Rinna, Manifesting leh Kan Thuhnuaia Awm Lo Pathian – Robert L Chongthu – IAS

Ka khawngaihna i tan a tawk e; ka thiltihtheihna hi chak lohnaah asin tihfamkimin a awm ni,” – 2 Korinth 12:9
 
“I duh zawng chu han ngaihruat la, fiah takin han mitthla la, i nunah han la lut teh.” Hei hi tunlaia lar tak “manifesting” (ngaihtuahna, mitthla leh intihphurna hmanga duh zawng a taka chantir dan inzirtirna) in mi a hip dan bulpui, a bik takin The Secret (Rhonda Bryne lehkhabu ziah) in ngaihdan a pho chhuah chu a ni: rilru ngaihtuahna hian a milpui tawnhriat a hip ṭhin a, chu vangin hriselna, hausakna emaw hlimna lam ngaihtuah hian a tak a thlentir thei. A awmze sawi fiahna chuan hei hi “Law of Attraction” (Inhipna Dan) tiin a sawi a, ngaihtuahna thiltihtheihna chuan mi duh zawng a nunah a hip lut thei tihna a ni ber ang.
 
Word of Faith zirtirna (Rinna hi thlarau thiltihtheihna a ni tih zirtir pawl) ṭhenkhat chu hetiang deuh hi a ni ṭhin. Rinna leh thusawi te a ngai pawimawh viau ang a, ringtute chu rinnaa thu an sawi phawt chuan damna emaw hausakna emaw an dawng thei tih pawh a zirtir ang. An kalphung erawh a inang vek lo. The Secret chuan mimal ni lovin khawvel dan zawk a hmachhuan a: i duh zawng lamah i insawrbing chuan khawvel hian a chhang em em ang che. Word of Faith zirtirnate erawh Kristian hming an pu tlangpui a – Pathian, Bible, ṭawngṭaina leh Isua thutiam. Amaherawhchu an pahnih hian rinna emaw ngaihtuahna emaw hi kan duh zawng tihhlawhtlinna tur kawng ang lekah an chhuah ngawt chang a awm thei a ni.
 
Bible chuan rinna leh thusawite hian awmzia an nei tih chu a sawi ngei a. Isua chuan a zirtirte kha Pathian ringa huaisen taka ṭawngṭai turin a sawm a ni (Marka 11:22-24). Bible pawhin kan mamawh chu dil turin, beiseina nei turin leh midangte tichak thei thudik chauh sawi turin min fuih a. Beiseina nena thil thlir thiamna chuan harsatna kan hmachhawn danah te leh midangte laka kan khawsak danah te nghawng a nei thei a. Chutih rualin kan ngaihtuahna hian thil eng emaw lo thleng turin a hip tih emaw, kan thusawi hian hlawhtlinna a thlen tih emaw ring tlat turin a enga mah hian min phut lem lo a ni.
 
Rom 10:8-10 hi a chang chuan “word of faith” tih nen hian hmehbel a ni ṭhin. A sawina boruakah chuan Paula hian chhandamna thuchah chu a sawi fiah a ni mai a: Pathianin thihna ata Isua chu a kai tho a ni tih rinna leh Isua chu Lal a ni tih puan chhuahna. Hausakna emaw hriselna famkim emaw sawi chhuah dan tur a zirtirna a ni lo hrim hrim. Kristian thurin hi Isua nihnaah a innghat a, kan duhthusam nun sawi chhuahah chuan a innghat hauh lo.
 
Bible hian kan beisei ang chhanna kan dawn loh changa rinna lan chhuah dan pawh min entir. Gethsemani huanah khan Isuan tawrhna no chuan pel lul se tiin Pa a dil a. A duhna kha a thup hran lova, mahse “keia thu ni lovin nangma thu thu ni zawk rawh se” (Luka 22:42)tiin a ṭawngṭai a ni. A dil a hlawhtlin leh hlawhtlin lohvah a rinna kha a innghat reng reng lo.
 
Paula thil tawn pawh kha a chhinchhiah tlak khawp mai. A “taksaa hling” awm lak bo a nih theih nan vawi thum a ṭawngṭai a. Mahse lak bo a ni lo. Pathianin a chhanna chu, “Ka khawngaihna i tan a tawk,” tih a ni. Paula pawhin a chak lohnaah chuan Krista thiltihtheihna chu a lang thei a ni tih a hre thiam ta a. Hei vang hian tawrhna hrim hrim hi thil ṭha a ni tihna a ni lo a, treatment lak, inentir leh mi thiamte puihna pawh tihtawp vek tur tihna a ni lo bawk. Harsatna lo thleng hi Pathianin min kalsan ta daih tihna emaw, kan rin dan a dik ta lo tihna emaw a ni lo tih tifiahtu a ni mai.
 
Rinna hi hausakna kawng ang leka ngai lo turin Bible hian min hrilh bawk a. Paula khan Pathian ngaihsakna hi hlawkna nia ngaih theihna rilru kha a hnawl hmiah a, ringtute chu an neih ang anga lungawi thiam zel zawk turin a zirtir a ni (1 Timothea 6:5-8). Hei hian tumna neih te, rim taka thawh te leh malsawmna kan dawn avanga lawm te a khap chuang lo. Hausakna hi rinna dikzia pho lanna nia ngaihna te leh retheihna hi thlarau lama hlawhchhamna nia ngaihna te kha a dodal zawk a ni.
 
Kan thusawi hian mi a tiphur thei a, a thlamuan thei a, a bum thei a, a hliam thei a, a tichak thei bawk. Chu vangin khawngaihna leh beiseina nena thusawi hi a finthlak fo. Amaherawhchu kan ngaihtuahna emaw kan thusawi emaw hian thutawp neituah min siam chuang lo. Manifesting ah chuan kan insawrbingna mila lo inher rem ve mai ṭhinah kan universe hi a ngaih theih a. Word of Faith zirtirnaah chuan dik taka thusawi mil zela lo inher rem ṭhinah Pathian hi a chhuah daih theih. Bible erawh chuan chutiangin a sawi si lo: Pathian chuan ṭawngṭaina a ngaithla a, thilthlawnpek ṭha tak tak min pe a, a finna ang zela kan ṭawngṭaina chhang turin zalenna a nei.
 
Damna te, mamawh phuhrukna te leh danglamna hrim hrim te pawh Pathian chuan min pe thei a ni tih hre chiangin kan dil thei a. Kan hmalam hun kan tichhe vek lo a ni tih hre chiangin kan hlauhna, kan natna leh kan lungawi lohna te pawh kan sawi thei. Bible in a sawi rinna hi engkim a ṭha vek anga lantir lam a ni lo va, thu ṭha sawi hmanga kan nun her rem tum lam pawh a ni lo. Kan tih theih bak thila Pathian rinna hi a ni: “Pathian chuan a thei, Pathian chu a ṭha, min chhanna pawh a kutah ka dah anga, ka ring tawp ang.” Chu rinna chuan thilmak a dil ngam a, a dil ang a lo thlen loh pawhin a nghing chuang lo. Chak lohna a la nei cheu a nih pawhin a tan Pathian khawngaihna a tawk a ni tih thutiamah chuan hahdamin a chawl thei bawk ang.