6. Ruihchilh chuang lo va politics ngaihven.
U.S. a inkhawm leh sakhaw ngaihsak an tlakhniam zel chhan pakhat chu Kristiante hi politics ruihchilha ṭan lam tana a dik a dawk thlu lo va tal ṭhinah mi tam takin an hmu chho tlat hi a ni. Hei hi kohhran chhungah inṭhenna siamtu a nih bakah khawvelin Kristianna a hmuh hniamna chhan a ni. Kristian tam tak chuan Krista ringtu ve thote pawh candidate “dik lo” nia an ngaih an vote avang maiin a lang a pauvin an bei a, ringtu ni tak tak lo ah te an chhuah thul. He’ngte hian rinna aiin politics-a an sa ngawi zawnpuite an zawm thuk zawk emaw tih tur a ni. Kohhran hi thil ṭul ngaihtuahna kawnga politics dah ṭha thei tawh lo va ngaih a nih hunah, politics dah ṭhaa rinna thuhmunin a suih khawm tawh lo va ngaih a nih hunah, chu hunah ngei chuan Nietzsche te, Freud te leh Marx ten sakhuana te chu khawvela duh ang anga tal tumte inphenna hmanrua mai mai a ni an lo tih kha khawvelin dik niin a ngai hmiah tawh ang. Paula chuan dan leh politics lama thu inhmuh lohnate hi Kristaa pumkhat kan nihna aia dah pawimawh lo turin Kristiante min ngen lawm lawm a ni (1 Korinth 6:6-7).
A lehlamah chuan Kristiante hi politics-ah inhnamhnawih lo tawp tura tih chi a ni lo em? Kristiante chu politics-ah an inhnamhnawih ve tur a ni hauh lo tih chu kan khawtlang hi a awm ngai ngai hian pawm hmiah ang tihna a ni a, sual chungchanga thurin kan en chuan eng khawtlang mah hi rorelna dik lo lakah an fihlim zo lo tih a ni tlat bawk si.
Eng nge kan tih tak ang? A hmasa berah chuan political party ten an member te tana “awm dan ṭha a hlawma” an chhawp ṭhin hi Kristiante chuan an pawm tur a ni ve lo. Bible in chi leh chi inthliarna lamah te leh sum leh paia dikna kawngah zirtirna (liberal ang taka lang) tam tak nei mah se mipat hmeichhiatna chungchang leh chhungkaw chungchanga a zirtirnate chu a “conservative hmel” leh viau lawi si. He’ng chungchanga Bible zirtirna chauh pawm mai hian ringtute chu tunlai politics-ah rawng nei hauh lo vin min siam thei dawn a ni.
A pahnihnaah, Bible mil rorelna dik chuan retheite leh chak lote kan pui tur a ni tih min hrilh tih hi Kristiante chuan kan hre tur a ni, a tih dan erawh min hrilh thlap lem lo. Rinna leh inpekna thuhmun nei ringtute chuan politics ram dah ṭhain rorelna dik chu an keng kawh tur a ni. An inan lohnate inzahtawn takin an hna chu an thawk mawlh mawlh mai tur a ni.
A pathumnaah Kristiante chuan party tih bik nei lo va thiltih hrim hrim hi “centrism” ah an ngai tur a ni lo – thlirna tlang ler pahnih inhal tak kara “inan lohna lai tlem dahṭhat” ringawtna chu. Khawvela thlirna dan inhal tak pahnih he’ng rationalism (ngaihtuahna hi hriatna kawng a ni tihna) leh empiricism (tawnhriat hi hriatna kawng a ni tihna), monism (awm zawng zawng hi thil pakhat aṭanga lo chhuak a ni tih ngaihdan) leh naturalism (awm zawng zawng hi khawvel dan anga lo awm an ni a, chumi piah lamah chuan engmah a awm lo tih ngaihdan), legalism (dan ngaih pawimawhna) leh antinomianism (khawngaihna ngaih pawimawhna) te an awm dun reng reng hian Kristianna chuan a bulah chat a bei ve ve ṭhin a, chutih rualin an ṭhatna ve ve erawh a hmuh hmaih ngai chuang lo. A tawpah chuan he’ng thlirna tlangte pel daihin thlirna tlang sang zawk min kawhhmuh leh ṭhin a, hei hi Christopher Watkin chuan “biblical diagonalization” a ti.
7. Chhia leh ṭha hriatna tizalenin.
Tunlai Kristiante hian Kristian “tak tak” chuan chumi khami chu a vote ang a, chumi khami chu a vote lo vang tih hi kan ching tawh khawp mai. Hei hi “chhia leh ṭha hriatna khuahkhirh” an ti. Westminster Confession Bung 20 na chu “Kristian Zalenna leh Chhia leh Ṭha Hriatna Zalenna” tih a ni. Paragraph 2na chuan heti hian a sawi: “Pathian chauh hi chhia leh ṭha hriatna chunga lal a ni a, a Thu kalh emaw, a Thu piah lam emaw a mihringte thurin leh thupek lakah a dah zalen a ni.” Pathian Thu thupek piah lama dan chuan Bible a kalh lo a ni mai thei. Ṭhenkhat ngaihdanah chuan thu keuh tluk dan ṭha tak pawh a ni mai thei, mahse Pathian Thu-in a zirtir piah lam thil a ni tho tho. Matthaia 15:1-5 ah Bible dan baka dan siam belh a, inang tlanga zawm vek tura beisei ṭhin sakhaw hruaitute kha Isuan a dem a ni.
Bible in mihring chhia leh ṭha hriatna a khuahkhirh loh thilah – chiang taka a sawi loh thilah – chuan Kristiante hi an tana Pathian finna leh duhzawng zawng turin zalenna an nei tiin he Confession hian a khaikhawm a. Bible in chhia leh ṭha hriatna a dah zalenna thilah chuan Kohhrante leh Kristian dangte pawhin an thu zawm turin midangte an phut tur a ni lo vang. Kei ngei pawh hian mi tam tak chu an chhia leh ṭha hriatna rawn chunga Democrat ni a, Republican ni hi ka hre nual mai. Chu thutlukna siam tur chuan zalenna an nei a ni. Chutih rualin Kristian dangte zalenna dipdalin, chu an chhia leh ṭha hriatna thu zawm ve tur leh an thutlukna ang siam ve tur chuan an ti tur a ni bik lo.
chhunzawm tur
*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world. He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/
Discover more from NUN HRUAITU
Subscribe to get the latest posts sent to your email.