Tiam Tlat E (I Married You) XVIII– Walter Trobisch

Bung 5 chhunzawmna

Ka muttui lai takin thil ri thawmin min rawn tiharh a. Khum aṭanga thova alarm tihtawp tuma ka han tal vel lai chuan telephone ri zawk a ni tih ka han hria a.

Light ka han on a, 2:00 AM a ni tih ka hmu a. Phone chu ka han la a. Hotel thawktu chuan min kaihthawh avangin ngaihdam min dil phawt a.

‘Hei nupa tuak khat hian an nghak tlat che a. Hmuh che an duh thu an sawi a.’

Fatma-i leh a ‘pasal’ kha an nih ka ring deuh a, chu vangin thawktupa chu minute nga min nghak zet a, chumi hnua lo chhohtir turin ka ti a. Ka inhak fel hnuah ka lo dawngsawng dawn a ni.

African hmeichhe hmelṭha tak tak ka hmu nual tawh a, Fatma-i ang hi chu ka la hmu lo. A sangin a hleitling hle a, an hnam thuam inbelin a ngalrek thlengin a intuam a. A han kal te hi a zeihawi riau a, a inveng hle tih erawh a hriat a. Amah hrim hrim hi a fai veng mai a. A hmel nena inhmeh tak tak ṭhi, bengbeh leh ngun te a thlang thiam a, a zahawm em em mai a ni. A mitmu uk fiah tak phenah erawh chuan lungngaihna a awm tih a lang thei a.

A kianga pa chuan a hnathawh kekawr a la ha a, tlem a ṭet deuh a, mawm a kai nual bawk a. A kawr pawh a kawngah a thun lem lova. A inmet fai lova, a kut tinte chu a bal angreng hle a. A sam rawng chu a eng a ni.

Fatma-in a ṭhianpa min hmelhriattir hnuah chuan min rawn tlawh hun awm ang lo lutuk avang chuan ngaihdam min dil mawlh mawlh a. Dar 1:30 vel thlengin an inhnial a, chumi hnuah chuan min rawn hmu ve turin an inthlem thlu thei hram chauh a ni tih min hrilh a.

‘Kan lo kal nghal mai loh chuan a rilru a thlak leh dawn si a.’

‘A pawi lo Fatma. In pahniha in lo kal hi ka lawm takzet a ni.’ An pa lam chu ka hawi a: ‘I lo kalpui hi ka lawm lutuk ka pu. Fatma-i hi i ngaihtuah tak tak a ni tih ka hre thei, Pu…’

‘John ti rawh,’ Fatma-i chuan a lo ti thuai a. ‘A hming tak a ni lo nain Sap ṭawnga a tlukpui a nia.’

John-a chu ṭhutthleng ban neiah a lo ṭhu mu diai a, a ke a thluang a, a awmah a kut a kuangkuah a. Min lawm lo a ni tih a lang reng a, mak ka ti lem lo. Fatma-i lam ṭang niin min ngai a, ka lakah a inveng a ni tih a chiang reng mai. Dinhmun harsa tak a ni, a chhan chu Fatma-i lam ṭang chu ka ni tih keimah ngei pawh ka chiang si a.

‘Min hlau viau ang a.’ – Engtin mah min chhang lo. ‘Fatma-i hian a lo hek che emaw i ti ang e aw. A hek miah lo che a nia.’ – Min la chhang chuang lo. ‘Ṭha takin i enkawl a ni tih min hrilh a. Sikul i kaltir te ngat phei hi chu i chungah hian a lawm lutuk a nia. Nangmah vangin mawi takin a inthuam thei tih pawh ka hmu thiam a nia.’

A koki a san uk a.

Fatma-i chuan, ‘Ka chungah hian i ṭha lutuk, John. I tel lovin engtin nge ka awm ang ti pawh ka hre lo. I chungah ka lawm lutuk. Ka hmangaih lutuk che. Mahse kan innei lo tlat hi ka hre thiam thei lo a ni.’

‘Kan thu ngai bawk maw,’ tiin hawi pawh rawn hawi chhuak lem lovin a thaw halh a. ‘Eng atan nge inneih certificate te chu kan tih ang? Kan ramah pawh mi tam tak hetiang nei lovin hlim takin an awm alawm. Nei reng, hlim hauh si lo pawh tam tak an awm. Certificate hi hlimna ber pawh a ni lo e a.’

‘Ka ṭhiante nen kan inhmuhin ka tan a zahthlak alawm. Engtin nge ka sawi ang? Pasal nei tawh nge la nei lo ka nih?’

‘I ṭhiante maw? I ṭhiante kha engah mah ka ngai lo.’

‘Ka nuna bet tlat an nia. Min hmangaih a nih chuan ka ṭhiante pawh i hmangaih tel a ngai alawm. Ka tan chuan inneih certificate lam a ni lo, inneih ruai kha a pawimawh ber. Inneih ruai ṭheh a, mi zathum zali vel sawm ka duh a ni.’

Mak tih hmel takin a ban a phar hluai a. ‘Mi zathum!’ a ti ṭhawt a. ‘Ka hrilh ang che, kan innei a nih pawhin ho tein kan ti ang. Kan pahnih leh min dinpuitute nen, City Hall-ah. Chu zawng chu a ni mai.’

