Tirhkohte Thiltih Zirlai 26-na. Tirhkohte 5:12-16

TIRHKOHTE 5:12-16 MIZCLBSI

Tirhkohte chuan mipui zîngah chhinchhiahna leh thil mak tam tak an ti zêl a. Anniho chu an za-in lungrual takin Solomona hulhliapah an inkhâwm ṭhîn a. [13] An zîngah chuan tu mah mi dang an tel ve ngam lo nâ a, mite chuan an ngaisâng êm êm a. [14] Lalpa ringtute erawh chu, a hmei a pa, an zînga tel an pung tial tial a. [15] Chutichuan, dam lote pawh kawtthlêrahte an zâwn chhuak a, khumah te, mutphahah te an muttîr a. Petera hlim chuan a kal vêl pahin an zînga ṭhenkhat tal a hliah theih nân an ti a ni. [16] Jerusalem kiang vêl aṭang pawhin mi an lo kal a, damlo te, ramhuai bawlhhlawh man te an rawn hruai a, chûngho zawng zawng pawh chu an lo dam ta zêl a.

Sawi Zauna: Tirhkohten Pathian thu an sawi nem nghehnan chhinchhiahna leh thilmak (signs and wonders) tam tak an ti a ni. An thusawi hria leh an thiltih hmutute chungah kawng hnihin nghawng a nei a. Pawl khat chu; an thu sawi dik ti a, an zinga Pathian hnathawh hmu a, ngai sang a, an zinga tel ngam chiah si lote an ni. Pawl dang chu; chung chu hmu a, an zinga tel ve tate an ni. ‘A hmei a pa-in an zawmve,’ tih hi thil chhinchhiah tlak tak a ni. Khang hunlai khan sakhaw thilah leh khawtlang thil hrim hrimah pawh hmeichhia an tel ve ngai mang lo. Isua ringtute, kohhran danglamna kawng khat chu mi zawng zawng, a hmei a pain, inthliarna awm lovin chanvo pawimawh tak nei vekin rawng an bawlho thin hi a ni.

‘Petera hlim chuan a kal vêl pahin an zînga ṭhenkhat tal a hliah theih nân,’ ti a kawtthlera miten damlote an muttir thin hi puithuna, superstition anga ngaih theih tak a ni. Petera leh zirtir dangte thusawi leh thilmak tih hmutute an ni a. Chung an hmuh avanga Pathian hnathawh, damna beisei an ni. Puithuna nen chuan ngaih fin theih tak ni mahse a in ang lo viau mai. Hmeichhe thiputin Lalpa Isua puan fem a khawih a, a dam ta nen khan a inang viau mai. He ta Petera hlimin a ‘hliah’ (overshadow) tih a a tawngkam hman hi nula thianghlim, virgin Mari rai tur chungchanga vantirhkohin, “Chungnungbera thiltihtheihnain a ‘hliahkhuh’ ang che,” (Luka 1:35) a tih a a tawngkam hman tho kha a ni. He tawngkam ‘hliah’ (episkiazo) hi hmel danglamna tlang a Isua, Mosia leh Eliza-te chhumin anmahni a ‘hliah’ tihah khan hman a ni bawk. Pathian chenchilna leh awmpuina, a presence sawina a ni. Ramhuai bawlhhlawh mante pawh an lo dam ta zel bawk a. Anania leh Saphiri-te nupa chunga rorelna hlentu Pathian hnathawh ropui tak a lo lang a a ni.

Ngaihtuah zui atan:

41. Kohhranah emaw, i nunah emaw Pathian hnathawh i hmu thin em? Thilmak hi Pathian ring lotute hian an ti ve theiin i hria em? Pathian hnathawh a nih leh nih loh engtin nge kan hriat hran theih ang?