Tirhkohte Thiltih Zirlai 29-na. Tirhkohte 5:27-28

TIRHKOHTE 5:27-28 MIZCLBSI

 [27] An rawn hruai thlen chuan Sanhedrin hmaah chuan an dintîr a. Puithiam lalber chuan an hnênah, [28] “He hming hian zirtîr tawh hauh lo tûrin thu kan pe che u a; ngai teh u, in thu zirtîrin Jerusalem in tihkhah vek tawh hi; chu pa thisen mawh chu kan chunga bel in tum a nih hi le!” tiin a chhâl a.

Sawi Zauna : Puithiam lalber, high priest thusawi atang hian thil pathum a lo lang a: i) ‘He hming hian zirtîr tawh hauh lo tûrin thu kan pe che u a,’ tih hian an thuneihna vawn him an tum zia a ti lang a. An thu pek pawisa lotu tirhkohte thiam loh an chan tir a, na taka hrem ngei an tum a ni tih a hriat bawk. ii) ‘In thu zirtîrin Jerusalem in tihkhah vek tawh hi,’ tih hian Isua chanchin tirhkohten an puan chhuah hneh zia leh miten an dawnsawn that zia a ti lang a. iii) ‘Chu pa thisen mawh chu kan chunga bel in tum a nih hi le!’ – Isua a dah hniamin miten an ngaisang ang tih a hlau hle tih a hriat a.  Isua hming pawh sawi duh lovin, ‘Chu pa, this man’ tiin, mi satliah ve mai a ni tih tarlan a tum a ni. ‘ (Isua) thisen mawh chu kan chunga bel in tum,’ tih hian mualpho an hlauh zia, mihring mit hmuha thiam chan an tum zia a ti lang bawk. Puithiam lalber thusawi atang hian thu tak hre turin an mit a del hneh tawh zia a lang a. Pathianin puithiam ni tura a ruat chhan an hlah nasa tawh a ni tih kan hre thei awm e.

Ngaihtuah ila:

44. Keimahni insawh ngheh kan tum luat vangin emaw, kan hriat miah loh hian chanchin tha daltu, miten kawng dik an zawhna tur dang tlattu kan ni theiin i hria em?