Tirhkohte Thiltih Zirlai 28-na. Tirhkohte 5:21b-26

TIRHKOHTE 5:21b-26 MIZCLBSI

Puithiam lalber leh a hote chuan Israel upate, Sanhedrin mi zawng zawng an khâwm a, tirhkohte chu va hruai tûrin tân inah mi an tîr a. [22] An tirhte chu an va kal a; mahse, tân inah chuan anni chu an hmu si lo. An lo kîr leh a, [23] “Tân in chu him taka inkhârin, a vêngtute pawh kawngkhâr bula dingin kan hmu a; nimahsela, kan han hawng a, a chhûngah tu mah kan hmu si lo,” tiin an rawn sawi a. [24] Tempul pulis hotu leh puithiam lalten an hriat chuan, “Engtizia nge ni ta le?” tiin an buai hle a. [25] Chutih lai chuan mi pakhat a lo kal a, an hnênah, “Ngai teh u, tân ina mi in khungte khân Tempulah sâwn mi an zirtîr ka ti,” a rawn ti a. [26] Tichuan, Tempul pulis hotu chu a hote nên an va kal a, tirhkohte chu tilui lovin an rawn hruai a, an man luih mai chuan mipuiin lungin an dêng ang tih an hlau a ni.

Sawi Zauna: ‘Puithiam lalber leh a hote chuan Israel upate, Sanhedrin mi zawng zawng an khâwm a,’ tih a ni. Tirhkohte vau leh hrem tur hian an in ko khawm kim hle mai. A siruk lain an thawk chhuak a. Isua chanchin sawi lo tura an thupek tirhkohten an zawm lo chuan an thin a khei tak zet tih a hriat a. Roreltu, thu neitu sang berte an ni a, an thupek pawisa lotute chu nasa taka hrem emaw, thi tura an chungthu rel an tum hial emaw a ni ngei ang. He mi phenah hian Isua chanchin a darh zel loh nan beihpui an thlak tak zet a ni tih a lang bawk. “Engtizia nge ni ta le?,” tih hi ‘enge thleng zel ang le,’ tihna tluk a ni. Enge thleng zel chu kan hria. Vawiin thlengin chanchin tha chu hril a ni chhunzawm zel zawng a nih hi. Tun tumah chuan tilui lovin tirhkohte an hruai a ni tih kan hmu a. Mipuiin lunga an den mai an hlauh vang a ni. Isua thu an sawi chuan mipuite a hnehin tirhkohte lamah an tang tih a chiang a. Tirhkohte hian duh ngat se chuan anmahni man tura rawn kalte chu awlsam takin mipuite fuih pawrhin an tih hlumtir thei mai dawn tih a chiang a ni.  Tirhkohte hian man duh loin lo tang chu ni se a khaw pumah buaina a chhuak nasa viauin a rinawm. Pathian Thlarau hruaiin an awm a ni tih a lang chiang thin khawp mai.

Ngaihtuah i la:

43. Puithiam lal leh roreltute hian an thuneihna humhalh an tumna lutukah hian thil tha leh dik zawk pawh an ngaihtuah chiang hleithei lo tih a hriat a. Ngaihtuahna fim hmang thei lo khawpa siamtu che thil awmin i hria em? I thil hlut ber, i nun hruaitu ber hi enge ni a i hriat?