‘Mahse, kan ramah te chuan miin ka zahpui che emaw an ti dawn asin, eng emaw thup ka neiah an ngai mai ang. Ka chhuang che a ni tih miten hmu se ka duh alawm. Inneihna ho te ringawt te chu ka tan a zahthlak dawn lutuk.’

Kan ngawi vang vang a.

‘Ka hmuh dan chuan maw, John, pen khat i pen tawh a, mahse i thiltihin a nghawng tur zawng zawng hi i la hre thiam pha lo niin ka hria,’ fimkhur takin ka han ti a.

‘A eng pen khat maw ka pen?’ lungawi loh hmel takin a ti a, mahse min chhan duh ṭan tawh avang chuan ka lawm ru viau a.

‘I inah Fatma-i i lak luh hi. En teh maw, he rama hmeichhia hi i nupui emaw, i nupui tur atan emaw i thlang a nih chuan mi pakhat chauh thlangin i la hrang ta tihna a ni lova. A zirna nen, a duhzawng leh duh lohzawng nen, a chin ṭhan leh tihdan phung nen, a tawi zawngin a hnam ziarang zawng zawng nen i thlang tihna a nia. Kan inbiakna tawi te aṭang hian amah mimalin i hmangaih a, a hmelṭhatna leh a mizia te nen, mahse a hnam hi chu i hmangaih tel lo niin ka hria.’

‘Amah hi ka hmangaih,’ tiin luhlul leh inveng tih hriat takin min chhang a.

‘Ni e, ka hre thiam alawm. Mahse hmangaihna tak tak chuan a hnam ziarang, a chawr chhuahna zawng zawng nen a hmangaih alawm. An hnam ziarangah hian inneihna ruai liantham a bet tlat a. He ram mi hmeichhia i nei duh a nih chuan chu chu i pawm thiam a ngai a ni. Chu mai pawh chu a tawk lo, sawisel lova pawm mai lovin i duhpui zawk hial tur a ni ang.’

A ngawi leh ta vang vang a. Ka hmuh danin heti zawng hian thil a lo la ngaihtuah ngai lo a ni.

‘En teh maw,’ ka’n tih chhunzawm a, ‘dinhmun pangngaiah pawh inneihna hrim hrim hi phurrit, mawhphurhna lian tak a ni a. Hnam ziarang inang lo lutuk hi sanghawngsei hnungzang titliaktu phurrit a ni fo ṭhin alawm. He’ng inneihna tichhetu ber chu kha’ng nupaten an hnam ziarang inang lo kha thinlung takin an inpawmpui theih ṭhin loh vang hi a nia. Thil ho te te aṭangin a inṭan a, ei tur leh a siam dan tih mai maiah te – a tawpah phei chuan nunphung leh rilru puthmang danglamah a chhuak daih thei hial!’

‘He’ng inneite zawng zawng hi an inṭhen leh vek em?’ Fatma-i chuan a lo hre chak viau a.

‘Inṭhen vek lo e. Mahse an inkawprem dawn chuan an pahnih khan an inbenbel zui zel tumna hmunah khan rei tak an cheng dun tawh tihna a ni ṭhin a.’

‘Pawi ta ber chu, hetiang hi a thleng khat khawp mai. African zirlaiin European emaw American emaw an ramah a va tawn a, nupuiah a neih a hian, chu nu chu Africa ramah a la kal ngai lo a nih chuan an inṭhen leh deuh zel a nih chu. A tumna leh a duhna chu eng anga ril pawh lo ni se, a insiamrem thei lo tlangpui ṭhin.’

‘A kekawr fan theih baka thui a pen a nih chu,’ tiin John-a chu a lo fiamthu hluai a, a fiamthu chu amahin a lawm ber a. A boruak a lo engthawl ta deuh chu ka lawm angreng hle a, chu vangin heti hian ka ti a:

‘In pahnihin hetiang tho hian in tisual dawn a ni ang tih ka hlau mang e.’

‘Kan inhmangaih alawm,’ John-a chuan a lo ti leh a. Mipa naupang, a infiamna thil miin an laksak mai ang tih hlau melh hian min rawn melh a.

‘A dik alawm, mahse inneih chu hmangaihna chauh a ni lova. Zanina inkhawmnaa ka sawi ang khan zan thla eng leh rose par mawi ringawt a ni lo, thleng sil leh nau ek then thlengin a ni.’

‘Nau ek then!’ tiin John-a chuan ten hmel takin a hnar a rawn len vel a.

‘Naupang i ngaina na nge?’ A lu a bu nghat a.

‘A nih leh nang, Fatma?’

‘Kei chuan ka ngaina lutuk, fa pawh tam deuh neih ka duh.’

‘In thu a inhmuh lohna pakhat dang leh,’ ka lo ti charh charh a, ‘A la pawimawh em em zui. A nih leh John-a, eng nge i tum dan? He ramah hian awm zui zel i tum em?’

‘Sorkarah hna ka nei a, mahse ka contract hi kum khat hnuah chuan a tawp tawh dawn a.’

