Tiam Tlat E (I Married You) XXIX– Walter Trobisch

Bung 8 chhunzawmna

Hmanhmawh taka chawchhun ka fak hnuah Timothy-a leh Miriam-i te chu ka room-ah an lo lut chho a. An chet vel danah pawh mahni inrintawkna an nei deuh tawhin a lang. Sofa-ah an ṭhut dun hnu chuan Timothy-a chu a ṭawng hmasa zawkah a ṭang a. Chu chu an lo tum lawk dan pawh a ni tih a lang.

‘Kan sawi dun tawh a,’ a ti phawt a.

‘Khawiah?’

‘Ka unaupa inah.’

‘A nih chuan inhmuh theihna hmun chu in lo nei reng a ni maw.’

‘Lo nei reng e,’ nui chungin a ti a. ‘Kan sawi dun a, nimina Miriam-in sex kawngka aṭangin triangle kan lut a tih kha a dik chiah lo deuh tih hi kan thutlukna a nia. Hmangaihna kawngka aṭang pawh khan kan lut tel tho a. A pahnih inkarah khan kan then kual ta vel mai mai a. Case special deuh kan nih hi, angle pahnih inkara lut case.’

‘Zaa sawmkua leh pakua chu angle pahnih inkara lut case special deuh kan nih dawn chu a.’

‘Kan intawn tirh khan hmangaihna chu a awmin ka hria, hmangaihna dik tak. Chu vangin i tih dan takin hmangaihna kawngka aṭang chuan kan lut ngei alawm. Mahse a chhunga kan han lut chiah kha sex kawngka lamah kan kal ta daih a. Kan luh dan kha kan theihnghilh chhawm chu a ni titih ta mai a. Engtin nge ka sawi thiam ang aw? Tisa pumkhat chu kan ni a, mahse kan pumin kan ni lo. Kan rilru inpe tawn si lovin kan taksa kan inpe tawn a. Chu chu kan hriat chhuah veleh hmangaihna lamah kir leh kan tum a. Mahse a kawngka kan va zawng hmu thei tawh lo a ni.’

‘ “Aih” ka ti ngam tawh lo a,’ Miriam-i chuan a rawn ti ve ta a. ‘Hmangaihna chu “Aih” tih ngai miah loh hi niin ka ngai a. Zah vanga sen awp awp te kha ka zak tawh a ni.’

‘I zak sen awp awp thei reng Miriam,’ ka lo ti a. ‘Nimina thil mawi vak lo in sawi lai khan ka lo hmu reng alawm.’

‘I “Aih” te leh i zak sen awp awpte chu ka zah thiam deuh tawh ang,’ tiin Timothy-a chuan a aw a hriat thiamna thar nen a lo ti ve bawk a. 

‘Aw le,’ ka ti a, ‘ti hian a natna chu kan hmu chhuak ta a. Engtin nge kan tihdam ang le?’ 

‘Zawhna pahnih kan nei a,’ Timothy-a chuan a ti a. An lo sawi dun fe tawh tih a lang chiang lehzual. ‘Zawhna pakhatna chu: Kan kum, kan zirna leh kan miziaa danglamnate avang hian kan innei tluang lo ngei ngei turah i ngai em?’

‘Ka ti ngam lo. A ngei ngei ang zawng chuan. Tluang takin innei ula chu midangte tan pawh testimony ṭha tak a ni zawk dawn asin.’

‘Eng nge i sawi awmzia chu?’

‘In inneihna chu a mipa zawkin a hmeichhia zawk chu a hnuaichhiaha, nau paitu ringawta a ngaihna “huan inneihna” ang a nih lohzia a lang ang a. Miriam-i hi huan ang a ni ngai lovang a. Kawppui angin a nei thei che a nih loh chuan pasal a nei lo tawp law law ang a. In vela miten chu chu an hmu vek ang a. Chu chu “testimony” ka tih awmzia chu a ni e.’

Timothy-a chuan, ‘Mahse…’ a rawn ti a.

‘Eng nge “mahse”?’

‘A, kan inneihna hi a tluang lo ngei ngei ang tih i ring lo tih kha i sawi a, a hlawhtlin phei chuan testimony a ni thei tih i sawi bawk a. Chu vang chuan “mahse” tih a awm ka ring ringawt a.’

Ka nui lo thei lo. ‘A dik alawm, Miriam-i hian nachang a hriat loh a, a inven thiam loh a, a sang zawk a ni tih a tihlan fo leh nangin mahni inphatna leh inphah hniamna neia a chang changin nang aia thleng sang a ni tih i pawm ve loh chuan in inneihna chu chhe thei dinhmunah a ding ang. Hei hi sabengtung hnungzang ruh titliak thei phurrit chu a ni dawn a ni. A lo berah in inpekna nasa tak chu a ngai dawn hrim hrim.’

