chhunzawmna
Vuan
‘Kalsan’ leh ‘vuan’ te hi thil awm kawp tur an ni. Pakhat zawk hian inneiha a vantlang lam leh dan lam a kawk deuh a, pakhat zawk chuan nupa inkar lam a kawk. Inkawp tlat an ni. I kalsan zet loh chuan i vuan tak tak thei lo ang. Vuan tura thutlukna tak i siam a nih loh chuan i kalsan tak tak thei lo vang.
‘Hebrai ṭawnga “vuan” tih thumal hi a awmzia takah chuan midanga bei tlat, bet tlat sawina a ni. Lehkha charh beh tlat angin nupa te chu charh beh an ni. Lehkha puan pahnih inchar bet tlat chu keu phet i tum chuan a pahnihin i tithler nge nge ṭhin. Nupa invuan nghet takte pawh ṭhen i tum chuan an pahnihin an na ang – fanau awm tawhnaah phei chuan fanaute pawh an na ang. Nupa inṭhen awmzia chu ara hmanga naupangte zai phel a ni, chhip aṭanga ke ler thlengin, a lai takah.’
Mipuite chu the hmeh ang maiin an reh ṭhap mai.
‘Heti anga incharh behnain a nghawng tel chu nupa hi khawvela thil dang leh mi dang zawng zawng aiin an inhnaih zawk tihna a ni.
‘Thil dang zawng zawng aiin an inhnaih zawk. Pasal hna emaw eizawnna emaw aiin a pawimawh zawk, nupui inchhung chet leh ei siam ai pawhin a pawimawh zawk, hna lo nei pawh ni se chu ai chuan a la pawimawh zawk.
‘Mi dang zawng zawng ai pawhin an inhnaih zawk. Pasal ṭhiante emaw nupui ṭhiante emaw ai pawhin a pawimawh zawk, inleng leh mikhualte ai pawhin a pawimawh zawk, fate ai pawhin a pawimawh zawk hial.
‘Ka zin haw hian ka fate aiin ka nupui ka kuah hmasa zawk ngei ngei, chu chu ka tum dan pawh a ni reng. Heti anga ka tih hian ka faten an pa hi an nu nen an inhnaih ber tih leh an nu pawh hi an pa nen an inhnaih ber tih zir se ka duh vang a ni bawk.
‘Nupa tuak la naupang takah hian uirena hi fa u a lo pian hian a inṭan duh khawp mai. Eng vang nge ni ang? Nupui khan tisualin a pasal aiin a fa kha a lo hnaih zawk ṭhin vang a ni. Naute kha a nun pum laimu a lo ni a, pasal kha pawn lam mi-ah a chhuah tlat alawm.
Ngaithlatu mipa lamah chuan nui chunga bu nghauh nghauh an awm a, ka thusawi chu an pawm zawng tak a ni tih an tilang a.
‘“Vuan” tih awmze ril tak chu,’ tiin ka han chhunzawm a, ‘inchar bet han tih hian, mi pahnih inkarah chauh a theih a ni. Kan Bible chang hian thup hauh lovin mi pakhatin nupui pakhat aia tam neih chungchang a bei chat a ni. “Mipain…a nupui a vuan ang” a ti.
‘He chang hian nupui ṭhen pawh a duh lo tih a tilang nghal a, nupui pakhat aia tam neih hrim hrim kha a duh lo a ni, a rual ni kher lovin a indawt zut pawhin ni se.
‘Vawiinah hian “vuan” tih aiah hian thumal dang deuh pawh lo hmang ta ila, entir nan “hmangaih” tih te hi. Bible-in he thumal hi hetah hian a hmang tlat lo mai hi a mak ve hrim hrim. Vuan tih hian hmangaihna a kawk a, amaherawhchu hmangaihna danglam bik a ni. Thutlukna siam tawh hmangaihna, hmangaihna dang zawnga dap leh tawh lo hmangaihna a ni. Vuan tawh hmangaihna chu hmangaihna puitling a ni a, rinawm tum tawh hmangaihna a ni – mi pakhat laka rinawm tum – leh chu mi nena nun pum hman zawh tum hmangaihna a ni.
‘Hei hian a pathumnaah min hruai thleng ta a.
chhunzawmtur.
Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter Trobisch-a hi 1979 khan a boral a, a nupui Ingrid-i pawh 2007 khan chatuan ram a lo pan tawh.
Discover more from NUN HRUAITU
Subscribe to get the latest posts sent to your email.