Krista Tuarna, Thihna leh Thawhlehna

NGUN TAKA NGAIHTUAHIN, AMAH I PAWL ANG U

Vawiin February ni 17, 2026 hi Chinese Lunar Calendar-ah chuan an Kum Thar intanna a ni a. Chinese ho hian hun hi kum 12 zela hlawmin an chhiar thin a, chung kumte chu ramsa 12-in an chhinchhiah thin a. I pian kum zat han sawi la, Chinese ho chuan eng ramsa kumah nge I pian (shēngxiào) tih an hrilh chat chat thei ang che. Chuan, kumin hi Chinese kumah chuan Sakawr Kum (Year of the Horse) a ni.

Tin, vawiin ni hi Muslim ho calendar-a a thla 9-na, khaw en chhung zawng chaw an ei theih loh hun, an thla thianghlim Ramadan intanna a ni bawk a. Abrahama atanga chhuak Pathian pakhat biakna sakhua (Abrahamic monotheistic religions) zingah Juda sakhua leh Islam sakhaw zuituten Isua an lo rin ve theihna turin kan tawngtai thin a. Anni pahnihte hikan cousin an tih ve fo thinte kha an ni a. Tirhkoh Paula’n, “Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo. Pathian felna hre lovin, anmahni felna tihngheh tumin Pathian felnaah an intulût si lo,” (Rom 10:2-3) a tihah hian an leng ve ve thei awm e.

Chutichuan, kumin 2026-ah hian Good Friday hi April ni 3 niin, Easter Sunday hi April ni 5 a ni dawn a. Good Friday hma zawng ni 40 chhung hi tunhma leh tunhnu thleng pawhin Kristian Pawl thenkhatte chuan Chawlhkar Thianghlim atana inbuatsaihna – Chawnghei, Tawngtai, Mite tanpuina – hetiang hun atan hian an lo hmang thin a.

Hun Laihawl velah khan he LENT hun hi mihring duh dan ang leh Pathian tihropuina lam aia dan ang chauha hmanna (legalistic rituals) a nasat avangin mi tam takin an dodal thin reng a. Kohhran Siamthatna hunah khan John Calvin chuan Lent chu “mihring siamchawp hlimhlawpna, puithuna thil a ni,” tiin a sawisel a. Puritan ziaktu pakhat John Owen-a pawhin ‘pawnlang taka a lang thei chauha mahni inphatna, thinlung lam khawih si lo,’ tiin a sawi bawk a. Charles Spurgeon-a chuan Lent chu ‘mihring dan siamchawp’ tiin a lo sawisel bawk a ni. Hun an hman dan te, an thiltum te, an thiltihte khan a kawh ber kha lo danglamin, Krista chawimawi lovin, mihring lam nasa taka a chawisan avangin (anthropocentric), thil tha tak anga lang kha, a tawpah chuan Setana’n hruai kawiin, a lo tichhe ta (hijacked and corrupted) ni te pawhin a ngaih theih awm e.

Lent Hun hi Roman Catholic kohhran lamah an hmang urhsun hle a. Mahse, tun hnuah hian anni chauh ni lo, Lutheran, Anglican, Episcopalian, leh Methodist te pawh hian tharthawh lehin, Pathian pawlna leh Krista tuarna hriatrengna hun, Tawngtai (chaw nghei/nghei kher lo), Mi harsate Chhawmdawlna leh Inserhhranna hunah an hmang leh tan ta mek a. Chutiang zawnga Pathian Thlarau Thianghlimin a thawhna mihringah te chuan he hun hi hlawk takin a hman theih a ni tih a hriat theih awm e. Pathianin min pui se la, kumin Lent chu Isua Tuarna lam hawia Bible chhiar tur an siam (LENT CALENDAR) zuiin, Nitin Pathian pawlna hunah hman i han tum ve teh ang tiin ngaihtuahnaah a lo lut a. Hetianga mahnia fianriala Pathian pawlna hun hlawk taka hmang duhte tan, hun remchang, bawhpelh uiawm tak a niin ka hria a ni. (Reading Plan/Guide duh tan entirna HETAH leh HETAH).

Kumin LENT hian naktuk February Ni 18, 2026 (Nilaini) atanga April ni 2, 2026 – Venpui Zan thleng hi a awh dawn a. Kan cousin ho chawnghei tan mek tan te, Isua pianna hnam Juda hote, kan chenna India rama sakhaw lian ber zuia pathian tam tak be mektute tan te, kan chhak lawk, thenawm rama mihring tam tak Pathian awm ringlotu, Sakawr Kum thar lawm mektute tante – Isua an lo hriat ve theihna tura tawngtaina hunah te leh Krista Tuarna, Thihna leh Thawhlehna ten kan mimal nunah theuh awmzia neia, thiltihtheihnaa a thawh ngei theihna atan he hun hi a hman tan theih a ni tih te pawh lo inngaihtuah ila, a tangkai thei viau awm e.

Kan hma lawka kohhranhoten New Delhi-a Spring Festival Retreat Camp kan neih tur te, Chawlhkar Thianghlim – Venpui Zan, Good Friday, Easter Eve (Saturday) leh Easter Sunday kan hman tur zawng zawngte Pathian ropuina tarlanna, amah kan hriatchian lehzualna leh ama hming kan faka, siamtharna duhawm tak kan chan theuh theihna turin theihtawpin mahni hmun theuhah Pathian i au theuh teh ang u. Amen!