AMERICA

America ramah hian vawi sawm lai ka kal ve tawh a. July thla chawhma lam khan kan nupain kan thian hluite zu mangtha turin kan zu zin ve leh a. Chuta kan zu hmuh leh hriat thar then then han sawi ila.

• Kawng thatzia. US ah khuan kawng mel maktaduai 8 aia tam an nei a, an kawngpui lian Interstate (keinin National Highway kan tih ang hi) mel 80,000 vel an nei bawk a. US ah hian metric system an hmang lo va, kilometre ti lovin mile an ti. India ramah kawng mel maktaduai 3.5 vel kan nei. An kawng thatzia chu  India rama kan kawng let 4 vel a ni ang. Tlo turin an siam a, chhah tawkin cement concrete in an phah chhuak a, a chungah inchi 8 vela chhahin alkatra  /bitumen in an zut mam a ni. Kawng biboh a awm lova, truck lian mang kheng an tlan hum hum pawhin khu tur a awm lo. Kan ramah zawng nakkum Budget thara siam (repair) that leh ngei tura chhiain kan siam a. Chuti lo chu tute tan emaw a hlawk tlat lo.

• Boruak a thiang. India ramah chuan hnap khirte hi a dum khak zel a, US ah chuan kan fai vuk reng hian a inhriat theih. Bual pawh an inbual khat a, keini angin nitin an inbual mang lo. Van boruak pawl dum ruih hi chiang takin a  hmuh theih a, thing hnah tlak hun a la ni lo bawk a, hawina lam apiang hi a hring nghulh mai. Thing rah chi an neih loh avangin sava a vang em em. Mel 2000 chuang kan tlan kualnaah in bula chawngzawng leh parva, varak te tih loh sava ka hmuh reng ka hre lo.

• Mi dawhtheihzia. Chicago atanga Baltimore kan thlawk tur kan thlawhna darkar li in an ‘delay’ a, chutah thlawhna chhunga kan thut thap hnuah an Pilot pakhat tlai nghakin darkar chanve chuang kan thu a. India ram chu ni se, “Engati nge, engati nge?” tiin kan au nuai nuai ang a. Khutah chuan tuman tlai  an pawisa lo emaw tih turin ngawi rengin an nghak mai a. Kan nupain zirtur kan nei hlein kan inhria. Kan lo kir leh lamin kan flight an lo cancel daih mai a, inhrilh awm tawh chuang si lo va. “Engtinnge kan tih dawn?” kan va tih chuan, “He line-ah hian  intlar mai rawh u,” min ti ringawt a, flight dang pawh an cancel avangin mi 50 vel hi an lo intlar ‘S’ kual ruih mai a, darkar khat hnuah thlawhna dangah min dah a, darkar 3 dawn kan nghah hnuah chu pawh chu an cancel leh a. Darkar 8 kan nghah hnuah Chicago pan chuan kan chhuak leh thei tawk a. Keimahni chang kan ni lo va, flight  zawng mi tam tak an awm a, mahse tumah hi hmanhmawh leh innawr, innek an awm lo va, au tun tun te hriat tur a awm ve lo. An dawhtheihzia a ropui. Chicago kan thleng kan bungrua kan hmu zo lo zui  – kut bengin kan haw a, mahse a tukah inah an rawn dah leh thlap.

• Thlawhnaa kal dawnin thawmhnaw lum ken a tha. Kan zin laiin khua a lum nen Airport kan lut chu thawmhnu lum ha leh keng kan hmu a, ‘A tul lo mang e’ kan ti rilru a. Thlawhna kan lut chu a chhung a lo vawt em em a,  Pi Sangteii a khur dawn ta mai. Blanket kan dil a, an lo nei hauh lo. Kan thlawh chhuah hnuah temperature an control a, a ziaawm ta a. Baltimore Airport a darkar 8 kan tang chu – ruah a rawn sur a, a chhung a vawt ta riau mai a. Pi Sangteii a khur tan – ka mawza ka hlip a, ka buntir a, a taksa a tilum chuang si lo. “T – Shirt emaw hak thuah tur va zawng teh” min ti a. Indian tlangval dawr ah ka va kal a, shawl te tak te, Sarojini Market a Rs 150 man tur vel hi dollar 15 (Rs 1000 chuang hret) in ka va lei a, a to na lei man awm ber a ni – a thu lum thei ta a. Tunah ‘souvenir’ atan a dah tha ran mai! Thlawhnaah zin dawnin shawl te deuh or light sweater ken a fin thlak.

• Phone. Khawiah pawh hian kal ila, tupawh mai hian phone hi an khawih neuh neuh mai a, America ramah pawh. Mahse keini Delhi Mizote tluka phone lawm leh khawih hi America ah chuan kan hmu lo. Awmkhawmnaa tu thusawi mah ngaichang lova phone khawih hi chu mi polite lo taka ngaih an ni.  “Your phone makes you a prisoner and that is why it is called Cell Phone” an lo ti mek reng a ni! 

• Rei leh rei lo. Air India in Delhi-Chicago-Delhi, 14- 16 hours non-stop thlawhnaah kan chuang a, a rei hle a, kan huphurh deuh va. Mahse Air India a darkar 15 thlawh aiin Baltimore Airport a darkar 8 thut kha a rei fe zawk kan ti!
  

Lalchuangliana
August 2018