KHATIANG TÛR KHA ASIN MAW LE

Upa Lalduhoma

Delhi Mizo Inkhâwm hruaituten Jubilee Magazine atâna article thawh ve tûra min sâwm hi lâwmawm ka ti a. Min la hriat ve reng avângin lâwmthu ka sawi e. He sâwmna lehkha ka hmuh veleha ka mitthlaa lo lang ka han sawi hmasa ber teh ang: Kum tinin Committee Member tûr mi 7 kha kan thlang chhuak ṭhîn a. Pu C. Engliana kha thlan tlin a ni ve ziah leh nghâl a. Upa nemngheh ni ve tak tak si lo khân nemnghehho rawngbâwlna engkim mai kha kan khawih ve a ngai si a. Pastor hovin Sacrament sem tûrin kan han ding tlar pêt pâwt a, Pastor-in chhang a rawn sem ta a, Pastor thupêk nghâk hman lêk lovin Pu Enga pek khân a lo hmawm hman ziah ṭhîn kha a ni a. Chu chu ka mitthlaa lo lang hmasa ber chu zu nia.

Denomination hrang hrang khân inngeih takin Pathian kan beho va. A inhnim duh an inhnim a, a thlawra inthlawr duh an inthlawr mai a. Thurinah kan buai ngai lo a nih kha. Sunday School-ah Bible-a eng bu ber emaw hi vawi khatah kan zir zo mai ṭhîn a. A zirtîrtu tûra kan ruat khân a bu pum tawi fel takin min zirtîr mai a. Kum tluana bu khat zir ai chuan kan hlâwkpui mahin ka hria. Chhûngkua tê têa Biak ina kan ṭhuho ṭhîn kha a ṭha ka ti hlê bawk a. Inkhâwmnaa mikhual lo tel vête introduction kan pe thlap ṭhînte kha a tih chi hlêin ka hria. Inkhâwm bân apianga thingpui ruai kan kîlho ṭhîn kha a nuam a, kan inchibai sup sup ṭhîn a, inhmêlhriat nân a ṭangkai a. Kâr khata Zofate inhmuhkhâwmna remchâng awmchhun a nih avângin a hlu êm êm a ni. Kan thawhlâwmte pawh kha ṭha kan tih ang angin kan hmang mai ṭhîn a. Rawngbâwlna pêng hrang hrangah, a bîkin Ramthar lamahte khân kan thawh hlâwk ve khawp mai.

Khâng hun lai khân Delhi-ah Zofate min phuarkhâwmtu pâwl dang engmah a la awm loh avângin DMI kha tisa leh thlarauva min thlungkhâwmtu, chhiat ni ṭhat nia min thlamuantu awmchhun a ni. A hnu deuhah khân Delhi Mizo Welfare Association kha Lodi Colony-a kan Quarter aṭangin kan din ta kha a ni a. DMWA pawh hi atîr lam kha chuan DMI hruaitute tho khân kan hruai ṭhîn a. Tun thlenga nghet taka a la ding zêl hi lâwmawm ka ti hlê mai. Krismas leh Kum thar vuak vêta kan han zaikhawm ve te kha – Pu H. Thangkhûma lunglêng kha khuang nên a rawn thawk rawn thawk ṭhîn a, lêngkhâwm hla sa thiam kan tlêm si a, a titau zing ṭhîn hlê. DMI hi Mizo Theological Association thil tum, Kohhran Inpumkhatna (Ecumenical Movement) a taka nunpuitu a ni a. A inpumkhat lo zâwnga kan kal ta hi pawi ka tiin ka ui tak zet mai. Khatiang tûr kha asin maw le.

(Pu Lalduhoma hi IPS Officer niin Delhi-ah an rawn post a, DMI leh Mizote tân a ṭangkai ṭhîn hle. Politics lamah zuang lûtin MP te, MLA te a ni a; tûnah Mizoram Chief Minister a ni mêk. He thu hi DMI Golden Jubilee Magazine a a thuziak aṭanga lak a ni)