Tirhkohte Thiltih Zirlai 43-na

TIRHKOHTE 8:1-8 MIZCLBSI. Saula pawh chuan Stefana thah chu a remti ve rêng a. Chumi ni aṭang chuan Jerusalem-a kohhran chu nasa takin an tiduhdah ta a. Tichuan, tirhkohte chauh lo chu Judai leh Samari ram khaw tinah an darh ta vek a. [2] Pathian ngaihsak ṭhenkhatten Stefana chu an phûm a, nasa takin an ṭah a. [3] Saula erawh chu kohhranho nuai bo tumin inahte a lût a, a hmei a pain a hnûk chhuak a, tân inahte a khung a. [4] Tin, a darhte chu hmun tinah an kal a, Chanchin Ṭha an hril zêl a. [5] Filipa chu Samari khawpuiah a chhuk a, an hnênah Krista thu a hril a. [6] Mipuiten Filipa thu sawi an hriata, a thil mak tihte an hmuh chuan a thusawite chu an bengkhawn tlâng hle a. [7] Ramhuai bawlhhlawhte chu ring taka auvin mi tam tak kawchhûng ata an lo chhuak a, zeng leh kebai tam tak pawh tihdam an ni a. [8] Chu khua chu an lâwm ta êm êm a.

Sawi zauna : Stephana rawngbawlna hi Tirhkohte Thiltih bu in her danglamna, turning point a ni a, a thihna hi Pathian mite chanchin hertu a ni. A hma zawngin Aramaic tawng hmang apostolte rawngbawlna ziak, focus a ni a. Tun atang chuan Greek tawng hmang Juda mite rawngbawlna tarlan a ni ta. Bung 7-ah Stephana, bung 8-ah Philipa, bung 9-ah Paula. An vai hian Greek tawng hmang, Greek inrelbawl dan, an culture a seilian, Helenist an ni. Jerusalem khuaah chauh Apostolten rawng an bawl a, tunah chuan Samari leh ram tinah chanchin tha a darh dawn ta. Lalpa thu, ‘Jerusalem, Judai, Samari kawlkil thlengin ka thuhretu in ni ang,’ (1:8) a tih kha a lo thleng dik chho ta zel a ni. Saula hi Stephana thihna a mawhphurtu lian ber niin a lang. A tira Stephana hnialtu, Thlarau Thianghlimin a puih tlat avanga hnial hneh lotu zingah khan a tel ve ngei a rinawm.

Ngaihtuah zui atan: 43/1. Tihduhdahna avanga remchang lo awm ta hi i hre thiam em? (Tihduhdah, harsatna karah hian Christian an pung chak ber a, ringtu pawh an nghet ber thin.)

43/2. Samari rama chanchin tha hril a nih hi a danglamna, a significance i sawi thei em? 2 Lalte 17:5-41 leh Johana 4 chhiar la. Chanchin tha hian daidanna, barriers, hnam, chi, hausa-rethei, khawtlang zahawm-hnuaihnung daidanna, barrier a thiah dan i hre thei em? In chhungkua, in community-ah Isua hian daidanna, barrier a thiat em? A thiah loh chuan tu thiam loh nge, chanchin tha a nihna angin a lang chhuak lo a ni thei em? Mawhphurhna neiin i in hria em?