Tirhkohte Thiltih Zirlai 39-na. Tirhkohte 7:36-43

TIRHKOHTE 7:36-43 MIZCLBSI [36] Ani chuan anni chu a hruai chhuak a, Aigupta ramah te, Tuipui Senah te, thlalêrah te kum sawmli chhûng lai thil mak leh chhinchhiahnate tiin a hruai a.[37] Chu Mosia chu Israel fate hnêna, ‘Pathianin keimah ang in unaute zînga mi zâwlnei a la siamsak ang che u,’ titu kha a ni. [38] Amah chuan thlalêra pung khâwm zîngah Sinai tlânga amah betu vântirhkoh chu a lo chhâwn a, kan pute hnêna thu sawi ṭhîna, min pêk chhâwn tûr thu nungte pawh dawngtu a nih kha. [39] Kan pute chuan a thu an zâwm duh lo va, an hnâwl a, Aigupta lama kîr leh an duh a. [40] Arona hnênah, ‘Kan hma hruaitu atân pathiante min siamsak teh khai; he Mosia, Aigupta ram ata min hruai chhuaktu lah hi engtin nge a awm tâk pawh kan hre si lo,’ an ti a. [41] Chutichuan, bâwngno lim an siam a, chu milim hnênah chuan inthawina an hlân a, anmahni kutchhuak chu an hlimpui ta a. [42] “Tichuan, Pathianin anmahni a hawisan a, vâna arsite an biak theihna tûrin a kalsan a, zâwlnei Lehkhabua: ‘Israel chhûngte u, kum sawmli chhûngin thlalêrah khân inthawina ran mi hlân em ni? [43] Moleka puan in in zâwn a, In Pathian Refana arsi lemte in siam a. Chûng lemte chu chibai in bûk a, chuvângin, Babulon piah lamah ka tântîr ang che u,’ tih ziak ang khân.

Sawi zauna: Stephena hian an puhna temple leh dan a sawichha tih kha a chhang a ni tih hriat reng a tha. Tun tumah hian Mosia hmanga Pathianin dan a pek chu an sawt phah miah lo a ni, Pathian laka an helna a reh lo va, pathian dang an biak an thulh chuang ngai lo, tih zawlnei Amosa thu la chhuakin a sawi a. Chu chang a ni lo a Pathianin a ruat anmahni chhanchhuaktu Josepha leh Mosiate an lo hnawl tawh thin a. (Chutiang chiah chuan Pathian Fapa Isua ngei pawh an hnawl a ni.) Mosia chu Aigupta rama a awm laiin Pathian a hnenah a awm a, Midian rama a puzawn Jethroa beram a ven chhhung zawng Pathianin a awmpui a, Israel fate kum 40 thlalera a hruai chhung zawng pawn Pathianin a kalsan lo. Khawi hmunah pawh Pathianin a pawl mai a ni. Hmunin awmzia a awm lo, Pathian chenchilhna a ni pawimawh zawk chu.

Stephena hian temple a sawisel hrim hrim a ni lo a, Pathian an hriat dan, templea khung an tum mai hi a dik lo tih a tarlang a ni. Thlalerah pawh khan bawngno lim chibai an buk a, a hnenah an inthawi a, ‘an kut chhuah chu an hlimpui ta a,’ a tih kha.  Anmahni kut chhuak siam chawp chu, ‘hei ngei hi a ni e,’ an ti ta mai a ni. An hmuha an khawih theih, an zawn kual theih, an siam chawp chu an pathian ta mai a ni. A awmzia chu; an thuhnuai theih, an contro; theih pathian an duh tihna a ni.

Stephena hian zawlnei Amosa thu puan la chhuakin Israel fate hel thu leh Pathiahin an ram a ta a la tih darh tur thu hrillawkna kha a sawi chhawng a. Amosa 5: 27-ah hian ‘Damaska khaw piah lamah’ tih a ni. Stephena thung hian, ‘Babulon piah lamah ka tântîr ang che u,’ a ti thung a. Damaska hi Assyria rama awm a ni a, Israel hmar lam lalram sala hruai darhtu an ni. Babulon hi chhim lam lalram, Davida thlah kal zel hneha sala mantute kha an ni. Stephena hian chhim lam lalram chungchang a sawi avangin zawlnei Amosa sawi tak zawk Damaska tih hi Babulon tiin a thlak ta mai a ni tih hi zirtu thenkhat ngaihdan a ni.

Ngaihtuah zui atan : 39/1.  I duhzawng i tih tir theih, i ngaihdan apiang pawmpui thin che, i control theih pathian duh ve chang i nei em?