TIRHKOHTE 2:4-13
(An zain Thlarau Thianghlimin an khat ta vek a, Thlarauvin a ṭawngtîr ang zêlin ṭawng dangin an lo ṭawng ta a.)
[5] Tin, vân hnuaia hnam tin zîng ata Pathian ngaihsak Juda-te Jerusalem khuaah an châm a. [6] Tin, chu ri chu an hriat veleh mipui an rawn inkhâwm a, mi tinin an ṭawng chu mahni ṭawng ṭheuhva an lo hriat avângin an rilruin an lo buai a. [7] Tin, an za chuan an mangang a, mak an ti hle a, “En teh u, hênga ṭawngte zawng zawng hi Galili rama mi an ni lo vem ni? [8] Engtin nge kan zaa kan ṭawng pianpui anga kan hriat ṭheuh? [9] Ṭhenkhat Parthai hnam te, Medai hnam te, Elamitai hnam te kan ni a; ṭhenkhat Mesopotamia rama awm te, Judai rama awm te, Kappadokia rama awm te, Ponto rama awm te, Asia rama awm te, [10] Phrugia rama awm te, Pamphulia rama awm te, Aigupta rama awm te, Kurini khaw kiang vêla Libua rama awm te kan ni a; ṭhenkhat Rom khaw khual- Juda-te leh an saphunte nên- kan ni a; [11] ṭhenkhat Kret thliarkâra mi leh Arab rama mi kan ni si a; nimahsela, Pathian thiltih ropuite an sawi, mahni ṭawng ṭheuhvin kan hriat si hi!” an ti a. [12] Tin, an za chuan mak an ti hle mai a, a ngaihna an hre lo va, “Hêng hi eng tizia nge ni?” an inti a. [13] Ṭhenkhatin an nuihsan a. “Uain thar an rui a nih hi,” an ti a.
Sawi Zauna: Thlarauvin a tawngtir ang zelin tawng dangin an lo tawng ta a, tih kan hmu a. Tawng hriat loh, tongue kan tih mai, 1 Korinth 14 a Tirhkoh Paulan a sawi vak, Thlarau thilpek zingami kha ni a ngai an awm a. Tawng dangin an tawng hrim hrim a ni thei a, Thiam miah si lo mahse Chinese tawng hmang ta chiam ang an ni, ti an awm bawk. Anmahni tawng Aramaic-in thu an sawi anga a, lo ngaithlatuten mahni pianpui tawngin an lo hre ta a ni, ti zawng pawhin a ngaih theih.
Israel fate thlalera hruai an nih hunlai khan Pathian Thlarau upa sawmsarihte chungah Pathianin a dah khan thu an sawi dual dual (prophesy) a ni tih kan hmu a (Numbers 11:25). Saula Israel lal atan Samuelan hriak a thih khan Saulan zawlneiho a tawk a, Lalpa thlarau nasa takin a lo thleng a, thu an sawi dual dual naah chuan a tel ve ta a, tih a ni bawk.
Engpawh nise, Thlarau an chunga a awmin an awmdan a danglama, in lungrualin thukhat an sawi ta dual dual tih chu a hriat theih a ni.
Zirtu thenkhat chuan Genesis 11 a ziak, Babel hunlaia tawngkhat an hmang thin Pathianin an tawng a tih hran saka an darh ta vek kha Pathianin a let (reverse) leh ta a ni, tiin an sawi. Isua avangin hnam hrang hrang, tawng hrang hrang, mi chi tin kan lo thuhmun ta, daidanna bang a chim a, Isua neitute chu chi khat kan ni leh ta tih lan nan tawng hrang hmang tawh pawh an lo in hriain an inzawm leh thei ta a ni. Chi tin zing a mi, hnam tin, tawng tin Isua-ah chuan chi khat an lo ni ta (Thupuan 7:9). Tunge i nih, khawi atanga chhuak nge, eng tawng nge i hman tih a pawimawh tawh lo. Pathianin Isua kaltlangin mi thar, new humanity a din ta a ni. Chung mite chuan thukhat an sawi ta. I tel ve em?
Pathian thiltih ropuite an sawi, mahni tawng theuhvin kan hre si a. Thlarau Thianghlima an khah takah chuan Pathian thil tih ropui an puang a, a lo ngaithlatuten an tawng ngeia sawiin an hre ta a ni. Eng tawng pawn Pathian kan chawimawiin a thu kan sawi thei a. Pathianin a sawitu leh ngaithlatu a zawm ta a ni.
Uain, zu an rui a nih hi, ti an awm bawk. Thil thuhmun hmu, thu ngaihthlak in ang reng pawh dawnsawn dan a in ang lo thin. Mihring hian tih dan than, sawi dan bik kan nei a, tah chuan kan in sawhnghet thin. Kan hriatthiam loh, kan tih dan loh thil hi chu kan sawisel a, kan nuihsawh vat thin. He mi tum hian Pathian Thlarau changtute an buai hran lo va, a lo hmutute, an tawng lo ngaithlatute an buai ta.
Uain thar an rui a ni. Zurui hi zuin a hneh, a control thin. Ama duh danin a awm hleithei lo, a ruih zuin a mah a hneh tawh a ni. Pathian Thlarau chuan Isua ringtute a hruai a, Isua kawng an zawh thin. Mahni duh dan a leng tawh mang lo. Thlaraua khat chu zurui zuin a control angin Pathianin anmahni a hruai thin a, midangte tan hriatthiam an har chang a awm thin. Isua i nuna a dal (dilute) apiangin mihring hmuhah fingin, fim hlein lang mah la Pathian mit hmuhah i tawngvai i tawngvai ve thung mai ang.
Ngaihtuah atan
13. Isua avang hian i ngeih loh tak ngeih tak, pawm tak i nei tawh em? Mi chi hrang hrang Isua avanga in lungruala Pathian fak leh chawimawihona-ah i tel ve tawh em, i hlut em?
(Thuthlung Hlui-ah chuan Israelte kha ‘Pathian mite’ tih an ni a. An zinga tel, Israel mi nih hrim hrim kha himna, malsawm dawnna a nihna chen a awm. Thuthlung Thar-ah chuan Isua ringtute kha Pathian chhungte a seng luh an ni ta thung. Mimalin Isua a rin a, Pathian Thlarau a neih khan mi eng ang pawh ni se, khawi hmuna piang, seilian pawh ni se Pathian mi a ni ta mai a ni. Chu chu amah nawr kaltu pawh a ni ta thung a ni.)
Engin nge nawr thin che, eng vangin nge i inkhawm thin?
14. I hriat thiam loh, i tih dan ni lo a ti i hmuh chang hian a dik leh dik loh Pathian Thu atangin i chian thin nge, i sawisel a, thiam loh i chantir nghal mai thin?
(Mi thiamloh chantir emaw, hnawl/ngaihsan loh hi kan thiam em em mai. Entirnan: min Pathian Thu thahnemngai takin an sawi a. Enge an sawi, a Biblical em tih lam pawh ngaihtuah tum lem lovin; ‘Pathian Thu hi chu sawi chiam aiin zawm mai tur,’ tiin, thil dik tho hmangin mi kan paih thla fel der thei a ni.)
Discover more from NUN HRUAITU
Subscribe to get the latest posts sent to your email.