TT Zirlai 1-na. Tirhkohte 1:1-5 — Dr. A. Zothansanga

TIRHKOHTE 1:1-5 MIZOVBSI

Theophil, hmâna lehkhaah khân, Isua thiltih leh a zirtîr ṭan tirh zawng zawng thu kha ka ziak a ni; [2] Thlarau Thianghlim ṭanpuia a tirhkoh thlante hnêna thu a tiam zawha vâna hruai chhohva a awm tâk ni thlenga thu kha. [3] A tuar hnuin tirhkohte hnênah fiahna rintlak tam tak hmangin nungin a inlâr a, ni sawmli zet an hnênah a inlâr a, Pathian ram thu a sawi ṭhîn. [4] Tin, an awm khâwm a pâwl ve a, “Jerusalem khua kalsan suh u, Pa thil tiam ka sawi in hriat kha lo nghâk rawh u,” a ti tlat a. [5] “Johana khân tuiin a baptis ṭhîn a; nimahsela, ni rei lo têan Thlarau Thianghlimin baptisma in chang ang,” a ti a.

Sawi Zauna: Isua thiltih leh a zirtir chungchangte chanchin tha bu pali-ah ziak a ni. Chu mi chhunzawmna chu Tirhkohte Thiltih bu hi a ni. Vawiin thlengin a la kal ta zel a ni. Ringtuten kan tih tur bul ber chu Isua thiltih leh zirtir chhunzawm a nih chu. Thil tam tak a karah zep thin mah i la kan tihtur ber, kan thupui ber hi hriat reng a tha khawp mai. Tin, kan thiltih leh kan awm dante hian Isua leh a zirtirna a puang chhuak thin em tih ngaihtuah thin a pawimawh bawk.

‘A tuar hnuin tirhkohte hnênah fiahna rintlak tam tak hmangin nungin a inlâr a, ni sawmli zet an hnênah a inlâr a,’ tih kan hmu a ni. A pawimawh khawp mai. Mi thenkhat chuan Isua kha thiin tho leh lo mahse a pawi lo, amah kan rin a, a thu kan zawm chuan a tawk mai, ti an awm thin. Kan rinna hi thil thleng tak tak, thiamna thang zel hmanga fiah tlak rinna a ni. Zeldin thu, thil phuahchawp ring kan ni lo. Thu tak ni lo, phuahchawp thu chu siam rem a ngai thin, a tlo lo. Kan rinna innghahna erawh hi chu thil dik tak, thil thleng ngei chatuana danglam ngai lo Isua thih a thawh lehnaah a innghat a ni.

Isua hian Pa thil tiam nghak turin a ti a ni. Bible a ‘nghak’ tih hian awm mai mai a, engmah tih loh a kawk lo. Rim taka thawk a, invawng leh insum chunga, nasa taka tawngtai a thil lo thleng tur, a lo thleng ngei dawn a ni tih hriat chianna nen lo in serh hran a, beidawng lo va lo in vawn lam a kawk zawk a ni.

Ngaihtuah zui atan;

1. LUKA 1:1-4 ah chuan;

Kha thil kan zînga lo thleng, a tîr ata a hmutute leh thu rawngbâwltuten keimahni min hrilh ang khân, mi tam takin ziak an tum ta a; [3] chuvângin, Theophil ṭha ber, a bul ata engkim fel takin ka chhui a, indawt zêlin i tân ziak ila a ṭha ang, ka ti a ni; [4] hmâna thu an zirtîr che kha dik tak a ni tih i hriat theih nân,‘ tih kan hmu a.

Tirhkohte Thiltih hi chanchin tha bu ziaktu Luka tho hi a ni tih hi i ring em?

2. Isuan a thih a, a thoh leh hnu khan vana lawn nghal mai lovin a zirtirte hnenah ni 40 zet nungin a in lar tih kan hmu a. Hei hi enge a pawimawhna ni a i hriat, eng thil nge a sawi thin, i bulah Isua hi mihring angin rawn awm se enge a sawi I rin, enge i zawh a i dil ang? Isua a tho leh tih hriatna hian harsatna i tawh changiin i nunah nghawng a nei em, i thlamuanpui thin em?

3. Isuan, ‘Pa thiltiam, promise’ a tih hi enge ni a i hriat? Joela 2:28, 29, ‘Chumi hnuah chuan heti hi a ni ang a, mi zawng zawng chungah ka thlarau ka leih ang a; in fapate, in fanuten ka thu an hril ang a, in putarten mumangah an mang ang a, in tlangvâlten inlârnate an hmu ang. Chûng nîahte chuan ka bâwihpate, ka bâwihnute chungah pawh ka thlarau ka leih ang,‘ tih hi a niin i ring em? Thuthlung Hlui bu danga Pa thiltiam ni thei in ziak dang hriat i nei em?