‘Tichuan?’

‘Ka hre lo. Hmun dangah ka kal daih mai thei – South America emaw Japan emaw ah.’

Fatma-i chu a lo phu zawk a.

‘Fatma-i hi hruai ve zel i duh ka lo ring a.’

‘Engati nge i lo rin rikngawt?’

‘Inneih certificate tel lova hlim thei tho mipaho zingah khan i inchhiar tel ve khan ka hria a. I hlim tak tak a nih chuan i hlimna chhan chu kalsan duh awm loh tak.’

A koki a san leh uk ringawt a. Chutah Fatma-i a insum zo ta lo.

‘I contract a tawp dawn hnai tih min la hrilh lo reng reng. Kan ramah hian i dam chhungin awm zui zel i duh niin ka lo ngai char char a.’

John-a chu a tho hluai a.

‘Mangṭha. Kan kal a hun. A tlai tawh – nge a hma zawk.’

‘Thil pakhat chiah,’ tiin ka chhang a, a kut ka chelh a, a mitah tak ka en a. ‘Khawngaih takin, John, Fatma-i tan, i rilru chu siam fel thuai rawh. I hruai ve zel duh tak tak a nih chuan hrilh thuai la, ani pawhin thutlukna a siam ve theihna turin. I tum lo a nih a, i contract a tawp huna ṭhen mai i tum a nih pawhin hrilh rawh, umzui zel che a duh leh duh lohvah a rilru a lo siam theih nan. In pahnih hnihin tih tur bik ka hrilh lo che u. mahse ka ngen che u a ni, inbihruksiak mai mai lovin in rilru siam tak tak rawh u.’

‘Kan lawm lutuk e,’ tiin dam takin min chhang a.

‘In haw na tur a hla em?’ tiin boruak tihzangkhai ka han tum a.

‘Hla lo e, lui kam lehlam lawk saw a ni mai.’

Tichuan room chu a chhuahsan a. Fatma-i pawhin min en hauh lovin a zui chhuak a.

Khumah ka han mu leh ren rawn a, mahse ka muhil thei tawh chuang lo. Ka rilru a buai mup mup mai. Kha’ng mite: Fatma-i leh John-a, Miriam-i leh Timothy-a, Maurice-a leh a nu, Daniel-a leh Esther-i, ka nupui thlengin, ka mitthla kual zut zut a.

Ka tho ta ringawt a, ka room-a ei tur min rawn pe turin ka ti a. Kan nu lehkhathawn chu ka chhiar nawn leh a. Engati nge min fuih phur thei deuh zawkin a rawn ziah loh le? ‘Ka ngaihzia che leh eng eng emaw sawia titipui theih che ka thlakhlelhzia hi.’ Kan tih fo ṭhin dan a ni reng lo’m ni? Tun ṭum ngat phei chu kan awm hran chhung hi a rei pawh a ni lova. Chuti em ema harsa chu a ni dawn em maw ni?

Lehkhabu chhiarsan ka tum a, mahse kan nu bawk rilruah a lo lang leh ṭhin a.

Eng vangin nge maw hetiang lehkhathawn te a ziah tak mai ni? Thlamuan turin min duh a ni ang ka ti rilru ta a. Engati nge maw ka lo lungawi loh em em le? Keimah leh ka hna buaithlak tak, harsatna ka sut kian theih loh leh mi ka puih theih lohte zawng zawng nen hian min hrethiam lo deuh nia ka hriat vang a ni.

Hriat thiam nia ka inngaih loh avang chuan han thlamuan chuang tur ka awm bik lo niin ka inngai a. Ani pawh thlamuan a nih loh avangin min hre thiam thei bik lo a ni. A kual a kual mai a ni e.

‘Ka thusawi min ngaihthlaksak reng ṭhin avangin ka lawm e…’ Ka ngaihthlaksak reng ṭhin em? Tak takin? Thil hi chu min sawipui reng ṭhin tho a. Fatma-i leh John-a ten an tih theih loh, Timothy-a leh Miriam-i ten an tih theih loh, Daniel-a leh Esther-i te pawhin an tih theih loh chu a ti ṭhin a ni lo’m ni? Aw ti e. Chu rilru chuan min pui deuh a. Kan puan in chhungah chuan thil kan la sawi dun thei reng, a chang changin han awp deuh rup angin lang ṭhin mah se.

Ka Bible ka han keu a, Sam 27 na ka chhiar a. A thu tin mai chu tui tharlam, vawt tui tak ang maiin ka lem duak duak a.

‘Sipai pawlhovin mi beih tumin mi ep reng mah sela, ka thinlung hian a hlau lo vang… A humhimna puan inah chuan mi thukru ang’

He’ng thute hian chuti takin ka rilru an lo la khawih ngai miah lo. Ka tan awmze danglam bik pawh an la nei ngai chuang lo. Aw rawl ring takin ka hnenah thu an rawn sawi thut a ni ber mai.

A puan in, tiin ka ngaihtuah zui a. Ni e, kan puan in a lo ni lo, Pathian puan in a ni. A puan inah kan awm a ni. A puan in chu a awp ve rup ngai lo.