Tiam Tlat E (I Married You) XIX– Walter Trobisch

Bung 5 chhunzawmna

Tukṭhuan ka ei zawh chuan telephone a lo ri ral ral a. Fatma-i bawk a lo ni a.

‘Khawi aṭangin nge min lo biak a?’

‘In aṭangin.’

‘Engati nge sikul i kai loh?’

‘Tukin chu mu rei deuh turin min ti a. Min duat lutuk, a hma ai daihin min duat niin ka hria.’

‘Inah a kalh hnan leh che em?’

‘Aw, a thikthu a chhe lutuk a. Thikthu chhia hi hmangaihna lantirna a ni lo’m ni?’

‘Aw, a…hmangaihna chi khat chu a ni e. Hmangaihna puitling lo tak, ta neih tum tlat hmangaihna a ni mah e. Hmangaihna puitling te chuan inrintawkna a nei a, a kawppui kha a tizalen ṭhin zawk alawm.’

‘Min ring tawk lovin i hria em ni?’

‘Nang eng nge i ngaihdan?’

Min chhang lovin thu dang min sawipui ta daih a.

‘Ka lo biak chhan tak che chu eng nge amah kha i hmuh dan tih ka hre duh a.’

‘Intifai eih lovin a kut pawh a sil dawn em ni tih turin a lo kal a. A inchei dan hian i rilru a tibuai ṭhin em?’

‘Tibuai ṭhin tho a, mahse hmangaihna chuan he’ngte hi chu a en kan thei tur niin ka ngai a. Keiin ka hmangaih a, ani pawhin min hmangaih a.’

Fatma-i hi tuitla lui kam hnima inham tang mai mai ang a nih hi ka ti rilru a. Tukin zingkara kan titi aṭang khan thil pawh a hmu fiah ve deuh lo em maw ni aw?

‘Ni e, Fatma, a ni mai thei. Mahse “Ka hmangaih che” in intih hian rilru hmun khat pu lovin thil dang daih in ngaihtuah ve ve a. Ani chuan sex ngawt a ngaihtuah a, nangin inneih. Chu chu a danglamna chu a ni. Puan in in kaih dawn a ni a. Leiah a khenkilhna pakhat chu in vit bur tawh a, emaw, vit bur tawh niin in inngai a, chu chu in inhmangaihna a ni. Mahse anin a ding lamah khenkilhna dang a vih bur leh laiin nangin a vei lamah i lo vit bur ve leh daih a. Chutiang chuan puan in chu kaih din theih a ni lo alawm.

‘Eng nge a thiltum niin i hriat?’

‘A rilru siam a tum lo niin ka hria. Chu chiah chuan alawm in dinhmun hi i tan tiharsa ta em em.’

‘A contract a tawp hunah min ṭhen mai a tum niin i ring em?’

A thusawi kha a lo man thiam miah lo tih a lang reng mai. A va mak ṭhin tak! A tana ka tih theih chhun ti a, thil a hriat thiam theihna tura ka hrilh fiah vek mai a ngai a nih hi ka ti rilru ta a.

‘A neih ngei ngei che a ngaihna chhan engmah a awm lo tunah hian, a ṭhen mai che pawh eng mahin a dal lo aw.’

A ngawi vang vang a.

‘Zep lovah chuan maw, kalsan daih che se ka ti mah zawk asin. A kiangah chuan i hlim tak tak dawn chuang lo.’

Ka sawi mek lai chuan chu’ng ka thusawite chuan chemin a at ang mai hian a at a nih ka ring.

‘Mahse…min kalsan chuan engmah ka nei hleinem. Ka hmaah khuarkhurum thuk tak chauh a awm asin. Khawiah nge ka kal ang?’

Pathian puan inah, ka ti rilru ta. Chuti zawng chuan kawhhmuh thiam ila ka va ti em! Ka ah hnuah hian tuam dam leh theih ka va chak em!

A ṭap a ni tih a thup tawh lem lova. A aw pawh hriat hleih theih tawh lovin a inhnit hlawp hlawp a.

‘A nih aw Pastor’ a rawn ti leh hram a.

‘Fatma, Sam 27 na kha lo chhiar teh. Khatah khan i tana thuziak a awm a nia,’ ka ti zuai a.

Mahse ka thusawi a hriat hmain a dah leh dah loh pawh ka va hre tawh lo.

Miriam-i leh Timothy-a te pawh chawhnu lam tlai tawh takah an lo kal a. Dar 5:30 a ri tawh a. Timothy-a chuan a hna a kalsan hma theih loh thu min hrilh fiah a.

