Tiam Tlat E (I Married You) XXI– Walter Trobisch

Bung 6 chhunzawmna

Hmangaihna kawngka

‘Inneihna triangle hi eng angle aṭangin nge kan luh ang tih zawhna kan inzawh hian, Bible chuan heti hian min chhang ang, invawnna angle aṭangin.’

Thinga siam triangle kha ka han lek kang leh a, a vei lam angle chu ka kawk a: ‘Invawn angle hi triangle luhna atana kawng hman tur ṭha ber a ni. Hmangaihna hi inkutsuih leh mipat hmeichhiat hmaa awm tur a ni. Inneihnain hmangaihnaah a hruai lut tur a ni lova, hmangaihnain inneihnaah a hruai lut tur a ni. Mipat hmeichhiatna hi hmangaihna siamtu a ni lova, hmangaihna hi thil dang baka tisa inpumkhatna zawngtu chu a ni zawk. He triangle a lo ṭhan len a, hma a lo sawn zel theihna atan chuan hmangaihna angle aṭanga luh hi a ṭha ber a ni. Pathian duhzawng nen pawh a inmil khawp mai.

‘Hmangaihna kawngka aṭanga lut turin Pathianin min duh chhan dang pakhat a la awm a. Tlang hriata mo lawm vel emaw mipat hmeichhiatna hman emaw te hian lak kir leh theih tawh hauh loh thil an thlen a, hmangaihna kawngka erawh chuan a thlen ve lem lo.

‘Inhual tawhten thutlukna an siam hma lutuk nia inhriatna an lo neih leh si a, an inhualna chu tisual deuh nia an inhriat a, innei tur chuan la nghah leh rih deuh zawkte an duh a nih pawhin a tu a mah inhliam na lutuk lova an inhualna chu la tihtawp leh mai theih te pawh a ni zawk a. Hmangaihna avang chuan an la inthlah leh thei ṭhin a ni.

Hetih lai hian Miriam-i leh Timothy-a te ka hre chhuak lo thei lova, mipui zingah chuan anmahni ka va zawng ru deuh a. Tlar hnung bera an ṭhu dun rial chu ka va hmu ta a. Miriam-i chu mipa tlar lama hmeichhe ṭhu awmchhun a ni a. An duh chuan kalphung te mai mai chu an ngai pawimawh lo thei khawp mai ka ti rilru a.

‘Angle dang pahnihte an inrawlh lem loh chuan hmangaihna angle hi chu kawngka vir thei ang mai hi a ni a – chutiang kawngkaah chuan i duh chuan i lut thei a, a ṭul a nih chuan i chhuak leh thei bawk a.

‘Mo lawm te erawh hi chu kawngka vir thei ang an ni ve lova. Kawngka inkhar phui hmiah, a chhung lama a hawnna awm ve si lo ang hi an ni. Duh chuan a hawn luih theih teh meuh mai. Mahse hawn luih chu harsa tak a ni. Pawi dun viau mah se inneih tawh hnua inṭhen leh chu inhual laia inṭhen ai ngawt chuan a harsa zawkin nghawng pawh a nei thui zawk daih a ni.

‘Mipat hmeichhiatna pawh chutiang tho chu a ni. Lak let leh rual loh thil nghawng a nei a ni. Bible ngaihdanah chuan mi pahnih mipat hmeichhiatna hmang dun tawhte chuan a hnuah ngai an awh leh thei tawh lo. Chu an tawnhriat neih dun tawh chu nei dun lo ang maiin an awm thei tawh lova. A lo hmang dun tawhte chu inpawhna eng emaw an nei tlat tawh a. Tisa pumkhat nih tawhna leh chu miin a ken tel mawhphurhna zawng zawng chu an inkarah a dah tlat tawh a ni.

‘Bible kan en chuan, an pahniha an tih tak tak leh tih tak tak lohvah a innghat lova, inneih an tum leh tum lohvah pawh a innghat lem lo; Tirhkoh Paula phei chuan nawhchizuar nena awm dun pawhin hei hi a thleng niin a sawi a ni. 1 Korinth 6:16 ah chuan hei hi kan hmu: “A nih leh, nawhchizuar zawm chu amah nen pumkhat an ni tih in hre lo vem ni le?”

‘Mipat hmeichhiatna an hman dun tawh chuan, an rilru puthmang chu eng pawh lo ni se, nupa an ni tlat tawh a ni.

