Tiam Tlat E (I Married You) I — Walter Trobish*

Bung 1

I

Leilung a lo hnai zel a. Thlawhna ṭumhmun pawh a lo lang ta. A kein ṭumhmun a han rap a, a sawt kang a, a han rap leh a, a vir ta char char a. A engine a rum hum hum a. Thlawhna chu a tlan muang tial tial a, a inher a, airport building lam a pan a, a ding ta a.

Ka thleng ta e.

Ka seatbelt ka phelh a, ka banah ka coat ka bat a, ka bungraw ken luhte ka lak hnuin thlawhna kawngka hnunglam chu ka pan ve ta a.

Steward African nula chuan min nuih sangin a lo bu zauh a.

‘A nih leh aw ka pu. Kan thlawhna chu i chuan nawm ka beisei.’

‘Ka lawm e’ tiin ka chhang a, fimkhur takin kailawnah chuan ka chhuk ta a. Khaw lum chuan a tuamin min rawn tuam nghal hlup mai.

Ni engin min en khalh vu a, passenger dangte chu airport building lam panin ka zui ve zel mai a.

Thlawhna leh building inkar laihawlah chuan tleirawl hi a lo ding a, mi zawn nei tih hriat takin passenger ho chu uluk takin a lo en hlawm a. Steward thawmhnaw a inbel bawk. Ka zawn lam rawn pan thutin ka hming a rawn lam zui a.

‘Engtin nge min hriat a?’ ka ti a.

‘I lehkhabu pakhat kawmah i thlalak ka hmu alawm. Ka hming chu Miriam-i a ni a. Lehkha pawh ka lo thawn tawh che kha.’

Miriam-i tih chu ka hriat tawhna ka ngaihtuah let vang vang a.

‘I lehkhathawn chu ka chhang che em?’

‘Aw, chhang e. Inhualna chhut chah chu nupa inṭhen ai chuan sual rau rauvah pawh a zia deuh tiin min chhang.’

A lehkhathawn chu ka hre chhuak ta chiah. Ka bag te chu ka nghat a, Miriam-i chu ka en a. Nu te lam deuh, hmelṭha veng mai a ni a, a mitmu rawng buang chu fiah fim takin a chal sang tak hnuaiah chuan a lang a. A sam sei tak, dumpawl lam lek lek chu a nghawng hnung lamah mawi takin a ṭawn bawk a.

Nui chungin, ‘I pasal hual chu nei tur khawpin a laka i rilru put a thuk lo vin i hria tih i rawn ziak a nih kha,’ ka ti a.

‘Ka rilru anga awm tur chuan min ti a. Mipa aiin hmeichhiain an hre hma zawk i tih kha.’

Tunah chuan a chanchin chu a kimin ka hre ta. A pasal hual ai khan kum khatin a upa a, zirnaah pawh kum li laiin a zir sang zawk a, a hlawh pawh a tam zawk. He’ngte hian a rilru an tibuai a ni.

‘Mahse maw, han ṭhen mai chu ka harsat a ni. Min hmangaih a, kei pawhin hmangaihna chen chu ka nei. Ka rilru tak tak pawh hi ka hrethiam ṭhin lo.’

‘Miriam, hetah chuan titi hluai chi pawh a ni lo. Passport endikna ka kal tlang pahin kan chhunzawm dawn em ni ang?’

Ka bag rit tak mai chu a han dawm a, kei pawhin ka kut ding lamin ka dawmpui a. Ka briefcase chu vei lamah ka zakzeh a, building lam pan chuan kan kal leh ta a.

‘Min hrethiam la, titipui che hi ka duh lutuk a. Kan pastor-in ni li chauh i cham dawn tih a sawi khan, midangten an lo pan hma chein lo hmuh hmasak che ka tum a. Thlawhnaah hian ka thawk a. Chu vang chuan a nia hetah pawh ka lo nghah theih che.’

‘Pastor Daniel-a kohhranah em ni i lawi a?’

‘Aw. Ani pawhin a lo hmuak che asin. Custom office vel i pal tlang hunah in inhmu thei ang.’

Passport endikna hmuna kan intlar lai chuan sawi duh a la nei a ni tih ka hre thiam reng mai. Min biak duhin theihtawp a rawn chhuah a ni. Min rawn be tawp tur pawh khan a huaisenna a sawm khawm ve viau ang, chu vang chuan tihbeidawn loh hram ka duh a.

‘Miriam, i hriat chian tak tak hmaa kha tlangval nena in inhual ringawt kha eng nge a chhan?’

‘Kan ramah hi chuan kan inhual zet loh chuan mipate hi kan biain kan len chhuahpui thei lo a. Ngaihzawng te hi kan nei thei lo. I lehkhabuah khan inhriat chian zet loh chuan inhual loh tur i ti a. Mahse keini chu kan inhual zet loh chuan kan inhre chiang thei lo alawm.’

            Ka passport an endik hun a lo thleng a.

‘Zin khawthawng mai mai i ni em?’ tiin officer chuan min zawt a.

‘Helaia kohhran pakhatah hian thusawi tur ka nia.’

‘Eng chungchangah?’

‘Inneihna chungchangah.’

Min en thuak a, thu dang sawi lo vin ka passport-ah chuan phalna stamp a chhu ta nghal a.

Miriam-i nen chuan kan bungraw lo chhuahna tur lam panin kan kal leh a.

‘Ka ṭhen a nih chuan intihhlum mai a tum a.’

‘Intihhlum a? A ti tak takin i hria em?’

‘Ka hre lo, mahse a ti tak tak ang tih ka hlau.’

‘Lo titipui ve chhin ila a ṭha ang a.’

‘A lawmawm ngawt ang. Zaninah pawh a rawn inkhawm ve dawn kha.’

‘A nih chuan inkhawm banah min inhmelhriattir la.’

‘Ka lawm e,’ a ti a, a thaw huai a, ‘Ka lawm lutuk tlat.’

A aw aṭang chuan hei hi a lo beisei ruk reng a ni ang tih ka ring a, a pasal hual nena kan titi hi.

Ka suitcase lian tak chu a lo thleng a. Miriam-i chuan customs officer pakhat chu an ṭawngin a bia a. Ani chuan awlsam takin min kaltir a.

Kawngka a inhawng a, inhmuahna room-ah chuan kan va lut ve ta a.

chhunzawm tur

---

Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter-a 1979-a a boral hnuin Ingrid Trobisch chu Springfield, Missouri-a an chhungkaw inah a kir leh a, thuziak leh thusawi rawngbawlna a la chhunzawm ta zel a ni. Ingrid-i pawh hi 2007 khan a boral ve ta ani.