Tirhkohte Thiltih Zirlai 34-na. Tirhkohte 6:8-10

TIRHKOHTE 6:8-10 MIZCLBSI

Stefana chu Pathian khawngaihna leh thiltihtheihnain a khat a, mi zîngah thil mak leh chhinchhiahna ropui tak tak a ti ṭhîn a. [9] Nimahsela, Kurini khua leh Aleksandria khua ata Juda ṭhenkhat ‘Sal chhuak pâwl’ Sunagog an tiha tel ve ṭhînte leh Kilikia ram leh Asia rama Juda-te an lo thawk a, Stefana chu an rawn hnial a. [10] A finna leh a sawipuitu Thlarau chu an hnial hneh si lo va.

Sawi zauna : Tirhkohte Thiltih hi Isua Chanchin Tha theh darh anih dan ziakna a ni. Bung 1:8 thu, ‘Jerusalem atanga tan a, Judai leh Samari leh, chu mi hnu a kawlkil tawp thlengin,’ Isua thuhretu an nih tur thu kha he mi lehkhabu sawi ber a ni. 12-ten Jerusalema an rawngbawlna chu eitur sem tura thlan chhuah pasarih-te zing ami Stephena leh Philipa te chuan an rawn zawm ve ta a. Philipa chuan Samari ramah rawng bawlin Juda-te leh Samari mite in mihranna chu a thiat a, Stephena an thah avanga ringtu hlau tlan darhte chuan hmun tinah thu chu an puang ta zel bawk a ni.

Stephena hi ‘Mi hming tha, Thlarau Thianghlima khat’ (full of spirit and wisdom) mi pasarih an thlan chhuahte zing ami kha a ni a (6:3). ‘Ringtu nghet Thlarau Thianghlima khat,’ (full of faith and of the Holy Spirit) tiin a chungchang hi sawi a ni leh a (6:5a). ‘Pathian thiltihtheihna leh khawngaihnaa khat,’ (a man full of God’s grace and power) tih a ni leh a ni (6:8). Thil namai lo tak hmachhawn thei turin Pathianin a thuam nasa hle mai.

Stephena dodaltute hi ‘sal chhuak pawl’ sunagog (Synagogue of the Freedmen) a inkhawm thinte an ni. Juda mi Rom sawrkarin sala a man, a hnu a in tlan chhuak lehte leh an fate an ni. Kurini, Alexandria, Kilikia leh Asia (Cyrene, Alexandria, Cilicia, Asia) ram mite an ni. Juda ni si Rom mi nihna(citizenship) nei, Rom nun dan, culture a seilian, Grik tawng hmang, Helleniistic Jewish Diarpora, Jeruralema kir lehte an ni. Tirhkoh Paula pawh hi hetiang mi hi a ni. Paula lo chhuahna Tarsus pawh hi Kilikia rama awm anih avangin an zinga tel ve a, thahnem ngai taka Stephena hnialtu a ni ve ngei ang. Stephena hi amah hnialtute aiin a fing zawk a (smarter), a zir sang zawk a (better educated), inhnial thiam (debatter) bik a nih vanga anmahni hnial hneh a niin a lang lo. Pathian Thlarauin finnaa a thuam miau avangin an hnial hneh lo a ni.