PATHIAN THU- Lalchuangliana

PATHIAN THU hi enge ni? Johana 1:1-5 a kan hmuh ang hian THU chu Pathian a ni a, kan hriata kan hmuh theih turin tisa- ah a lo chang a. Chu chu Lal Isua hi a ni. Kan Zosâp hla thiam Rev Zosâpthara khan hlain chiang takin min lo dah sak a, KHB # 5 hi. Tichuan Pathian Thu chu enge tih lam ni lovin, tunge tih lam daih a lo ni a. Pathian Thu chu Lal Isua hi a lo ni a. Chu chu kan hriat a, kan rin a, kan zawm a, kan
nunpui tur hi a lo ni ta a ni.  Chuvangin Pathian thuâwih kan tih chu Lal Isua thuâwih tihna a ni a, amah Lal Isua ngeiin vana a lawn chhoh leh hmaa a Thuchah Ropui ber ( The Great Commission) kan tih chu, “Thu
ka pêk zawng zawng che u hi pawm/zâwm turin zirtir rawh u,” tih a ni ( Mat. 28:19) Lal Isua thu hi kan hre tur a ni a, kan ringin kan zâwm tur a ni. Mizote zinga Kristian hmasate chu “Pathian thu âwih” tih an ni mai. Keini hian kan hre teuh va, mahse kan  awihin kan zawm em? tih hi kan inzawh fo tur chu a ni. Lal Isua hi kan engkima kan engkim a ni a, kan nihna, kan theihna, kan dinhmun – kan engkim mai hi awmzîa (meaning) neihtirtu chu Lal Isua hi a ni. Pathian Thu chu awlsam taka kan hmuh leh kan hriat theih nan Bible kan nei a. Mahse Bible hi chhiar tamin hre hle mah ila, amah Lal Isua ber kan rina kan neih chuan si loh chuan he khawvêl piah lama sâwtpui tur kan nei lo vang. Amah Lal Isua ngeiin a sawi kha: “Pathian Lehkha in chhiar ngun thin, a chhungah chatuana nuna awmin in rin avangin, chung Lehkha chu ka
chanchin hriattirtu chu a ni si a. Nimahsela nunna nei turin kan hnenah in lo kal duh si lo.” (Johana 5:39&40)

Lal Isua – kan kawng leh min hruaitu: Lal Isuan “Keimah hi kawng leh thutak leh nunna chu ka ni,” a ti a (John 14:6) Kum 7 lîam taah khan DMI hian kan Golden Jubilee kan lâwm a, chuta kan thupui chu
“KRISTA MIN HRUAITU” tih a ni. “Isua, kan rinna siamtu leh tifamkimtu lam chu enin,” tih ang khan. Tupawh mai hian hma kan sâwnna turin kawng zawh kan nei theuh va, a chang chuan kawng kan bo \hin a, kawng bo chu hrehawm tak a ni. Sawi tam lo mai ang. Kawng kan hriat loh chuan kawng hretu kan bêl thin. College-ah eng subject nge ka lâk ang tih thlengin a hre tur kan râwn thin. Thil pawimawh ber mai, kan chatuan nunna tura kan kawng zawh hi- a kawng ni bawk, chu kawng lo zawh chhuak tawh-tu, Lal Isua kan nei hi a va lawmawm em!

Khawi lam pawh zawh dawn ila, thim thamah a chêt theih loh. Mahse Lal Isua leh a thu hi ÊNG a lo ni tlat mai a. Thimin lei a tûam laiin Khawvel Êntu,  Êng chu a lo kal a , tisaa a lo lan hma daih pawhin Sam phuahtu chuan, ” I thu hi ka ke atan khawnvâr, ka kawng atan êng,” a lo ti tawh a, chu chu vawiinah hian a la dik reng a ni. Thu – Lal Isua, khawvel Êng hi vanramah pawh kan Êng a ni zel dawn a ni.

Min hruaitu tur atan chuan kawng chin hria kan duh ber. Lal Isuan ka kalna tur kawng chin in hria e a tih khan Thoma khan , “Lalpa, i kalna chin kan hre lo asin,” tiin a chhuahchhâl deuh a ni. Lal Isuan chiang
tâwkin a hrilh hlawm kha. Chu chu Johana bung 14 leh a hnu zêlah pawh, kan hmu a. Tunah kan sawi sêng lo vang. Mahse he kawng hi kraws kawng, tunlai thusawitute  sawi dân takah, mahni inchin ralna
kawng a ni tlat mai a, kan zawh  ngam leh lo zâwk thin a nih hi. Amaherawhchu he kawnga kal tawh hi tumah bo leh inchhîr an awm ngai lo. Chu kawng dik chu Lal Isua, Pathian thu bawk hi a ni.

