Tirhkohte Thiltih Zirlai 47-na. Tirhkohte 9:10-19

TIRHKOHTE 9:10-19 MIZOVBSI Tin, Damaska khuaah chuan a hming Anania, zirtîr pakhat a awm. Tin, Lalpa chuan mumang angin a hnênah, “Anani,” a ti a. Tin, ani chuan, “En teh, Lalpa, heta hi ka awm,” a ti a. [11] Tin, Lalpa chuan a hnênah, “Tho la, kawtthlêr, ‘Ngîl’ an tihah chuan kal la, Juda inah, Tarsa khuaa mi, a hming Saula zâwt chhuak rawh; ngai teh, a ṭawngṭai mêk a ni; [12] a hming Anania mi pakhat, lûta a mit tivâr tûrin a chungah kut nghatin a hmu tawh e,” a ti a. [13] Tin, Anania chuan, “Lalpa, chu mi chuan Jerusalem khuaa i mi thianghlimte chunga a tihsual tamzia thu mi tam tak kaah ka hria a ni; [14] tin, hetah pawh i hming lam apiang phuarna tûrin, puithiam lalte hnên ata thu a hmu reng asin,” a ti a, a chhâng a. [15] Nimahsela, Lalpa chuan a hnênah, “Kal mai rawh; Jentail-te, lalte, Israela thlahte hnêna ka hming put luh nâna ka bêl ruat a ni alâwm; [16] ka hming avânga hrehawm engtia nasa tuar tûr nge a nih amah ka la entir dâwn a ni,” a ti a. [17] Tin, Anania chu a va kal a, inah chuan a va lût a; tin, a chungah a kut a nghat a, “Ka nau Saul, i mit vârna tûr leh, Thlarau Thianghlim khata i awm theih nân, Lalpa, i lo kalna kawnga i hnêna inlâr Isua khân mi rawn tîr a ni,” a ti a. [18] Tin, thâwklehkhatan a mit ata phuhlip ang a tla ta nghal a, a mit a vâr leh ta a; tin, a tho va, baptisma a chang ta a. [19] Tin, chaw a ei a, a lo harh leh ta a.  Tin, Damaska khuaa zirtîrho awmte hnênah chuan ni eng emaw zât a awm a.

Sawi zauna Damaska khua hi khaw lian leh pawimawh tak a ni. A khua hi Abrahama hun hma daih, 3000 BC vel atanga din tawh ni a rin a ni. Paula hunlai, kum zabi pakhatna lai vel hian mihring pawh 150,000 chuang awma chhut a ni a. Chung zinga 40,000 vel zet chu Juda an ni. AD 66 khan Roman Emperor Nero rorelna hnuaiah Damaska khuaa Juda 10,000 zet chu thah an ni.

Paula hunlai hian Kristian pawh tih tham zet chu an awm tawh a ni tih a hriat theih a. Jerusalem a Kristian tihduhdahna avanga tlan chhiaten chanchin tha an pu darh zel a nih kha. Engin a chhun thluk hnu a, aw in ‘Isua i tihduhdah hi ka ni e,’ tihna chuan Saula chu a nun a ti danglam ta vek mai. He Isua nena mimala intawhna, personal encounter with the risen Christ hi a pawimawh lai tak chu a ni. Isua hriatna chuan a nun zawng zawng a hneh ta vek a, Philipi-ah chuan ‘Keia tan zawng nun hi Krista a ni,’ tihte, ‘Ka Lalpa Krista Isua hriatna hian ka nun a hneh lutuk a, thil dang chu engah mah ka ngai lo,’ ti hial tein a sawi a ni (Phil 1:21, 3:8). Thil dang a tih zawng zawng hi chu Isua avang a ni ta vek a ni. Ni thum chaw a nghei a, tui pawh a in lo a ni. Anania kut nghata a tawngtai a a mit a var leh hnuah pawh baptisma a chang te te a, chaw a ei ta chauh a ni. A hnu zelah pawh a nun kan hria. Isua hi a ni Paula nun khalhtu chu.

Ngaihtuah zui atan ; 47/1 Pathian khan Anania engmah a hrilh hma khan Saulan hnenah, ‘Anania a lo kal anga i mit varna turin a tawngtai ang,’ tih kha a hriattir tawh a. Engkim kha Pathian remruatna vek a ni tih a chiang hle mai. Anania hian a huphurh ve em em a ni tih a hriat a. Saula kha Isua ringtute tiduhdahtu a nih kha mi zawng zawng hriat a ni. Pathian hian Anania kha huphurh tak chung pawhin a tirhnaah a kal dawn a ni tih kha a hre tlat mai si a. Kan u pakhat chuan tihian a sawi thin, ‘Anania anga Pathian mi rintlak, hlau leh huphurh chung pawha Pathian tirhnaah kal zel mi, amah hrilh hma pawh a midang hnena, ‘Anania a lo kal anga a tawngtai ang che,’ tih ngam mi, Pathian mi rinawm hi kan mamawh a ni,’ a ti thin.

I nuam tih leh, programme ti hlawhtling chin, i nunin a phal chin bak pelin i pen chhuak tawh thin em, i thutlukna hi i kutah nge awm thin Pathian thu-ah a innghat? Anania ang hian Pathian mi rintlak niin i in hria em?