ISUA I HRIA EM? – Lalchuangliana

Good Friday hun laia kan sawi ve ziah chu Peteran Lal Isua a phat thu hi a ni. Lal Isuan vawi thum tlawng a phat tur thu a lo ‘warning’ hnu pawhin Petera chuan, “Ani chu ka hre lo ve” a ti a nih chu! (Luka 22:57b) “Ka hre lo va che,” in tih hi inhmuhsitna tawngkaah kan hmang fo thin. “Tunge i nih ka hre lo va che” han intih ngat chu na tak a ni. Mi keimahni min hre ve tura kan ngaihte pawhin min han hre lo tlat mai te hi a na kan ti thin. (Kei upat ve tawh chhuanlamin hei hi ka ti fo mai, ka duh vang pawh a ni bik lo!) Kum thum zet chhun zana lo inzui tawh, a ‘zirtir’ lo inti tawh, “Krista Pathian nung fapa i ni” te pawh lo ti hial tawhtuin  “Ani hi ka hre lo,” a han ti ngat mai hi Petera hi demawm kan ti ngawih ngawih thin. “I va mawl ve mi a pa” tia han ben sawkah te pawh kan it mai thei!

Mahse han ngaihtuah chiang ila Petera dinhmuna ding hi kan lo ni fur mai thei a ni. Ziaktu pakhat Dr. Craig Barnes chuan, ” Peteran ani hi ka hre lo ve a tih hi Isua a phatna a ni lo, amah Petera inpuanna (confession) a ni  zawk,” a ti. Peteran kum thum lai a lo zui  kha Pathianin a fapa a rawn tirh Messia kha ni lovin, a lo zui zawka chu a duhthusam Isua zawk kha a lo ni. Dr. Barnes chuan, “What he (Peter) has
been following is not Jesus, but his expectations of Jesus,” a ti. Petera chuan Isua kha kraws- a thi lo turin a theih tawpin, chempui vaiin a tang a, Judate Rom sawrkar laka chhanchhuak tur leh Davida lalram (political kingdom) rawn din tur khan a beisei a ni. Kraws- ah Isua chu a thi dawn tak tak tih a han hriat chuan, “Ani hi ka hre lo ve,” ti mai tur reng kha a lo ni.

Keini pawh hian Lal Isua hi kan lo hre fuh lo hle thei a ni. Hremhmun ata min la chhuaktu, vanram nuam taka chatuana min chawlhtirtu, he khawvela kan dam lai pawha malsawmna tinrenga kan duh ang taka min vurtu, hriselna tha min pe a, nuamsa taka min awmtirtu ni turin kan beisei a. Chutia kan that hlim lai chuan, Lal Isua fak leh chawimawi hi a awl hle. Mahse amah Lal Isuan kraws kawng zawh tura min tih kan han zawh dawna, a hming avanga kan dinhmun, kan sum, kan in leh lo, kan chhungte ngei pawh kalsana, tihduhdahna leh  tan in hial luhte a lo ngaih hunah chuan Isua kan zuia kha a ni ta lo hu in kan hre mai  thin. Hetih avang hian mi thenkhat chuan “The Jesus I never knew” tih lehkhabute an lo ziak hial a ni (Philip Yancey)

Lal Isua hi kan hre tak zet em? Thlarau Thianghlim a lo thlen zet chuan Peteran Lal Isua a hre chiang ta ngei mai. “Ka Lalpa anga kraws- a khenbeh tlak ka ni lo, a letlingin min khengbet  rawh u,” a ti e, an tih kha!