DAWT LEH CHHECHHAM

– Lalchuangliana

Han ngaihtuah ve mai mai teh, dawt leh chhechham hi a inzul riauin i hre lo maw? Pathian thuin chiang taka ti lo tura min hrilh hi kan bawhchhiat tam ber a ni hial awm e. Dawt hi khawi atanga lo chhuak nge tiin han ngaihtuah ila, mihringte hi suala pai leh hrin kan nih vanga kan pianphung ve reng a ni kan ti mai thei. “Zaninah kan ban chungah lu kan vai dawn em?” tia thahnem ngai taka sawmtu te, “MOTOR DAL IN GARRAGE DAH SUH” tih Notice tartute hian an fiamthu nge, an tilui nge, dawt an sawi tih hi a chiang vak lo. Chuta tang chuan “Chumi chuan a sawi” tiin kan hriat chian vak loh kha dawt kan lo sawi reng thei a. Chutah  “A niin ka ring” tiin keimahni rinthu kha thutak sawiiin kan sawi leh bawk thin. Kan ti chho zel a,  mi dang bum nan dawt tih kan hriat reng kha thudik sawiin kan sawi ta mai thin a, Bible-in “Dawt inhrilh suh u” ( Kol.3:9) a tih chu kan bawhchhe nghal thin.

Tun lai hian dawt hi a tam leh zual a, hmanah chuan TV- a kan hmuh leh hriat te hi thudik ni turah kan ngai a. Tunah chuan TV leh Youtube tih vela thu kan hmuh leh  hriat hi hmun thuma thena hmun khat hi chu dawt ti ila kan tisual kher lo vang. Hman ni lawk khan Youtube- ah hian Indian Army Chief-in “Kum 2028 ah chuan India sipai 50% hi Hindu hlir ni tawh tura hmalak a ni” tih angin a rawn sawi a. “E he!” ka lo ti hman tawh a, mahse a lem vek a lo ni si a. Mi tam tak rilru a ti chiai hman ngei ang. Donald Trump pawhin inthlan dawnah Mizo tawnga thu a rawn sawi zuah zuah kha! “Dawt hi thutak a ni” kan la ti mai thei a ni!

Dawt a tam tak em avang hian kan inringtawn tawh lo va, chutah Pathian thu vekin “In thusawi chu a ni chu ni, a ni lo chu ni lo ni mai rawh se” (Mat.5:37) a tih chu kan hrechang tawh lo va, kan thu sawi tih rinawm nan “Chhia reng reng chham suh u” (Mat.5:34) a tih thupek chu kan bawhchhe leh nghal a, “Tiam tlat e” (I promise) kan ti zung zung a, a tiamtu zatve vel chuan thu kan tiam tih pawh kan hre chang leh tawh si lo. Vaiho (han tingawt ila) hian, “Kasam khata hoon” an ti zung zung a. Tum khat hmanhmawh deuhin kekawr ka siam that tir a, vawiin tlaiah lo peih ngei ngei rawh aw tiin ka chah a. “Jarur, jarur. Kasam khata
hoon” a ti a. Tlaiah ka lam hman lo va, a tukah ka va lam chuan ka kekawr chu a dahna ngaiah dahin a melh pawh a lo melh leh chhin lo niin. Ani chuan, “Kasam khata hoon” a tih kha keimah min chelhbehna tur lekah a ngai a ni.

Kan ramah hian Kristian ram tia kan inchhal ang ngei hian dawt inhrilh tawn ngai lo, “Aw” kan tih chu “Aw” ni mai, “Ni lo” chu “Ni lo” ni mai – ni vek ila a va thawventhlak dawn em! Chanchin kan hriat thinahte hian midangten min bumna laka fimkhur tura inchah ngawih ngawihte hi a tul tawh lo vang.