Tirhkohtr Thiltih Zirlai 49-na. Tirhkohte 9:25-31

TIRHKOHTE 9:25-31 MIZOVBSI ([25] Nimahsela, a zirtîrten ani chu an hruai a, zânah kulh tukverhah bâwmin an thlâk thla ta a.)  [26] Tin, Saula chuan Jerusalem khua a thlen veleh zirtîrhote chu pâwl a tum a; anni erawh chuan an zain ani chu an hlau va, zirtîr a ni ve tih an ring lo va. [27] Barnaba erawh chuan ani chu a hruai a, tirhkohte hnênah chuan a rawn kalpui a, kalkawngah Lalpa a hmuha a biakzia te, Damaska khuaa Isua hminga huai taka thu a hrilzia te pawh chu an hnênah a sawi ta a. [28] Chutichuan, Saula chu Jerusalem khuaah chuan, an hnênah lût ṭhîn, chhuak ṭhînin a awm ta a, [29] Lalpa hmingin huai takin thu a hril ṭhîn a. Tin, Grik Juda-te hnênah thu a sawi a, a hnial a; anni erawh chuan ani chu tihhlum an tum a. [30] Tin, unaute chuan chu chu an hriatin Kaisari khuaah an hruai chhuk a, Tarsa khuaah an tîr ta daih a. [31] Chutichuan, kohhranhote chu Judai ram vêlah te, Galili ram vêlah te, Samari ram vêlah te chuan an nghet deuh deuh va, muang takin an awm ta a; tin, Lalpa ṭih dêkin, Thlarau Thianghlim thlamuanin an awm a, an lo pung ta telh telh a.

Sawi zauna : Saula hian Damaska atangin Jerusalem a thleng tih kan hmu a. Engtia rei nge he hun hi ziak chiah a ni lo. Chang 25 leh chang 26 inkarah hun hi engzat chiah nge a hriat loh.  GALATIA 1:15-19 ah chuan tihian a inziak a:  Tin, ka nu pum chhûng aṭanga mi tihrangtu leh, a khawngaihna avânga mi kotu Pathian chuan, [16] Jentail-te zînga a Chanchin Ṭha ka hril theih nân a Fapa chu lungni taka ka hnêna a inlârtîr lai khân, tu mah râwn lovin, [17] tirhkoh ka nih hmaa tirhkoh lo ni tawhte hnênah Jerusalem khuaa han kal hek lovin, Arabia ramah ka kal bo ta nghâl zâwk a; tin, Damaska khuaah ka kîr leh ta a. [18] Tin, kum thum a vei hnuin Kipha kan tûrin Jerusalem khuaah ka han kal a, a hnênah ni sâwm leh ni nga ka châm a. Saula hi Damaska atanga a chhuah hian Arabia ramah khawi khuaah nge a awm a, engtia rei nge a cham tarlan a ni lo. Hetiang a ngawih, silent period hi hun pawimawh tak erawh chu a ni thin. Lalpa Isua ngei pawh kha kum 12 a nih a temple a a kal thu kan hria a. Chumi hnu chuan enge thleng zel hriat a ni lo. Kum 30 a nih a rawng a bawl tan thu kan hre leh chauh. Heng ngawih hun hi Pathianin thil tam tak ringtute a zirtir hun a ni thin. Saula pawh hian a rinna nghehna tur leh, nasa taka rawng a bawl zelna turin a nun puahchahin a awm ngei ang. Lalpa nena fianrial nun hmangin Pathian Thu a hriat thiam dan thin nasa taka tih danglamin a awm ang a. Genesis atangin uluk takin Isua chanchin a zir tha lehin a rinawm. Pathianin amahah thil tum ropui tak a neih avangin kawng tin rengah Saula nun hi a ti hriamin a rinawm a ni.

Ngaihtuah zui atan: 49/1 Barnaba hming awmzia hi ‘Fuihtua’, ‘Hnemtua, Thlamuantua’, son of encouragement, son of consolation tihna a ni. Midang zawngin Saula a tunhma nun avangin an hlau a. Barnaba erawh chuan a nun inthlak, Isua tana a huaisen tak zia a hre tlat mai a. Tirhkohte bulah a hruai a, ngaihngam takin an awm phah ta a. Saula pawh ringtute bulah tlangnel takin a khawsa ta a ni. Barnaba rawngbawlna hi a pawimawh hle mai.

Mi fel, mi tha, hna leh thiltih thiam, mi talent Pathian tana mi tangkai lutuk tur hriat i nei em, i fuihin I tawngtaipui ngai em? Midang i pawm theihna tur, i fellowship pui tur hian Isua ringtu an nih hi a tawk i ti em, enge i ngaihpawimawh thin, a hnam, a chhungte, a lo chhuahna, a sum dinhmun, a hnathawh, a tawng hman?