Bible Hian Chhan Nei Lova Thil Thleng Hi Awm Theiin A Sawi Em? – Robert L Chongthu IAS

“…mi chak chu a hlawhtling chuang lo va, indonaah mi huai a hlawhtling chuang hek lo…mi zawng zawng chungah hun leh khawrel ang angin a thleng mai zawk tih ka hmu a” – Thuhriltu 9:11
 
Mi tuin emaw a rel chuanna tur a nang hman lova, mahse a nun thlak danglam daihtu mi a tawng hlauh a. Mi dang leh chuan a hun takah in a chhuahsan a, mahse rel chetsualnaah a tel hlauh thung a. Chhungkaw pakhatin chanchin lawmawm an dawng a; pakhat ve thung chuan natna chungchang chanchin lawmawm lo. He’ng thil thlengte hi vanneihna emaw, vanduaina emaw, chhan hranpa awm lova thil thleng pangngai ve reng emaw tiin kan sawi ṭhin. A nih leh Bible hian Pathianin a enkawl khawvelah hian chhan hranpa awm lova thil thleng pangngai ve reng hi a awm theiin a sawi em?
 
Thuhriltu chuan chhanna tlang tak a pe mauh mai. A tlan chak ber chu a hlawhtling reng bik lova, sipai chak berte pawhin an do apiang an hneh zel lova, mi fing pawh an ding chang reng chuang hauh lo. An “…chungah hun leh khawrel ang angin a thleng mai zawk…” a ni (Thuhriltu 9:11). A ziaktu hian duan lawk sa ang zelin hringnun hian mite a chawi sang tih lam zawngin thu a thluk duh miah lo. Thil thleng tam zawk hi chu kan sawi lawk theih emaw kan tihdanglam theih emaw piah lama thleng an ni.
 
Hetia tlang taka a sawi mai hi a pawimawh lutuk. Thil thleng apiang hi a chhan zawng zel tura thlem kan ni fo. Mi tu emaw a lo hlawhtlin chuan Pathianin a duhsak a ni mahna kan ti. Mi tu emawin a tawrh chuan thil a tidik lo a ni mahna kan ti. Mahse Bible chuan hetiang zawnga thil ngaihtuah hi a duh lo tih a tilang nawn fo.
 
Pilata’n mi a tihhlumte chungchang Isua an hrilh khan chu’ng mite chu midangte aia sual bik an nih leh nih loh a zawt kher a. Thil thleng rapthlak tak dang a kawhhmuh a: Siloam in sangin mi sawm leh pariat a delh hlumte chungchang. He’ng thil thlengahte hian a tuartute khan mi dangte aiin tawrh an phu zawk a ni tih ngaihdan kha a hnawl ve ve (Luka 13:1-5). Chutiang zelin a zirtirten mi pakhat mit del chhanah tu sual nge ni tih an zawh khan Isuan an chhanna rawn dah sate kha a hnawl ve ve (Johana 9:1-3). Thil tha lo lo thlengte hi a awmzia kan zawn tur thuruk an ni vek lem lo.
 
Joba bu hian he thu tho hi thui deuh zawka sawiin a chai a. Joba thiante khan a tawrhna kha dik leh dik lo bukna atanga thlirin awmze nei turah an ngai tlat a. An hnialkhante kha awmze nei tak, a then phei chu Pathian thu ang hialin a lang awm e. Mahse Pathian chuan a chungchanga thu dik lo an sawi avangin a zilhhau a nih kha (Joba 42:7). Joba khan eng vanga tuar leh chan nge a nih tih kha chiang takin a dawng lem lo. A tawrhna kha a phu reng a ni tih pawm kher lova lu a sun te, zawhna a neih te kha Bible chuan a phalsak a ni.
 