‘A nih chuan kan thupuiah kan luh nghal vat a ngai a nih chu, Maurice-a hi min hruai turin a lo thleng ṭep ang,’ ka ti a. ‘In pahnih inkara ka rilru tibuaitu ber chu in pahniha thil in sawi dun thei tlat lo hi a ni. Timothy-a hian i kum zat pawh a hre lo a nia Miriam, i lehkha zir chin pawh a hre lova, i hlawh zat pawh a hre lo a nia! A nihna takah chuan Timothy-a ai hian ka hre chiang zawk che a nia. Chu chu eng nge a chhan ni ang?’

‘Kan lo thlen hma khan rei lo te kan sawi dun a,’ Miriam-i chuan a ti a, ‘keini pawhin chu chiah chu lo sawi kan duh a.’

A hmeichhia zawkin min chhang daih chu mak ka ti deuh a.

‘Kan triangle hi sex kawngka aṭangin kan lut a,’ a tih chhunzawm a. Kan han ngawi ṭhap a. Chutiang thil sawi tur chuan huaisen a ngai khawp mai tih ka ngaihtuah a. Thil a nihna ang taka a sawi ngam chu lawmawm ka ti hle a. ‘Kan hnam danah chuan kan inhual zet loh chuan inhmuh theih a ni lo tih ka hrilh tawh che kha. Mahse kan inhual aṭanga kar lina velah kan chesual ta ringawt a.’

‘Chu chuan thil in sawi dun theih lohna chhan nen inzawmna a nei dawn em ni?’

‘Tehreng mai. Kan inhmuha kan inkawm chhan ber a ni chho ta thuai a. Kan inhmu a nih phawt chuan sex kan hmang zel dawn a ni tih kan hre reng a. Chu chauh chu kan ngaihtuah ta a. Thil dang chu a behbawmah vek kan dah ta a ni.’

‘Tunah chuan maw Timothy, Miriam, thil pakhat min hrilh fiah ula ka duh, ka hriat thiam chian zawk theihna turin. In hnam danah chuan in inhual zet loh chuan in inhmu thei lo in ti a. In hnam danah chuan inhual laia sex hman nghal mai chu a tel reng em ni?’

‘A…’ tiin nui sungin Timothy-a chuan min chhang a, a zah hmel deuh bawkin ka hria, ‘…keini chu ṭhangthar ngang kan ni a. Tunlai ṭhangtharte chu kan changkang deuh zawk tawh a. Hmasawn zel te hi kan duh a. Kan hnam dan hlui tawh takte hi chu kan inphuartir duh vak hran tawh lo.’

‘Chu tak chu ka hriat duh chu a ni,’ ka ti a. ‘In hnam dante chu in chakna nen a kal kawp theih chhung chuan “African” in ni a, inhre chiang kuang lova inhual mai pawh in pawisa chuang lova. In hnam danin in chakna a dal thei dawn a nih erawh chuan “changkang” nih leh “hmasawn” nih duh chhuanlamin in hnam dante chu in mausam leh mai si a.’

‘Germany-ah chuan hetiang hi mi pakhat, thil verh kaw tur angin kan sawi ṭhin asin. A thil verh tur kha a chhah dan a inang lo a, mahse a pan lai berah zel a verh a. Ka ṭawngkam a na mah mah em?’

‘Khawngaihin na deuh pawhin sawi zel rawh,’ Miriam-i chuan a lo ti a. ‘Kan nu leh pate khan na deuh takin min lo hrilh se ka ti zawk a nia. Mahse engmah an sawi ngai lova, min ringhlel em em ringawt a.’

‘A nih leh, na deuh takin sawi ang aw. A hmasa berin, “Kan khawtlangah tleirawlte tan inhmuhna remchang a awm lo. Kan inhual loh chuan engmah a sawi dun theih loh,” in ti a. Mahse khawtlanga inkhuahkhirhna zawng zawng pawh pawisa lovin awlsam takin in lo mu dun leh thei reng si a. Engati nge thil sawi dun a harsat em em a, mut dun a awlsam em em?’

An kun reng a. A tawpah Miriam-i chuan heti hian min chhang a:

‘A awlsam hran lo. Mut dunna remchang kan hmuh chu car chhungah chauh a ni.’

‘Chu chauh chu a awm,’ Timothy-a chuan a rawn ti ve leh a. ‘A chhungte an strict lutuk a, ka chhungte pawh chuti bawk.’

‘An strict em em chungin hmun remchang chu in hmu tho a,’ ka ti ve ngat a. ‘Duh tak tak ni ula chuan inhual kher lo pawha thil han sawi dunna tur hmun chu in hmu thei ang maw le.’

‘Mahse Pastor,’ Timothy-a chuan a lo ti vat a, ‘Ka inchhir eih lo. Nimina i thusawi kha a dik miah lo a nia aw, innei lova sex hman chuan inhmangaihna a tichhia a, inhuatnaah a chantir ṭhin i tih kha. Keini pahnih inkarah ngat phei chuan a dik lo hul hual. Kan inhmangaihna a tithuk zawk a. A mawi pawh a mawi asin.’

