MIZO NIHNA- Lalchuangliana

Tumah sawisêlna ni lovin ngaihtuahna siamtu mai atan a ni tih hre hmasa ila. Mizo kan nihna (identity) langsâr ber mai leh keimahni ngei pawh Mizo kan ni tih kan inhriattawnna chu kan hming hi a ni. Kan  Mizo zîa (nature, characteristics) lam kan sawi dawn rih lo a ni. Mizo tih hrim hrim hi a huapzo êm a, chuvangin tun hmaa Lushai Hills tihte pawh Mizoram tia thlâk kan ni. Zoramthanga, Vanlalsailova,
Vanlalzuata, Lalthanhawla, Lalduhawma, Lalmalsawma, Vanneihtluanga, Vanlalzawma tih ang hmingte hian an Mizo nihna a tichiang êm êm a.

Kristian hming:  Kristian sakhua kan lo vawnin Mizo ni lo hnam dang, kristian sakhuaa min hruai luttuten Sapho kristian hming min pe a, David, James, Francis, John, Margaret, Maria, Esther etc kan pu ta fur a, a tira kan nu leh paten Mizo hming tha tak min sak sakah khan a bul lamah kan belh a, miten min kohna ber a lo ni ta fo va; kan hming kohna atang ringawt chuan Mizo kan nih leh nih loh hriat a harsa ta
khawp mai. Hetiang kristian hming pute hi midang hian kristian nghet tak ni tur hian an ngai ngawt leh nghal a. Michael Lyngdoh, Robert Vadra, George Fernandes, Sonia Gandhi te pawh kristian nghet takah an ngai, mahse an ni lo.

Mizo nihna sâwrzîm: A bîk deuh taka kan nihna (exclusive identity) tihlan kan duh leh ta a, kan hnam, kan chi bîk hming kan belh leh ta a. Lalnunmawia Chuaungo, Zosangliana Colney, Feli Fanai, Lalnghinglova Hmar, Lalhriatrenga Chhangte, Mami Varte,  Zaichhawna Hlawndo, Liansailova Sailo, Vanhela Pachuau etc ti tein kan hming kan lo dah ta a, kan mi hriat lar tak takte an ni. L.T.Hrangchal, T.Cherpoot, J.K.Khenglawt ti te pawhin kan hming kan dah a, kan tlêma leiah hriat chu kan inhre ve thei mai. Mahse Mizo kan nihna chhah tak (inclusive identity) kan intâwm kha, Chuaungo, Fanai, Hmar, Sailo, Cherpoot etc ni ve lo tan chuan nihna bîk (exclusive identity) chu kan tâwm thei ta lo va, kan nihna intâwm, Mizo nihna chu a pan ta deuh a ni.

Engtinnge midangin an koh ang aw?: Tuna kan MP thlan tur Candidate pakhat Lalnghinglova Hmar hi lo tling ta se. (Official-in a hming entinnge a ziah ka hre hauh lova) a MP puite chuan engtinnge an koh ang aw ? Ka rin dan chuan “Mr. Hmar,” an tih ka ring a. Vai pakhatin min zawt ta se:
“Do you know Mr. Hmar?”
“No, I really do not know Mr Hmar. Do you know him?”
“He is the MP from Mizoram.”
“Oh, that Mr. Lalnghinglova? We call him Tete-a.”
“How do you pronounce his name?”
“You have to be a Mizo to correctly pronounce that!” Buaithlâk kan ti tawn khawp ang.

Pu Lalhriatrenga Chhangte pawh hi lo tling ta se, chutiang tho tur chu a nih hmel. Parliament-ah chuan “Lalnghinglova,” “Lalhriatrenga,” “Lalrosanga,” ni tawp mai se, Sitaramaiah te, Chattopadhaya te pawh an awm a, keini pawhin vai hming hi a dik takin kan lam thiam chuang lova, mi dang pawhin kan MP te hming pawh chu dik takin lo lam kher lo mah se kan vâia aiawh Mizo hming a nih hrim hrim chuan a
lawmawm tawkin ka hria.