Chutih rualin Bible chuan Pathianin min ngaihtuahna chungchang a sawi reng bawk. Thufingte chuan, “Mal chungah ṭhum an vawr a, thil lo chhuak erawh chu Lalpa tih a ni” (Thufingte 16:33) a ti a. A unauten an phatsanna chungchang thlir letin Josefa pawhin, “Nangni zawngin ka chungah thil sual tih in rilruk a; nimahsela, Pathian chuan…thil ṭhaa chantir a rilruk zawk a lo ni si a,” (Genesis 50:20) a ti. He’ng Bible changte hian mihring tih rual lohte hi Pathian tih phak loh an ni chuang lo tih huaisen takin an puang a ni.
 
Hetah hian thu inhmu rem chiah lo a awm thei a, chu chu awlsam taka sawi rem tum lo tura kan fimkhur a ṭul a ni. Vanneihna leh vanduaina zawng zawngah a phena Pathian thiltum lo puang zung zung turin Thufingte hian phalna min pe hauh lo. Josefa khan a thil tawn avanga mi tam tak nunna chhanhim a ni tih a hmuh hnu, kum tam tak hnuah a chanchin kha a sawi thei chauh a ni. Mi, lusun lai mek chuan chutiang chu a hmu pha ve kher lo ang. Pathian rin leh a thil ruahmante hre thiam anga inchhal theih hi thil danglam daih an ni.
 
Chhan hranpa nei lova thil thleng pangngai kan tih awmziaah hian zawhna chu a innghat mahna. Thil thleng tam tak hi chuan kan tan chhan hranpa an nei lo ang: kan hmu lawk thei lova, kan tidanglam thei lova, mi pakhat chunga thleng siin mi dang chunga a thlen loh chhan pawh kan sawi fiah thei lo. Hei hi chu Bible pawhin zahthlak a ti lo. Pathian tan hian chhan hranpa nei lova thil thleng pangngai hi a awm reng em tih hi zawhna ril zawk a ni ang. Bible chuan min ngaihsakna leh a thiltihtheihnate chu a tichiang ngei a, mahse a thiltum, mihringte duhthlanna leh khawvel kalphung pangngai te inzawmna zawng zawng erawh min pe hauh lo mai.
 
Chu vangin Jakoba chuan hma lam hun atana ruahman lawkna siamte chu hma lam hun an hriat tlemzia theihnghilh lo turin a chah a (Jakoba 4:13-15). Hei hi ruahman lawkna siam lo tura intihna lam a ni hran lo. Inngaitlawm tak chunga siam tura tihna a ni zawk. A tawp dan turah thu kan nei lo a ni tih pawm chung zelin fimkhur takin kan che ang a, fing takin kan ngaihtuah ang a, midangte pawh ngaihsak pah zel ang.
 
Kristian tan chuan he inngaihtlawmna hi khawngaihnaah a chang thei bawk a ni. Mi tuin emaw a lo tawrh chuan kan tih hmasak ber tur chu thil thlen chhan sawi emaw Pathianin mihring a ngaihsakna lam ṭan zawnga sawi emaw lam a ni lo. Kan tih tur chu tawrhpui te, kan theih anga ṭanpui te leh mawhpuh tur zawnsak loh te an ni. Kha mitdel pawh kha sawi fiah ngai thil ni lovin, enkawl mamawh mi a nihna Isuan a hmuh daih mai kha.
 
Bible chuan ruat lawk loh intawnna emaw, thil ṭha lo lo thleng thut emaw awm hauh lohna hringnun min tiam lova. Thil harsa zawk mah min chhawp a ni: hringnun hi sawi lawk theih a ni lo tih pawm phalna, thil ṭha lo lo thlen chhan hria anga lan tumna laka vau lawkna, leh eng nge a tih pawh hmu thiam lo chunga Pathian rin tlatna. Thuhriltuin “hun leh khawrel ang ang” a tih leh Thufingtein Pathian a rin ngam tlatna karah hian eng pawh hmachhawn thei tura inhawngin kan nung a ni.