Miriam-i lam chu ka en a. Tihnat hlauh hmel tak chung siin Timothy-a kut chu a hmer a. Tichuan zawi sapin:

‘I tan chuan a ni mai thei, mahse ka tan a ni ve lo,’ a ti a.

‘A ni lo maw?’ Timothy-a chuan mak tih hmel taka phawk hru hian a ti a. ‘A eng lai ber kha nge ni lo?’

‘A vai khan. A hmun te. Kan hmanhmawhzia te. A ruk a rala kan tih ngai te. Miin min hmu ang tih hlau reng renga awm te. Car te chu ngaihngam taka awmna tur puan in a ni chiah lo a ni.’

Timothy-a chu a thaw hawlh a. A khawvel a chim rum rum niin ka hria.

Miriam-i chuan a sawi zawm leh a: ‘Chu bakah khati khawp khan kan inveng chung khan rai hlau reng rengin ka awm a. Chu chu a mawi thei lo hrim hrim.’

‘Damdawi ei ṭhin turin ka tih che kha.’

‘Pasal la nei lo nula ni chunga doctor hnena kal a damdawi min chawh tura va dil maw? Chutiang ngam tur khawpin ka changkang lo.’

‘A tlak hmaa phawi ka tumin i duh lo a nih kha.’

‘Condom lei mai turin ka ti che a, mahse damdawi zawrhnaa chutiang va zawn kha i zak tlat a.’

‘Ni e, a chhan pawh damdawi dawr nghaktute hi hmeichhia zel an nia. Bakah condom te chu nawhchizuarte kawm nana hman ber a nia, nang te chu nawhchizuarah ka chhiar hleinem che Miriam.’

‘Ka dem che a ni lo Timothy,’ Miriam-i chuan aw nem zaidam theih tawpin a han ti a, a kut erawh a hmer nghet tlat a. ‘Thil mawi a nih lohzia ka sawi mai a ni.’

‘Chu’ngte chu engah nge min hrilh ngai miah loh?’

‘I mamawh niin ka hriat bakah i lung a awi lo ang a, ka hmangaih tak tak che tih hi i ringhlel ang tih ka hlau alawm.’

Timothy-a chu a thaw leh hawlh a. Rei fe chu an ngawi dun ta vang vang a.

Kei pawhin aw ka chhuah duh bik lova, tih chhan pawh ka nei reng. Zep nei lova thil an han sawi dun thei ta leh an rilru tak tak an han inhrilh thei ta chu ka lawm ru viau a ni. Tichuan a tawp a tawpah heti hian ka ti ta a:

‘Va haw tawh ula, in pahnih chauhin tuna in thusawi hi va sawi dun ta zawk che u. In pahniha in sawi dun hnuah thutlukna in siam dun a ṭha in ka hria. In inhmangaihna chungchanga in rilru puthmang nghet thei lo hian he’ng tawnhriat duhawm lo tak tak in neihte hi a hril niin a lang.’

‘Kan inhmangaih tak tak a ni tih engtin nge kan hriat theih ang?’ an ti rual ṭhawt a.

Telephone a lo ri a, Maurice-a a lo thlen thu min rawn hrilh a.

‘He in zawhna hi zanina ka thusawiah ka chhang ang’ tiin ka tiam a.

Timothy-a leh Miriam-i te an haw deuh chiah tihin Maurice-a chuan ka room a lo thleng ve a. A inchei dan leh a chet vel dan chu mak ka ti leh hle a. A ṭawng dan ang chiahin a kal – ti deuh thlap, mahse tumah va tihlawm tum awm hmel pu si lovin. Ka titipui pawhin hriatna ṭha tak a nei tih ka hre thei a, mahse ani chuan fing awm taka lan a tum chuang miah lo. Chuti chungin a miziaah chuan thil inhmu lo a la awm tlatin ka hria. Lehlamah chuan pa awm takin a awm a, lehlamah ve thung chuan tih theih nei lo tak awmin a awm bawk a: patling awm taka a lan dan leh naupangchhe nuih taka a nui tlat chu.

‘Khaw’nge i nu i dah a?’

‘Car-ah min nghak. Zawhna zawh che ka duh thu ka hrilh a. Kan thusawi a hriat thiam ve chuan loh thuin min chhang a. Ka zawhna kha i la hre reng em? “Engtin nge hmeichhia hi kan biak ṭan ang?”’

‘A har viau em ni Maurice?’ I nihna ang ang khan lang la. A aia ropui zawk angin emaw lan tum tlat lo la. I nihna lo pui ang te khan lan tum lo a, mahse amahah i rilru i pe hle a ni tih erawh tilang la. A nuam tihzawngte zawt la, a duhzawng leh duh lohzawng te pawh, a lehkhabu ngainat zawng tihte, a lehkha zir chungchang te, an chhungkaw chungchangte pawh maw le. In pahniha in duhzawng inang deuh te zawn chhuah tum la, chu chu titi thupuiah in hmang ang a.

