Tirhkohte Thiltih Zirlai 40-na. Tirhkohte 7:44-50

TIRHKOHTE 7:44-50 MIZCLBSI “Kan pute chuan thlalêrah khân Pathian chênna puan in an nei a, Mosia hnêna Pathianin siam dân tûr a hrilh laia a lem a entîr ang taka siam a ni. [45] Chu ngei chu kan puten an chhawm zêl a, Pathianin kan pute hmaa Jentail-te a hnawh chhuaha, Josua hova Kanan ram an luh khân an luhpui a, Davida hun thleng khân a awm ta reng a. [46] “Davida chuan Pathian duhsakna a dawng a, Jakoba Pathian tân in sak phalna a dîl a. [47] Nimahsela, Solomona zâwkin in chu a saksak ta a. [48] Amaherawhchu, Chungnungbera zawng kuta sak inahte a awm ngai lo, zâwlneiin: [49] Lalpan, ‘Vân ka ṭhutthlêng a ni a, lei ka ke nghahchhan a ni. In eng ang nge mi saksak anga, ka chawlhhmun pawh khawiah nge? [50] Hêng thil zawng zawng hi ka kuta ka siam a ni lo vem ni?’ tia a sawi ang khân.

Sawi zauna : ‘An zinga ka chen ve theih nan biakbuk (tabernacle) min siamsak rawh se,’ (Exodus 25:8): hei hi biakbuk, puanin siam tura Mosia hnena Pathian thupek a ni. An zingah Pathian a chenga a hruai thin a ni tih entirna a ni. A hnua ram tiam an luh pawh khan an la chhawm zel a. Davida chuan Pathian in, temple sak a dil ta tih kan hmu a (2 Samuela 7, 1 Chro.17). Solomona temple an tih mai chu sak a ni ta a ni. Stephana hian zawlnei Isaia thu atang ringawt pawh hian Pathian chu heng in sakah hian a cheng theiin ring suh u, chhiar chiang ta che u, a ti a ni. Lei leh van siamtu hi mihring siam chawp buildinga khung tum chi a ni lo. Temple hi Pathian ang deuh thaw a ngaih chi pawh a ni lo.

Pathian puanin leh temple ten an entir chu Pathian a tel ve tih a ni. Johana chuan Isua lo kal chungchang a sawi khan, kan zingah Pathian ngei chu a rawn cheng ta, Thu tisaah a lo chang a kan zingah a lo awm (cheng) ta, a ti ta a ni. Temple leh thlalera puanin ten an entir thin chu a takin kan zingah a lo awm ta. A hranin temple, biakin ten hlutna leh pawimawhna an nei ta lo. An entir tum ber Isua kan nei tawh a ni. 2 Samuela 7:12-14, ‘I ni a kina i pute hnêna i chawlh hunah nangmah thlâktu zînga mi, i rîla rah ngei chu, ka tungding ang a, a ram chu ka tinghet ang. Ani chuan ka tân in mi saksak ang a, a ram chu kumkhua atân ka tinghet ang. A pa ka ni ang a, ani chu ka fapa a ni ang,’ ti a Pathianin Davida hnen a a lo sawi ang khan.

Thlalera (Israel faten Pathian) an tih vui lai ang khan in thinlung ti khauh suh u, tih ziak ang khan kan thinlungte Pathian Thuin chhu nem se la. Pathian atanga chhuak engkim hian a tum ber chu Isua a ni tih hriain amah i hnaih deuh deuh ang u. Thil dang hi zawng tun dam chhung bak daih engmah a awm lo. ‘Keini zawng Pathian nung biakin kan ni si; Pathianin, “Anmahniah ka awm ang a, anmahniah ka leng bawk ang; tin, an Pathian ka ni ang a, anni pawh ka mite an ni ang,” ‘ (2 Korinth 6:16) ti a, Isua ringtute chanvo Pathian Thuin a lo sawi ang khan. Pathianin Isua ringtute hi min chenchilh ta a ni.

Ngaihtuah zui atan 40/1. Juda ho khan Pathian pek Dan an nei kha an inchhuang a, an temple kha an ngai hlu em em bawk. Temple leh Dan sawichhia chu Pathian sawichhiat tlukin an ngai a ni. Mahse temple leh Dan ten an entir, an sawi tum ber Isua an hai leh si. Hei hi Stephena pawn a sawi tum ber chu a ni.Ziaktu pakhat chuan; Bible zir leh chhiar, Pathian Thu hriat hian Isua lama min hruai a nih loh chuan a hlat zawngin min kal tir thin, a ti. A awm zia chu Isua kan hnaih sawt lo, amah kan ang sawt lo a nih chuan kan thil zir, tih leh thahnem kan ngaihna zawng zawng hi a thlawn mai a ni chang lovin, Pathian tan mi hnawk nih theihna a ni tihna a ni. Stephana mantu Juda ho ang mai khan. An ni pawh khan Pathian tana thahnem ngaiin, a thu awih lutukin an in hria a ni. I thil tih thin ten Isua a hriatchian tirin, Pathian i hnaih sawt thin em, i thahnem ngaihna chhante hi i chhut chiang thin em?

40/2. Isua kan neih tawh hnu pawh hian amah  entirna thin, hmuh theih thilah hi ngaihpawimawh zawk a buaipui chiam theihin i hria em? (Pathian hian temple hi Juda-ho ngaih thupui ang hian ngai thupui ve ngat se chuan a mi chuam, ‘Ka thinlung ang pu mi (A man after my own heart),’ ti hiala a sawi lal Davida hi sa turin a tih ngei i ring em?)