‘Robert Grimm chuan heti hian a sawi a: “Tisa hian chhinchhiahna reh thei lo a pu a. Ka taksa nen hian ka duh thuin ka inṭhen hrang thei lo.”

Biak In hnung lampangah chuan che vel a lo awm a. Mi pakhat hian chhuah a lo tum a, mahse a kal tlai hovin kawngkaa chhuah theih loh khawpa an dan pin vek avangin an lo buai deuh a lo nia.

A chhuaka kha ka hre reng mai. Fatma-i a ni.

Chuta ṭang chuan ka awm a nuam thei ta tlat lo a. Kan ṭan tlai deuh a, John-an a rawn hruai leh hmain sikulah a awm leh a ngai a ni ang tiin ka inhnem a. Amaherawhchu, chu ka inhnemna pawh chuan min hnem zo tak tak chuang lo. Eng emaw dik lo awm tlata hriatna hi ka nei a. Mahse chutih hunah chuan thil dang han ti thei ka ni lo. Ka sawi zawm zel a ngai:

‘Ka sawi nawn leh ang: Kawngka dang aṭanga lut in nih pawhin in hlawhtling thei tho e, mahse hlawhchham theihna a tam em em thung a ni. Inhnuhdawh leh mai i duh chuan nangmah bakah i kawppui kha i tina hle dawn a ni.

‘Hei hian zawhna awm ang deuh pakhatah min hruai lut a ni. Nupa tuak thar la naupang ve tak tak he’ng zawhna min zawt hi ka hre nual mai: “Hmangaihna kawngka aṭanga luh chu kan duh. Mahse kan hmangaihna hi dam chhunga invuan tur leh rinawmna pumhlum nei thei tur khawpa thuk a ni tih engtin nge kan hriat ang? Inneihna thutiam laa thihnain min ṭhen hma loh zawng kan dam chhunga awm dun tur khawpin kan hmangaihna hi a puitling a ni tih engtin nge kan hriat theih ang? Sex hi hmangaihna fiahna a nih loh chuan eng chu nge hmangaihna fiahna ni ta ang?”

‘Ka chhanna ka han hrilh ang che u aw:

Hmangaihna fiahna paruk

1. Inpek fiahna

‘Hmangaihna tak tak chuan ṭawm a, pek ve a, va pawh a duh. Mahni chauh inngaihtuah lovin a kawppui chu a ngaihtuah a. Eng emaw i han chhiar hian he ngaihtuahna hi i nei fo em, Hei hi ka ṭhian kha entir ve ka duh? Ruahmanna i han siam hian i kawppuiin a tih duh tur emaw, a nuam tih zawng tur emaw i ngaihtuah ṭhin em? German ziaktu Hermann Oeser chuan heti hian a lo ziak a: “Hlim duh chuan nupui/pasal a nei tur a ni lo. A pawimawh chu kawppuite tihhlim kha a ni si a. Hriat thiam nih duh tlat chuan nupui/pasal a nei tur a ni lo. A pawimawh chu mahni kawppuite hriat thiam kha a ni zawk si a.”

‘Chu vangin fiahna hmasa ber chu hei hi a ni: Kan inpe tawn thei em? Hlim ka duh nge tihhlim ka duh?

2. Chakna fiahna

‘Ṭum khat chu mi pakhat hian lungngai takin lehkha min lo thawn a. Miin hmangaih tak tak a neih chuan a rihna a tlahniam ṭhin tih hi khawiah emaw a lo chhiar fuh ni tur a ni. A kawppui kha hmangaih a inti ve viau naa a rihna a tlahniam thei hauh lo khan a lo tilungngai a nih chu. Hmangaihna chuan kan taksaah nghawng a nei thei teh meuh mai. Chutih rualin hmangaihna tak tak chuan i chakna kha a la bo tur a ni lo; lak bo ahnekin phurna leh chakna thar a pe tur che a ni. Hlimnain a tikhat che ang a, thil thar ngaihtuah duhna a pe che ang a, hlawhtlinna tam zawk neih a duhtir ang che.

‘Hei hi kan fiahna pahnihna chu a ni ta: Kan hmangaihna chuan chakna thar min pein thil thar tih duhna min pe nge kan phurna leh chakna la bovin a tireh zawk?