Tiam Tlat E (I Married You) XXII– Walter Trobisch

Bung 6 chhunzawmna

3. Zahderna fiahna

‘Zahderna tel lovin hmangaihna a awm lo, kawppuite dah san theih lohna nen.

‘Hmeichhiain mipa inkhel lai a en a, a han pet goal te hian a lo ngaisang fu mai thei. Mahse he zawhna hi han inzawt ta se: “He pa hi ka fate pa atan ka duh em?” a chhanna chu a duh loh thu a ni daih mai thei.

‘Mipain hmeichhe lam darh darh lai a thlir chuan a lo ngaisang viau mai thei. Mahse he zawhna hi han inzawt ve ta se: “He nu hi ka fate nu atan ka duh em?” a hmuh dan a dang leh daih mai thei.

‘Kan fiahna pathumna chu hei hi a ni: Inzahder tawnna tak tak kan nei em? Ka kawppui hi ka chhuang em?

4. Tihṭhan fiahna

‘Ṭum khat chu European nula, pasal hual nei tawh hi lungngai deuhin a lo kal a: “Ka pasal hual hi ka hmangaih tak zet, mahse a apple ei ṭhin dan mawlh hi ka ti thei lo,” a rawn ti mauh mai.

Mipuite chu hre thiam takin an nui dar dar a.

‘Hmangaihna chuan a kawppui chu a tihṭhan thil zawng zawng nen a pawm vek. He’ngte hi nakinah an la danglam vek thei ang tiin beiseina nen nei ngawt suh. A danglam lo zawk fo. I kawppui chu a nihna ang ang khan i pawm mai tur a ni, a tihṭhan dan leh a tlin lohna zawng zawngte nen pawh.

‘Chu vangin kan fiahna palina chu hei hi a ni: Kan inhmangaih ringawt nge kan inngaina tawn?

5. Inhnial fiahna

‘Inneih duha min lo pan apiangte hi vawi khat tal inhnialna tak tak an nei tawh em, ngaihdan inang lo thu hla ni ngawt lo, inhauhna tak tak an nei tawh em tih hi ka lo zawt ziah ṭhin.

‘A tam zawk chuan: “A teuh lo mai Pastor, kan inhmangaih alawm,” tiin min chhang ṭhin.

‘Chutah chuan heti hian ka ti ṭhin: “Inhnial vak phawt ula ka inneihtir ang che u.”

‘Ka tih chhan tak chu a inhnial hrim hrim lam ni lovin inhnial zawh hnua inngaihdam leh theihna kha a ni. He theihna hi inneih hmain lo zir lawk a, lo infiah lawk ngai thil a ni. He inhnial fiahna hi inneih hmaa lo tawnhriat ngai a ni zawk, mipat hmeichhiatna ai pawhin.

Chu vangin fiahna pangana chu hei hi a ni: Kan inngaidam tawnin a tlawm zawkah kan ṭang thei ve ve em?

6. Hun fiahna

‘Vawi khat chu la naupang dun ve tak hian inneih duhin min rawn pan a. “Engtia rei nge in inhriat tawh?” tiin ka lo zawt a. “Kar thum chu a ni tawh, kar li a ni ṭep,” tih chu ka chhanna dawn a ni.

‘Hei hi chu a la rei lo lulai lutuk. A tlem berah kum khat tal a nih a ṭul ka ti ve tlat. Kum hnih phei chu ni se a la him hlei hlei. Chawlh muan lai leh Pathianni thuam nen chauha inhmu lovin kan hnathawh hah lai te, kan ni tin nun te, hmuihmul met hman lo leh intuai fai hman lo te, lu su hman lo leh sam pawh siam mumal hman lo te, hun hrehawm leh hlauhawm deuh kan tawn laite hian kan inhmuh hi a ṭha a ni.

‘Thufing upa tawh tak pakhat a awm: “I kawppui chu nipui leh thlasik i hmanpui zet hma chuan nei ngawt suh.” I hmangaihna chungchangah chian ngam lohna i nei a nih chuan hunin a la rawn hril dawn alawm.

‘Chu vangin hei hi fiahna hnuhnung ber chu a ni: Kan hmangaihna hian nipui a do daiin thlasik a tuar tawh em? Kan inhriatna hi a rei tawk tawhin kan inhre chiang tawk em?