal in hrilh tawh em? Kei a ziaktu ngei pawh hian ka ti fo lo. Saptawnga, “I love you” han tih liam mai hi chu a awl khawp mai. Mahni Mizo tawng ngeia han tih chu a har khawp mai. Ka nupui Sangteii nen hi chuan ‘ Ka hmangaih che’ tiin kan inhrilh thin, ka fate hi a mimala ‘Ka hmangaih che’ ka tih awm reng hi ka hre lo.

Anmahni chu ka hmangaih hle chuan ka inhre si a, an tuar aia tuarte chu ka ngam em em a, ‘I fapa hi kan kaphlum dawn. A aiah kah hlum i ngam chuan ani chu kan chhuah ang a, nang chu kan kap ang che,’ min ti ta se, inngaihtuah nan second 5 pawh ka duh lo vang – ka inpeih sa thlap a ni. Chuti si engatinge “Ka hmangaih che” tawngkaa ka tih theih loh? A chhan nia ka hriat chu ‘Ka hmangaih che’ han tih hian nulat tlangval tirha hmel duhzawng deuh kan han hmu dek dek a, kumtluana kan kawppui tur emaw tia, ‘ Ka hmangaih che’ kan han ti thuai a, kar leh lawkah chuan mi dang kan hmu tai a, kar hmasaa kan hmangaih kha biak pawh kan be peih leh si lo va. Khatiang hmangaihna tlo lo kawltu nih kha kan hlau va. ‘Ka hmangaih che’ kan va tiha khan kan lakah beisei kan hlen theih loh tur si an nei ang tihte  kan hlau tel bawk a. A lehlamah chuan kan hmangaih kan tihte khan min lo hmangaih let ve kher lo mai thei a, mahni tan a zahthlakin a mualpho thlak dawnin kan hre bawk a, chuvangin kan hmangaihna hi kan sawi chhuak (express/ vocalise) ngam thin lo a ni. Chutah inngaizawngte tawngkam ni riauva hriatna kan nei bawk a.

Kan Pathian erawh hi chuan a mite a hmangaihna hi a han tlangaupui uar teh mai asin! Bible hmun pakhatah chuan, “Hmangaih tawp lovin ka hmangaih chia” a ti ( Jer. 31:3) Hmun dangah chuan, “An hnungtawlhna hi ka tidam ang a, an lak atanga ka thinrimna chu a kian tak avangin anmahni chu ka hmangaih hrim hrim dawn a ni,” a ti a nih chu mawle (Hosea 14:4) Saruak leh mualphona rapthlak tuara krawsa an khenbeh dawn zanah khan Lal Isuan a zirtirte chu, “Pain mi hmangaih ang bawkin keipawhin ka hmangaih che u hi, ka hmangaihin awm reng rawh u,” a ti a nih kha (Johana 15:9)

Kan thupuia kan luh leh hmain Dr Samson- ate chhung chanchin kal zel hre chak kan awm a. Dr. Samsonte fa upa ber Patricia hian Polish mi pasalah neiin Scotland-ah an khawsa. Patricia nau Ruth hian pasal neiin Gurgoan ah an khawsa a. Benjamin leh Zotluangi-te hian fapa Ezra, Class X zir lai leh fanu Kimi pawl 7 zir lai an nei a, Dwarka, New Delhi- ah an khawsa. An te ber Samson leh Priscilla te fa Prateek hi a u Ruth te hnenah a awm rih. Hna a zawng mek a ni awm e. Dr. Samson leh Priscilla erawh Nepal-ah an khawsa zui zel a ni…

(Part 3 karleh Thawhtan-ah chhuah ani ang)