Tirhkohte Thiltih Zirlai 27-na. Tirhkohte 5:17-21a

TIRHKOHTE 5:17-21a MIZCLBSI

  [17] Tin, Puithiam lalber leh a hote zawng zawng, Sadukai pâwla mite chu an lo thawk a; tirhkohte chu an îtsîk êm êm a, [18] an man a, vântlâng tân inah an khung a. [19] Nimahsela, zânah Lalpa tirh Vântirhkoh pakhatin tân in kawngkhâr chu a rawn hawng a, a hruai chhuak a; an hnênah, [20] “Kal ta ula, Tempulah va ding ula, mipuite hnênah hêng nunna thu leh a awmzia zawng zawng hi va sawi tawh u,” a ti a. [21] Chu thu chu an hriatin an kal a, zîngah chuan Tempulah an lût a, mi an zirtîr ta a.   

Sawi Zauna: Puithiam lalber leh a hote chuan Tirhkohte chu thiltihtheina an neih a an lar tak em avangin an itsik em em mai a ni. Chung thiltihtheihnate chu Pathian chauhin a pe thei tih an hre chiang hlein a rinawm. An awm dante, an rilru put hmangte, an chhungril dik lo tak takte in hmuchhuak thei lo khawpin a ni lo lamah an lo in sawhnghet hman tawh a ni. Tun tumah hian Petera chauh ni lo, Johana leh zirtir dang tam tak an man a ni. Vantirhkoh atih hi zirtu thenkhat chuan tang vengtu anmahni khawngaihtu a ni thei ti a ngai an awm. Engpawh ni se, Luka’n van atanga tirh, khawvel mi pangngai ni lo, tirhkohte tanin kawngkhar hawnga, chhuah tir a, tempula thu sawi tura hrilhtu, ti a a mi sawi hi mihring mai a nih a rinawm loh. Vantirhkoh hian chanchin tha hi ‘nunna thu’ tiin a sawi a ni. Christianity hi sakhua a ni lo tiin an sawi thin. Mite hnenah i tih dan sawi lo la, i pawl, i tha tih zawng sawi suh la, Isua hi kawng leh thutak leh nunna a nih sawi zawk rawh. Pathianin ‘nung’ a tih chu amah nena inzawm chauh hi a ni. Chu chu Isua rintute chauhin an nei a ni.    

Ngaihtuah i la: 42. ‘Nunna thu leh a awmzia,’ tih hian eng thu nge ni a i hriat? I thil buaipui leh i ngaih pawimawh hi ‘nunna thu’ niin i hria em?