‘Chuti chu kan tlinin i ring em?’ titak zetin Timothy-a chuan min zawt a, Miriam-in a kut a lo dawm a.

‘Hlauhawm a awm tih hriaa a nihna ang taka in lo hmachhawn tawh chuan a zatve zet chu in lo hneh tawh tihna a ni a. Mahse thil ropui ti tur chuan chu aia nasa deuh chu a la ngai.’

‘Mahse mi pangngai mai kan ni a. Keimahniah ropui engmah a awm si lova.’

‘Mi ropui in ni lo, mahse Pathianin thil ropui tak tih nan a hmang duh mai thei che u asin.’

‘Kristian kan nih angin kan cho ngam ang i tihna em ni?’ Miriam-i chuan a rawn ti a.

‘Ka sawi awmzia chu Pathian zawm tlat nun in neih a pawimawh ang tihna.’

An ngawi vang vang a.

Timothy-a chu ṭawng hmasaah a lo ṭang leh a, ‘Ti hian kan zawhna pahnihnaah kan lut ang a. Bul ṭan ṭhat leh theih a ni ang em?’

‘Eng nge i sawi awmzia chu?’

‘A bul ret aṭanga ṭan ṭhat, triangle chu la lut hauh lo ang takin. Hmangaihna kawngka chu zawi zawia panin, chuta ṭang chuan a bawhkan hauh lova a kil dang pahnih pan turin.’

‘A sawi awmzia chu,’ tiin Miriam-i chuan a tihdan ṭhina thu khuh awm lem lovin a rawn tuihnih a, ‘lo kal thui viau tawh mah ila tun aṭang hian kan inneih hun thlengin mipat hmeichhiatna hmang tawh lo ta ila a tihna a nih chu?’

‘Thil awlsam chu a ni lo tawp ang, in lo tem tawh chuan thlemna kha a nasa lehzual dawn a. Mahse thil theih loh tawp chu a niin ka hre lo. Mihring chakna chauh chuan cho rual a ni lo ang. Khawngaihna danglam tak – thiltihtheihna mak tak a ngai ang. Midang ti thei pawh ka hmu tawh, hmuh phei chu.’

‘Chu’ngte chu engtin nge an awm zel?’

‘An inpawhna a thuk telh telh tlangpui a. Mipat hmeichhiatna an dah bo chiah khan inhriat chianna thuk zawk an neih theih phah a. Chutiang tur chuan puih pawh an inpui nasa khawp mai.’

‘Engtin nge kan inpuih theih ang?’ Miriam-i chuan a hre duh a.

‘Dinhmun ṭhenkhat chu in pumpelh hlauh a ngai ang. Entir nan, zanah motor-ah inphur tawh lo ula. Nupa dangte nen leng ho ula. Thudik ṭan tlat ula. Thil mawi lo pui chu mawi ti tlat lo ula.’

‘Chu’ng chuan buaina a siam dawn lo’m ni?’

‘Siam dawn chiang e. Lo siam pawh ni se eng nge pawi? Tunlaia mipat hmeichhiatna vanga buaina tam ber chu miin natna, hnialkalhna leh harsatna te hi engti pawha pumpelh tur emaw an tih tlat tawh vang a nia. Harsatna hi kei chuan thil ṭhaah ka ngai asin. Puitlin zelna leh ṭhan chhohnaa bet tlat a ni a. Engtik ni-ah emaw chuan harsatna kara in din tlang a ngaih hun a lo thleng ang – chumi lo inzirna hun atan chuan inneih hma hi a ṭha khawp mai.’

‘Inneihna chhungah pawh harsatna chu a awm zel em ni?’

‘Awm zel e. Inneih hmaa harsatna kara din lo la zir ve lote chuan inneih hnuah harsatna lian tak an tawk ziah ṭhin.Triangle-a angle pathumte inkarah khan harsatna a awm vek: sex leh hmangaihna inkarah, hmangaihna leh inneihna karah, leh inneihna leh sex karah. Puan in ang mai a ni. A kaihna inkarah a puan chu kaih mar a nih chhung chuan tui a far lovang. Mar taka inkai chu a lo dul veleh puan in chu a tlu dawn mai ṭhin.’

Timothy-a leh Miriam-i chuan engmah an sawi tawh lo. Min mangṭha a, kut insuih rialin an haw dun ta a.