RU SUH- Lalchuangliana

Pathianin Thu Sawm a pek (Ten Commandments) zinga sawi leh zirtir hlawh lutuk lo chu he thupek “Ru suh” tih hi a ni awm e. Lev.19:11 -ah chuan, “Ru suh, bum suh, dawt sawi hek suh,” tiin kan hmu a. Rukruk leh inbum leh dawt sawi hi a inkawp duh khawp mai. Israel faten Pathian chanpual an ruksak ni ngei tur a ni. Pathian chuan, “Sawma pakhat leh thilhlanahte hian…ka chanpual min ruksak avangin in hnam pumpui chu anchhia lawh a ni ta,” a ti hial mai ( Malakia 3: 8&9)

America ramah khuan dawra mi zawrh ruk sak (shop lifting) hi a hluar thar nasa an ti a, kum khat chhung hian 4 billion dollar aia tam hi a bo an ti. Mizo zingah hian dawr neitute thil ruksak hi kan tam vak lo mai thei. USA ah bawk chuan shoplifting aia tam hi Vehicle Theft a ni a, chu aia la tam leh chu mi in leh dawr suam (burglary) hi a ni. Mahse rukru lian ber chu Company lian ho hi an ni an tih tlat chu mawle. Amazon, Meta, Microsoft etc te hian an thawktute thil hi an ru nasa em em a, chu chu an thawktutena an thawh man an hmuh ngei ngei tur chhuanlam chhe te te – i kal tlai thin, i haw hma, leave i la zing tih angte  siamin an hlawh hi an ‘cut’ sak teuh teuh a, chutianga hnathawkte hlawh an hren sak chu dollar billion
15 chuang a ni an ti. “Wage Theft” hi rukruk lian ber a ni an tih chu.

Mizoramah hian chutiang chuan chhut ve ta ila, Sawrkar ber mai hi rukru lian a ni thei mai awm e. Sawrkar hnathawk te an hlawh pe lo va hren sak te hi rukruk chu a ni mai dawn lawm ni?  Hlawh lak ngena lo ‘strike’ te pawh hi a chhawrtute hian thiam loh an la chan mai hmel a ni. “Ngai teh u, in lova hnathawktute hlawh in hrensakte chu an au va, buh sengtute au thawm chu engkim Lalpa beng a thleng ta,” (Jakoba 5:4) Beng neia hre duh tan chuan a chiang viau mai. “Leiah hian nuamsa tak leh nuam tawlin in awm a, inthah runpui ni atana inchawm thau mai in nih hi,” tih te a la ni leh ta nghal. (v.5)

Sawma pakhat hi Kohhran mi inti chuan kan pe deuh vekin ka ring a, mahse sawma pakhat mai a la ni lo va, “thilhlanahte” tih a la ni leh zel a. Mi uikawm leh mi thil phal lo thil hlan (chu mi awmzia chu a thlawna pek) nachang hre lo te hi Pathian hian “rukru” min lo ti reng mai ang tih a va hlauhawm em! Rukru hian mi an bum a, dawt a la sawi fo leh ta nghal a!