Thuhmahruai
‘Zirtir’ nge ‘Kristian’?
He lehkhabu hming hi Zirtir Inpumpek/The Radical Disciple tih a nihna chhan hi ka’n sawi fiah ang e.
A hmasa berin, engati nge ‘zirtir’ tih a nih?
Thuthlung Tharah hian Isua Krista zuitute kha ‘Kristian’ tiin tum thum chauh koh an ni tih an hriat hian mi tam tak chuan mak an ti a.
A lanna pawimawh ta ber chu Luka’n Syria rama Antiokei-ah Isua zirtirte hi ‘Kristian’ tiin koh an ni hmasa ber tih a sawi kha a ni (Tirhkohte Thiltih 11:26). Antiokei kha mi chi tin awmna hmun a ni a. Chutiang zelin a chhunga kohhran pawh kha mi chi tin awmna a ni a, chu vang chuan a member te kha ‘Kristian’ tia sawi chu a awm viau mai, Krista zuitu an nihna khan chi leh rawng avanga an danglamna zawng zawng kha a hliahkhuh vek tihna a ni si a.
‘Kristian’ tih thumal lanna dang pahnihte hian he hming hi hman tlanglawn a ni chho tan tih a tilang a. Chu vangin Lal Agrippa hmaa Paula chungthu ngaihtuah a nih a, a thiamthu a sawi khan Agripp khan, “Rei lo te chauh thlema Kristiana mi siam i tum a nih hi” (Tirhkohte Thiltih 26:28) a ti hial a nih kha.
Hei bakah hian Tirhkoh Petera khan a lehkhathawn hmasa ber, tihduhdahna nasa chho zel kara a ziakah khan misual nih vang hrim hrima tawrhna leh Kristian nih vanga tawrhna chungchang kha thliar fel thlap tul a ti riau a (1 Petera 4:16); Kristian chu Krista ta a nihna lang se a duh a ni. Heng thumal pahnih (Kristian leh zirtir) te hian Isua nena inlaichinna nei tih an kawk a, ‘zirtir’ tih hi a fiah zawk mah mai thei e, a chhan chu zirtirtu leh zirlai inkara inlaichinna a kawk tel zawk tlat. Isuan kum thum rawng a bawl lai khan Sawm leh pahnihte kha tirhkoh an nih hmain zirtir an ni a, zirtir an nih angin an Zirtirtu leh Lalpa kaihhruaina hnuaia awm an ni.
He thumal ‘zirtir’ tih hi a hnu zelah hman ni chho ta zel se chu kawng tam takah chuan duhthusam a ni ang maw le, Kristiante hian Isua zirtirte kan nihzia hi kan vawng tlat ang a, a kaihhruaina hnuaia awm kan nihnate hi kan ngai pawimawh zel bawk ngei ang a.
He lehkhabua tarlan ka tum deuh ber pawh hi kan Lalpa Isuan, “Tin, nangnin eng atan nge, ka thu zawm si lova, ‘Lalpa, Lalpa’ mi tih thin?” (Luka 6:46) a tih leh ngaia keini a zirtir intite hi kan awm lohna tur atan a ni. Zirtir nihna tak tak chu thinlung zawng zawnga zirtir nihna a ni a, hetah hian ka thumal sawi tur dawt lehah ka kai chiah ang.
Tichuan, engati nge ‘radical’(inpumpek) chu? He adjective hi zirtir kan nihna sawi fiah nana ka hman a nih avangin ka hman dan hi sawi fiah pawh a tul ang.
Saptawng thumal ‘radical’ hi Latin radix atanga lak a ni a, zung sawina a ni. A tirah chuan kum zabi sawm leh pakuana politician William Cobbett leh a liberal leh reformist ngaihdan tawmtute sawi nan an hman thin ni awm tak a ni. Hemi atang hian a zung phawka ngaihdan siam a, an inpekna pawh inpekna pumhlum ang chi ho sawi nan hman chhoh a ni ta a ni.
Tunah chuan noun leh adjective te chu dah kawpin kan zawhna pathumna kan zawt tawh ang, engati nge ‘radical disciple’ (zirtir inpumpek) kan tih? A chhanna chu a chiang reng. Kristian awm khawmah hian inpekna dinhmun a inang lo hlawm khawp mai. Buh chi thehtu tehkhin thuah khan buh chi chunga thil thleng hmangin Isuan hemi chungchang hi a lo sawi tawh kha. Buh chi chunga thil thleng danglamna chu an tlakna leia innghat a ni. Pialtlepa tla chungchangah Isuan, “Zung an nei lo” tiin a sawi a.
Radical disciple/Zirtir inpumpek nihna kan pumpelh dan chu duh thlanna hmangin a ni tlangpui; kan tana remchang laiah kan inpumpek a, channa tur a awmna lai chu kan pumpelh zel. Mahse Isua chu kan Lalpa a nih si chuan a thuneihna hnuaia kan zawm tur china duh lo thlan chu kan tih loh tawp tur a ni si.
Chawimawina leh thiltihtheihna
Dawn hi Lal Isuan a phu
Malsawmna hringmi pek theih bak
I ta ni se chatuanin
Tichuan he lehkhabua ka tum ber chu Kristiante zirtir kan nihna kawng pawimawh tak pariat, kan ngaihthah fo mahse kan lak thutak viau ngai lawi si te chhui chian hi a ni.
(chhunzawm tur)
* John Stott (1921-2011) chu British Anglican pastor leh theologian a ni thin a, khawvel evangelical movement a pa langsar tak leh hruaitu hlun ni reng thin a ni e. He thuziak hi a lekhabu, The Radical Disciple. Some Neglected Aspects of our Calling, kum 2012 ami niin, a letlingtu hi Vanlalropuia Vanchhawng ani e.
Discover more from NUN HRUAITU
Subscribe to get the latest posts sent to your email.