Pathian Thu hi tehna dik a ni.  “Evangelical Church ” ( piangthar Kohhran ti mai ila) rêng rêng chuan 2 Tim.3: 16,17 beh chhan hian Pathian thu hi rinna leh thiltih tehna dik lo thei lo a ni tih hi an pawm a
ni. Eng dinhmun pawh hi Pathian thu atanga thlîr leh teh hi a lo dikin a lo rual khâi zêl a. Thufingte 30:7,8 a pachhiat leh hausak chungchang a sawite hi ‘social justice’ dik tak chu a va ni em! Tuna i nihna chiah leh i neih ang chiah kha mi dang tupawh, Ambani, Bill Gates nen pawh thleng tawp dawn la, i duh ang em? Kei ka duh lo tawp. Tah chuan Pathian thuin hausakna tehna a sawi hi a dik zia kan hmu ang. Paulan tlai leh riltama awm dan thurûk ka hria a tih kha, “mi tichaktu Krista Isua” hi a ni. Chu chu a khawngaihna zara kan chanvo tho a ni. Pathian thu – Lal Isua hi en ila, lunghnûrna tur chhan hi a vang teh ania. Pathian hian min siam ‘special’ khawp a, nangmah ang chiah hi khawvel mipui 8 billion zingah hian pakhat mah an awm lo nia. Lal Isua kan rin hian Pathian tehnaah keini aia hlû hi tumah dang an awm lo. Kan nihna, kan neih engkim hi Pathian Thu atangin teh ila, lawmna tur hlir a lo ni a, kan lungâwi mai a ni.

Pathian thu hi hun hriatthiamna a ni. Pathinin thil min pek hlu ber hi enge ni tiin inzawt ta ila, a Fapa Lal Isua tih lohvah hi chuan ‘hun’ hi a ni kan ti awm e. Mi tam tak an thih dawna an inchhir fona chu an \hat laia an hmangaih ber an nupui fanau te nêna hun tha hmang lova thil danga an lo intibuai lutuk kha a ni \hin. Pathin mi Mosia chuan, “Kan nite chhiar dan min zirtir ang che,” a ti. (Sam 90:12) Engkim tan hun a
awm tih Pathian thuin min hrilh laiin kan hunte hi amahin a vawng a, (Sam 31:14,15) kan kuta mi a ni lo. Kan pian hma rîrûang pawh kan neih hma hian kan hun leh ni tur Diary hi Pathian hian a lo ziak fel vek
tawh a. Sam 139:16 ah chuan, “Kutkê ka neih hma pawhin mi hmu vek a, ka damchhung ni turte a intan hma daihin i lehkhabuah chuan ziak vek a ni,” tih kan hmu. Nitinin Lalpa hi kan ni kan hman dan turah râwn ila, a lehkhabu kêuva chhiar dan i zir ang u. (Jakoba 4:13-15) Ani tan chuan kum sâng khat hi ni khat ang mai a ni si a. Pathian hian hun hi kum, thla, ni, darkar tiin a chhiar ve lo ve.

A tâwp berah: Pathian Thu-ah hian kan chhungkaw damna a awm a ni tih hi. Ephesi 5:33 ah hian Pathian thu pawimawh em em a awm a : “Tu pawhin mahni a inhmangaih ang bawkin mahni nupui hmangaih theuh rawh se, nupui pawhin a pasal a zah thiam tur a ni” tih hi. Mizo zîngah chhungkaw kehchhia (broken family) kan tamzia leh chumiin a rah chhuah kan tawrh nasat dân hi kan sawi thin a. A chhan ber nia ka hriat chu paten kan nupuite kan hmangaih lo hi a ni. Pate tana an sawi thin – “The greatest thing you can do for your children is to love their mother” an tih thin hi a dik em em a ni. Kan faten Pathian hmangaihna dik tak leh mihring inhmangaihna awmzîa an zir theihna tha ber chu paten kan nuipuite kan hmangaih hian a ni. Mahse a phêk leh lam a awm – chu chu nupuite hian kan pasalte hi kan zah
(respect) tur a ni a, kan chawimawi (honour) tur a ni., Chuti lova kan fate hmaah an thu kan hnial a, mi dang lakah mualphovin kan siam bawk thin. Kan patena hmangaih theih lêk loh hian kan khawsa ve bawk
thin a ni. Nupa chu in tihthinrim chang a awm bawk; mahse Pathian thuin “thinrim ula, sual erawh chu sual suh u; in thinur niin tlâkpui suh se” (Eph. 4:26) a tih hi zâwm ang u.

Pathian thuin min tih ang hian kan nupuite hi hmangaih bur mai ila, kan pasalte hi zah thiam hlur mai bawk ila ‘broken family’ tih hi kan hre tawh ngai lo vang. Pathian Thu kan ring anih chuan he Pathian thu
pawimawh tak mai hi i zâwm ang u.