‘Chutianga awlsam a ni ngawt lo.’

‘Maurice min han hrilh teh, kum sawmthum leh pali i ni tawh a. Vawi khat mah ngaihzawng i la nei lo em ni?’

‘Nei ve tawh e, nupuia neih pawh ka duh lutuk a.’

‘Engah nge i neih si loh?’

‘Doctor hnenah inentir turin ka tir a. A lo thianghlim tawh lo tih a hmu chhuak a.’

‘Chu vang chuan i ṭhen ta a?’

‘Aw.’

‘Tunah eng nge a tih tak?’

‘Ka hre lo. Ka thiltih chu a dik lo i ti em ni?’

‘Maurice, nizan hmasa khan “nawhchizuar hmunpui” min kawhhmuh kha. I ngaihzawng hlui chu kha’ng ho zingah khan lo cheng reng ta se? I nu awmna tur atana i duh loh em em hmunah khan chu nu chu i nawr liam a ni thei reng asin.’

Maurice-a chu a ngawi ta vang vang a.

‘Ka huat em em chu maw, ngaihdan hleih nei lutuk hi: Hmeichhia chu an thianghlim reng tur a ni a, mipa chuan hmeichhia an mutpui ngei ngei tur a ni. Awmzia a awm lo, a fair lo bawk si.’

‘A nih leh inneih hmain miin tawnhriat a neih hi ṭul i ti lo em ni? Tawnhriat nei miah lova nupui neih ngawt te chu.’

Mi zawng zawng hi tawnhriat nei lovin an innei alawm, Maurice. Mi tin hi kan inang lova, nupa phei chu a thuahin an inang lova. Chu vang chuan inneih hmaa kan tawnhriatte hian kan inneihna a pui lo mai ni lovin phurrit a siam zawk ṭhin a. Duhthlan tur pahnih chauh a awm asin: tawnhriat nei miah lovin in innei emaw tawnhriat dik lo tak nen in innei. Mahse, min hre thiam la, kan kal a hun viau a nia. Dar ruk leh a chanve-ah chuan kan thlen a ṭul a ni.’

Step a kan chhuk dun lai chuan Maurice-a chuan heti hian min zawt leh a:

‘Inneih hmaa tawnhriat neih chu tawnhriat dik lo zawk neihna a ni tih ṭhangtharte pawmtir hi eng vangin nge a harsat em em chhan ni ta ang?’

‘A chhan chu tawnhriat dik zawk an neih hnuah chauh hei hi an hre chhuak thei tlat a.’

‘Tisa chakna sosang tak vang a ni tih chu i ring lo a ni maw?’

‘Sex lam thu hla a ni berin ka hre lo kei chuan. An la tawng chiah lo a nih pawha thudik tak an sawi tih an pawm tlat tur khawpa an rin ngam mi an mamawh a. Tawnhriat hmanga an la finfiah theih hauh loh thudik chu an pawm a ngai a. Chutiang khawpa inrintawkna an neih hnuah chauh chuan bumin an awm lova, malsawmna tak tak awmna an tum ram pan tura puih an ni zawk tih an hre thei ang.’

Car chu kan thleng a. Maurice-a nu chuan hawihawm leh nelawm takin chibai min lo buk a.

Biak In lam pana kan tlan lai chuan Maurice-a hnenah, ‘I nu hi triangle chungchang kha engtin nge a ngaih tih han zawt teh,’ ka ti a.

Shilah-i, Maurice-a nu chuan sei zetin a chhang a. A ṭawng mawlh mawlh lai chuan Maurice-a chu a lo nui sung reng a, a tawpah heti hian min khaikhawmsak ta a:

‘Triangle angah pawh a lo ngai lova. Ṭhutphah ke pathum nei angin a lo ngai a. Chutiang ṭhutphah chuan ke pathum a neih chhung chu a buk ngai lo, a ke chu inchen lo zungin chhuat chu lo awih deuh pawh ni se. A ke pakhat i thlawn a nih erawh chuan i tlu ṭhuai a ni mai.’

‘Nu fel tak i nei a ni, Maurice. A tehkhin dan kha ṭha ka tih em em thu hrilh la, tichuan nupui pakhat aia tam neih hi ṭhutphah ke pathum nei nen a tehkhin tho em tih han zawt leh teh.’

A han letling a, a nu pawhin min chhang leh nghal a.

‘Nupui pakhat aia tam chu a nghing reng mai a ti. Chhuatah min tlukpui ṭhuai ṭhuai dawn a nih chu. Mi nupui pahnihna nih a duh lo lutuk – thih daih pawh a duh zawk a nih chu.’