CHATUAN LEH KUMKHUA- Lalchuangliana

Johana chuan chhandamna chungchangah Bible-a chang lar ber Johana 3:16-ah ti hian a ziak a: “Pathianin khawvel a hmangaih em em a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zawk nan.” Paula chuan Lal Isua lokal lehna chungchang a sawinaah, ‘…chutichuan, kumkhuain Lalpa hnenah kan awm tawh ang,’ a ti a (1 Thes. 4:17b). Heta ‘chatuan’ tih leh ‘kumkhua’ tih hi hman pawlh emaw, hman thleng emaw pawh ni se, a thu a dang chuang dawn em ni kan ti mai thei. Bible thu ropuina chu a thu hman chiah chiah leh a hmanna lai hi a lo pawimawh viau mai hi a ni.

‘Chatuan’ leh ‘kumkhua’ hi han sawi maia inang deuh thuak, thil hrang daih si an ni. Chu chu kan hriatthiam chuan Pathian kan hriat dan leh a nihna kan hriat dan hi a chiang kak mai ang. ‘Chatuan’ chu hunin a vawn ve loh (timeless) a ni a, a bul a awm lo va, a tawp a awm bawk hek lo. ‘Kumkhua’ erawh chu hun tawp nei lo (endless time) sawina a ni a, bul a nei a, tawpna a nei lo thung. Kan Pathian hi ‘Kumkhaw Pathian’ a ni lo va, ‘Chatuan Pathian’ a ni; amah chauh hi chatuan mi, bul leh tawp nei lo a ni a. Thil dang zawng zawng chu bul neia amah Pathianin a siam vek an ni.

Pathian chatuan mi chuan, chatuanah vek chuan ‘hun’ a rawn siam a. Chu chu Bible-in, ’A tirin’ a tih tak chiah hi a ni (Gen: 1:1; Jn. 1:1) Genesis bulah chuan Pathianin thil zawng zawng a siamna turin hun a rawn hawng a, chuta tangin tun thlengin hun chu a la kal ta zel a, hun awm lohna ‘chatuan’ a zawm leh dawn a ni. Johana 1:1-a ‘A tirin Thu a awm,’ a tih hian, ‘Thu’ chu Genesis 1:1-ah khan Pathianin a siam ve, a tihna a ni lo va, a tirah pawh ‘Thu’ chu a awm sa, a tihna a ni zawk. Keini chutianga Pathian Thuin a sawi ring mai tute hi kan nihlawh em em a ni. Scientist- ten ‘evolution theory’ an vawrh chhuak a, kan khawvela thil nung leh engkim zawi zawia lo inzi chhuak chho angin an han sawi a. ‘Kum maktaduai hma’ te an han ti
ngawt a, tumahin rin tur bulfuk an hre chuang lo. Kan Chatuan Pathianin a siam vek a ni tih hian ringtute min sawh nghet em em a, kan inghah tlatna tur pawh a ni.

Pathian chauh chatuan mi a nih siin keinin engtinnge ‘chatuana nunna ka nei’ kan tih theih ang?’ kan ti mai thei. Pathian hmangaihna leh chhandamna makna tak mai chu – Lal Isua kan rin hian a nunna – chatuan nunna – chu min pe leh ta mai a ni. Amah Lal Isua nena kan danglamna chu, chatuan nun kan neihna khan ‘bul’ a nei a, Lal Isua kan rinna kha – mahse a nunna ang chiahin tawpna a awm ta lo a ni.
Paulan ‘Kumkhuain Lalpa hnenah kan awm tawh ang,’ a tih khan awmzia a lo nei ta em em a ni.

Lal Isuan, “Kei Alpha leh Omega, a Hmasaber leh a Hnuhnungber, a Bul leh a Tawp ka ni,” a ti (Thup.22:13) Chatuan mi chu engtinnge bul leh tawp a nih theih kan ti leh mai thei. Hei hian ama nihna (character) aiin a hnathawhna (ministry) a sawifiahna a ni. A tira Thu awm, tisaa lo chang kha chhandam chhiar tanna bul Hmasaber, Alpha, Lal Isua chu a ni. Kraws lera a rawngbawlna hlena, ‘A kin ta’ tia auva kha Hnuhnungber, Omega, Lal Isua tho chu a ni. “Tih leh tur dang a awm tawh lo vang.”

Thil pawimawh tak mai kan hriat tur a awm – chatuan nun hi thih theihlohna (immortality) a ni ngawt lo. Pathian hi thi thei lo ‘immortal’ a ni. Eden huana mihring a siam khan Pathianin nunna thaw, ama nunna chu a pe a, ‘mi nung’ a lo nih ang bawk khan a thlarau (Pathian nihna laipui – a ‘essence’) a pe bawk a, chatuana thi tawh lo tur. Mahse thu awihlohna sual avangin chu Pathian kan anna ber –chatuan nunna, a thlarau ber kha a bo ta a. Lal Isuan min zawng tura kraws-a a rawn thih a, a thawhlehnaah chauh chu ‘chatuan nunna’ chu kan chang leh thei ta a ni. Mihring thlarau hi a thi leh tawh dawn lo va, Lal Isua ring lotute leh amah hnawltute chan tur chu ‘boralna’ tih hian a sawi fiah tawk lo – kumkhua, hun tawp awm tawh lova nghaisak tur tihna a ni. Chu tak mai chu a rapthlakna chu a ni. Amah ringtute chan tur erawh chu, chatuana Lal Isua hnena awma, ‘kumkhaw nawmna’ amah nena chen a ni. Chatuan nunna neia, kumkhuaa hlim leh lawm tawp tawh ngai lo chen tur chuan nang unau, Lal Isua hi i ringin a ta i ni em?