Kawng Zawhna – 2

Vaivut II

Tu-ah nge i rinna i nghah? Tu nge i ngaihsan a, a bula ni tlem te pawh awm tura eng pawh sen i inhuam chu?

Ṭawngkam dangin sawi ta ila “Tu nge i rabbi (zirtirtu) chu?”

Nazareth Isua hi hringfate zinga eng mawi ber nia ngai mi tam tak zingah kei ngei pawh hi ka tel ve a. Lehkha chhiar nuam ti tak ka ni a, ngaihtuahna ril hman kawnga khawvela a ber kaite titi kotlangah an lehkha ziak hmangin ka lo dak ve tawh ṭhin. An vaiin mize fak tlak tak tak an nei vek (fak tlak loh tak tak nei pawh an awm tho e). Mahse ka upat telh telh a, ka inzir zau telh telh hnu thleng pawh hian Isua han el pha reng hi hmanlai mi leh tunlai mite-ah pawh an awm lo a ni tih hi ka pawm nghet ta telh telh mai. Ka hmuh danah chuan Isua leh a Kawng min kawhhmuh anga felfai, ril leh chhungril khawih thei hi he khawvela eng ang mi ril, mi fing, hruaitu, finna thuril leh ngaihtuahna mah hian an nei ve lo a ni. A mawina kawngah phei chuan tehkhin rual an ni lo.

Kan tunlai khawvelah hian rinhlelhna, phur lohna, roreltute rin theih lohna leh mahni duh dan leh nuam tih zawng mila thudik her remnain kan chheh vel boruak hi a khat mup mai a. Chutiang boruakah chuan kan zavai mai hian ringhleltu Thoma kan ni vek mai.

Mahse Isuan “…chutiang chu ka ni” a tihte (rabbi chauh a ni lo a nia) kha ihe lova ka pawm theih chiah loh ni a lo thlen pawhin rin chu ka duh tho. Pathian lalrama nun awm dan tur Isuan min kawhhmuh kha thleng dik se ka duh. Zirtir Petera’n thu tlang a kawmna ang rau hi ka man fuh ve niin ka hria:

            “Lalpa, tu hnenah nge kan kal ang? Nangin chatuana nunna thu i nei alawm.”

Tun hun leh hmanlai aṭanga he thu: “Isua min kawhhmuh kawng, thutak leh nunna aia ṭha hi a awm lo” tih pawmtu khawvel hmun hrang hranga mite kiangah hian ka ding ve (ka kal ve a ni mah zawk) a ni.

Duhthlan tur tam tak ka neih zingah ani hi zui tura ka thlan chat chu a ni. Tu emaw chu ka zui tho tho dawn a, chu vangin Isua zui hi ka thlang ta a ni.

Philosopher Dallas Willard khan heti hian a ti ṭhin, “Isua ke bula inzir nihnain a tihfel zawh loh harsatna hringnunah hian a awm lo.” Isua zui, emaw a ke bula zir, hi he hringnun harsatna kan tihte chin felna kawng chu a ni. I harsatna chu han sawi mah teh: politics tui nu vanga inhuatna, khawvel sik leh sa danglam, indopui thawm thang, rilru hriselna tlahniam nasa, ngawl veina, firfiak taka Kristian ram tun din tumna, Kristian sakhaw hruaitute nun dazat chho zel, ngilneihna kan tlachham ta lutuk…

Isua ke bula inzir nihnain a tihfel zawh loh harsatna hringnunah hian a awm lo.

Isua zuitu nih i lo tum rilru tak tak a, mahse i zawh tur kawng chu chiang lehzuala hriat i duh avangin he lehkhabu hi i lo chhiar a ni mai thei. Tihdan fing tak a ni; Isua pawh khan amah zui duhtute kha a zirtir nih avanga an kalsan ngaite kha hre chiang hmasa turin a ti ṭhin. 

A nih loh pawhin Kristian i ni tawh sa reng a, mahse i rinna hi ngunthluk lehzuala vawn duhna i thinlungah a lo awm a – Isua zirtir nih i duh tak tak a. I thlarau nun hmasawnna kawngah tumruhna thar neih i duh a. Awmze neia nun i duh tawh a, thle vel mai mai lovin.

A nih loh pawhin rei tak Isua zui tawhtu i ni a, mahse tunah chuan hmasawn tawh lo riauvin i inhria a. I tang laklawh a, chhungril damna thlahlelin tal chhuah i duh em em a. Isuan “nunna, nunna tak tak” a tih chu i nuna pawh phak ve i duh a. Ṭawngkam dangin sawi ta ila, mi thianghlim nih i duh a. 

Tu pawh lo ni la, eng vang pawhin he lehkhabu hi lo chhiar ni la, ka lo lawm a che. I lo kal ve chu ka lawm khawp mai.

Kei hi Isua zuitu ka ni a, ka puitlin hun tam zawk hi chu Kristiannain a awp tawh loh Khawthlang rama Isua zuitu nun chungchang chhui nan ka lo hmang tawh a. Isuan nunna Kawng min kawhhmuh a nei a, chu kawnga kan inpek a, a tawpah amah Isua hnena kan inpek phawt chuan kan chhungrila kan chak ang nun chu kan thleng thei ngei dawn a ni tih hi ka ring nghet tlat tawh a ni.

He lehkhabu pawh hi kum tam tak tawnhriat, tihchhina tihsual nawk nawk, hlawhtlinna aia hlawhchhamna tam zawk leh hringnun tluk leh tlak fawma inzirna aṭanga lo inzial mum ve a ni a. Mahse lehkhabu chhah satliah a ni hauh lo a nia; hringnun chanchina thusawi pawimawh bera ka ngaih, thumal pathum lek chhui chianna leh sawi zauna mai an ni:

“Mi zui rawh.”

Mi tam tak rin dan ang lo takin Isua khan mite hi Kristiana inlet turin a sawm hauh lo. Mite kha Kristian ni tur pawhin a ko lo (chhiar zel phawt la…); mite kha a ke bula inzir turin a sawm a, chumi hmang chuan nun thar an nei thei dawn a ni. Danglam turin a sawm a nih chu.

Ka rin dan chu ho te a ni: Isua tih dan, a nunphung leh a thudik sawite mila kan nun hi kan her rem duh a nih phawt chuan danglamna hi thil thleng thei a ni a, he’ngte hmang hian Pathian thiltihtheihnaah kan intulut dawn a ni. Heti zawng pawh hian a sawi theih, Isua ke bula zirtu nih kan duh phawt chuan tihdanglam theih kan ni.

Chutah chuan, chutah chauh chuan, kan nih tum ang mi te kan ni thei ang a, kan nun tura ruahman sa nun ang te chu kan nung thei dawn a ni.

Chu chu lo ni ta se, engtik lai pawha Isua “zui” ṭawngkam hi kan hre fo ṭhin. Hei hi eng nge a awmzia tak tak?

A awmzia chu a Kawng zawh a ni.