Tiam Tlat E (I Married You) IV — Walter Trobish*

IV.

Ka room reh vang vang chuan min tuam mupin ka hria. Ka hmaa thusawi tur ziak sa chu ka en a, tih theih nei lo riauva inhriatna ka nei a. Hringnuna a tak ram nen inzawmna an nei lo riauvin ka hria.

Chutah kha nu kha a hming leh a phone number ka zawt hauh lo tih ka hre chhuak ta thut mai lehnghal a. Ka va tisual chiang em! Engti ang mahin va biak pawh leh dan tur kawng ka nei tawh lo. Min rawn be leh mai ang em?

Tichuan phone chu a lo ri leh ral ral a. Amah a nih leh beisei deuhin phur takin ka la a. Mahse hotel hnathawk bawk a lo nia.

‘Hei hotel luhkaah mi pakhatin a nghak che aw.’

‘Ka lo chhuk nghal ang tih lo hrilh rawh.’

Ka lehkha ziakte chu briefcase-ah thun sawk sawkin chu pa chu hmu turin ka chhuk ta a. Pa pakhat, hmel felfai tak, kum sawmthum awm vel, suit ṭhui nalh tak ha hian Maurice-a intiin mi a rawn inhmelhriattir a. Thu ka sawina tur Biak Ina min hruai tura lo kal a ni a, a car lam min panpui ta nghal a.

‘Nupui i nei tawh em?’ tiin titi bul ṭan nan ka han zawt a.

‘La nei lo.’

‘Kum engzat nge i nih?’

‘Sawmthum leh pali.’

Sawmthum leh pali-ah nupui a la nei lo. Eng nge a chhan ni ta ang? tiin ka ngaihtuah a. Tichuan Maurice-a chuan a sawi chhunzawm a:

‘Ka naupan laiin ka pa kan chan a. Ka nu ka enkawl chhoh a ngai ta a. Bakah ka zirlai hi zawh phawt a hna ṭha deuh neih ve phawt te ka duh a. Tunah hian insak lam hna thawktu company-ah business manager in ka awm a. A hrim hrimin nupui hmuh hi a harsa ve riau a.’

‘Eng vangin nge a harsat a?’

‘Inhmelhriat hi harsa lai a nia. Nula han hmuhna tur hi ka hre lo a ni.’

‘I rilruin tin zawn deuhte i nei reng reng em?’

‘Nei ve e.’

‘Engtin nge a chhan che?’

‘Ka hre lo. Ka la be lo hrim hrim.’

‘Engati maw?’

‘Ka hmuh theihna hmun awmchhun chu bus-ah chauh a nia. Zinga sikul a kal ṭhin hian a bus chuanna ka hria a. Chutah chuan ka chuang ve a, bus stop pahnih inkarah biakna hun ka zawng ṭhin.’

‘Kum engzat nge a nih?’

‘Ka hre lo. Kum sawmparuk chu a la pel lo tawp ang ka ring.’

Mak ti takin ka en a. Engtia awm thei nge? Tlangval fel leh hmelṭha pangngai tak, hna ṭha tak chelh a nia, mahse sikul naupang umzuiin bus-ah a chuang ṭhin a nia!

‘Engati nge chuti ang em ema naupang te i thlan a?’

‘A upa deuhte chu pasal nei tawh an nih loh vek pawhin mi lo kawp tawhte an nia. A dik lo viau em ni?’

‘A, kum sawmruk i nih hunah kum sawmli leh pahnih chauh a ni dawn tihte pawh ngaihtuah tel la.’

‘Nia, ngaihtuah tel a ngai a nih chu.’

‘Biak In chu kan pan ding dawn em? A hla riauvin ka hria,’ ka ti a.

‘Ka penpui lawk che a nih hi,’ Maurice-a chuan a ti a, ‘kan harsatna lian ber mai hmuhtir che ka duh a. Hei hi kan nawhchizuar awm khawmna hmun a nih hi.’

Khawpui laili kha kan pel tawh a. Kawng tihmam lem lohvah hian a sir tawn tawnin hluma siam in, a chung di-a chih hi za chuang vel a lo ding tlar ṭhut mai a. Helai hmunah hian mi sang chuang chu an cheng awm e a.

‘Hmeichhia hi eng vanga inzuar ta nge an nih?’

‘Tam tak hi chu fa nei thei lo, an pasalten an hnawhchhuah an nih hi.’

‘Eng vanga fa nei thei lo nge an nih?’

‘Doctor-te chuan mipat hmeichhiatna avanga inkaichhawn chi natna, an pasalten nawhchizuar an kawp aṭanga an kai, annin an kai chhawn ve leh vang a ni an ti a. Thil ṭha lo, kal kual reng si a ni ber e. A ṭhente hi chu hmeithai, an fate an kawl theih nana heti anga ei zawng ta mai te pawh an ni. Pasal dang nei leh ta se an pasala chhungte khan an fate an chhuh daih dawn a.’

Chulai hmun kan pelh hma chu ngawi rengin kan tlan ta a, tichuan kawng ṭha pangngai kan thleng ve leh ta a. Biak In kawtah chu kar lovah kan thleng ta mai a.

Kan va luh chuan a chhungah chuan an lo zai ṭhap ṭhap tawh a. Ṭhutna chu a khat hneh viau a, vei lamah mipate ṭhuin ding lamah hmeichhia. Maurice-an min hruai luh lai chuan min rawn thlek ru sap sap hlawm a. Daniel-a chu tlar hmasa berah ṭhuin a bula ṭhu turin min lo hui zauh zauh a.

Hla bu min pein an sak lai mek tlar chu min kawhhmuh a. Ka chhiar thei mai nain a awmzia ka hre hauh lo va. A thluk erawh ka hriat hnu a nih vangin ka zawm ve thei a. An hmaa thu ka sawi hmaa thil han tihho chu a nuam riau mai.

Chang tawp ber kan sak lai chuan Daniel-a chuan a hla bu a khup a, kal hmasa turin min ti a. Pulpit lam panin step-ah chuan ka lawn chho a. Ani chuan min zui zelin ka bulah chuan ka ṭawng let turin a lo ding a.

A tlar tawp ber an sak lai chuan ka thusawi ngaithla tur mipuite chu han thlek kualna hun remchang ka nei a. Tlar hma lamah chuan upa lam an awm nual a. A tam zawk, ṭhalai deuh ho chu a hnung lamah an ṭhu deuh fur a. Insi ṭhapa an ṭhu hlawm a, an lua sam dum buk tak tak chuan velvet carpet te min mitthlatir deuh riai ruai a. Keini lam hawia lo dak chhuak tumah an awm lo.

Daniel-a hnenah chuan ka Bible chang chhiar tur ka hrilh ru a. A Bible a keu a. Kei pawhin ka Sapṭawng Bible chu ka keu a. Thu ka sawi ṭan ta a.

chhunzawm tur

---

Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter-a a boral hnuin Ingrid Trobisch chu Springfield, Missouri-a an chhungkaw inah a kir leh a, thuziak leh thusawi rawngbawlna a la chhunzawm ta zel a ni.