Tirhkohte Thiltih Zirlai 45A. Tirhkohte 8: 26-40

TIRHKOHTE 8:26-36, 38-40 MIZCLBSI Lalpa tirh vântirhkohvin Filipa chu a bia a, “Tho la, Jerusalem aṭanga Gaza khaw zuk chhun, chhim lam thlalêr kal tlang kawngah khuan kal rawh,” a ti a. [27] Tichuan, a tho va, a kal ta a. Tin, Ethiopia rama mi pakhat an lalnu Kandaki hnuaia mi tilreh lal tak, a sum zawng zawng enkawltu chu Jerusalemah Pathian be tûrin a han kal a; [28] a haw lamah chuan tawlailîra ṭhu chungin zâwlnei Isaia lehkhabu a chhiar a. [29] Thlarauvin Filipa hnênah, “Tawlailîr saw pan la, va pawh rawh,” a ti a. [30] Tichuan, Filipa chu a va tlân a, mi tilrehin zâwlnei Isaia lehkhabu a chhiar chu a ngaithla a, “I chhiar chu a awmzia i hria em?” a ti a. [31] Ani chuan, “Tu ma mi hrilh fiah lohvin engtin nge ka hriat ang?” a ti a. Filipa chu a bula ṭhu-a chuang ve tûrin a sâwm a. [32] Lehkha Thu a chhiar lai chu hei hi a ni: “Berâm talh tûr angin ani chu an hruai a, Berâmno a hmul mêttu hmaa a ngawi reng angin, Ani pawhin a ka a âng lo, [33] Tihmualpho a ni a, dik lo taka rêlsak a ni, A thlahte chanchin tuin nge la sawi ang? Khawvêl aṭangin a nun an lâksak ta si a,” tih hi. [34] Mi tilreh chuan Filipa hnênah, “Zâwlnei hian tu thu nge a sawi, ama thu nge mi dang thu? Mi hrilh teh,” a ti a. [35] Filipa chuan Lehkha Thu aṭang chuan sawi ṭanin, Isua chanchin a hrilh ta a. [36] Chutia kalkawnga an kal lai chuan tui awmna an thleng a, mi tilreh chuan, “En teh, heta hi tui a awm a, baptisma ka chan engin nge dâl?” a ti a. [38] Tichuan, tawlailîr chu a tiding a, Filipa leh mi tilreh chu an pahnihin tuiah chuan an chhuk a; Filipa chuan a baptis ta a. [39] Tui ata an lo chhuah chhoh chuan Lalpa Thlarauvin Filipa chu a la bo ta a. Mi tilreh chuan a hmu ta lo va; nimahsela, hlim takin a kal ta zêl a. [40] Filipa chu Azota khuaah miin an lo hmu a, Kaisari khua a thlen hma chu khaw tinah a kal a, Chanchin Ṭha a hril zêl a.

Pathian ramah Mitilreh-eunuch. Lalpa vantirhkoh thu angin Philipa chuan Pathianin a hman nasat em emna, celeb a nihna Samari ram a chhuahsan a, thlaler kawng, hmun rehah a kal a. Pathianin chu kawngah chuan Ethiopia mitilreh a tir bawk a. Ethiopia hi Israel ram a ni lo, Jentile ram a ni. Mitilrehte hi Pathian mite zinga tel ve thei an ni lo, an qualify ve ngai lo. ‘Tilmu keh emaw, zahmawh tan emaw chu Lalpa mite pung khâwm zîngah an tel ve tûr a ni lo,’ , (Deuteronomy 23:1), tih a ni. Nimahsela he mitilreh hian Pathian a zawn tlat avangin Israel ram khawpui/Davida khawpui Jerusalem khua a lo thleng a ni. Temple-ah inthawina a hlan ve ngei a rinawm. Tireh, emasculated a nih miau avangin a tih theih leh chan ve chin a tlem khawp ang. Isuan daidanna bang zawng zawng a thiat vek a, Pathian ramah he mitilreh hi seng luh a ni. Pathianin Philipa leh mitilreh hmangin he Isua chhandamna thu leh a mite pakhat an nihna, daidanna thiah a ni ta tih a puang ta a ni.

A hmain Samari mite, Pathian mi ni ngai lote Pathian mi an lo ni ve ta a, tunah mi tilreh Pathian mite zinga tel thei ngai lote Pathian ramah chanvo an nei ta. Isua hi hmun tina mite tan, mi chitin tan a ni. Zawlnei Isaia kal tlanga Pathian thu puan : ‘Til reh hnênah Lalpan heti hian a ti e: Sabat serha, ka duhzâwng tia, Ka thuthlung pawh vuan tlattu chu, [5] Ka Tempul-ah, ka in chhûng ngeiah hian, Amah hriatrengna tûr ka siamsak ang, Fanu fapa neite aia hming ṭha ka pe bawk ang. A hming a dai ngai lo vang,’ (Isaia 56:4-8) tih kha a lo thleng ta a ni. Eastern Orthodox leh Ethiopean Orthodox-ho rin danah chuan he mi tilreh hming hi Bacus a ni a, an ram Ethiopia a ringtu hmasaber a ni a. An ram leh a chhehvela Chanchin Tha thlentu leh theh darhtu, Ethiopia kohhran dintu a ni.

Zir tur/Lesson: Eng chungchang pawh Thuthlung Hluia ziak kan chhiarin amah ngau ngau a thutlukna siam hi a buaithlak chang a awm thin. Hriat reng atan thate:-

1. Bible thu dang nen tehkhin, chhiar tel thin a tha. Bible hian thuchah ken a nei a. Thu pakhat hetah sawiin a dang daih hmun dangah a sawi lovang tih hriat a tha khawp mai. Hei hi unity of the Bible ti tein an sawi thin.

2. Thuthlung Hlui pawh nise an sawi tum ber chu Isua a ni. Isua tel lovin thutlukna siam loh tur a ni. Isua leh a hnathawh, a zirtirna, a hnua Tirhkohte zirtirna kal zel nen chhiar tel zel a tha. Entirnan ran sual thawina atan temple a hlan thin a ni a. Isua hi Pathian beramno, kan sual thawina a ni. Ran emaw thil dang emaw a inthawi a ngai tawh lo. Sabbath serh tur thu hmun tam takah kan hmu. Isuan engtiangin nge Sabbath kha a ngaih, Tirhkohten Sabbath chungchang an ziak em, tihte chhui thin a tha.