Bible a rorelna dik (Justice in the Bible) XI- Tim Keller* (chhunzawmna)

8. Mahni khawtlanga insawrbingin.

Kristiante hi ram pum ni lo vin mahni khawtlang ṭheuhah rorelna dik umzui hna hi thawk turin thurawn ka pe duh a (in chhia leh ṭha hriatna khuahkhirh chuang lo vin). Rorelna dik lo tih bik neia beih hi ram pum thil anga beih vak ai pawhin a ṭha zawk a ni. Khawthlang lam ram tam takah chuan kan ram pum politics te hian hna an thawk mumal tawh lo. Mipui tam tak leh constituency tam takte lungrual tlan a ngaihna thilah phei chuan eng dan mah zam mumal thei tawh lo khawpin ngaihdan hi a kal hrang tawh a. Hei hi kum za tam an hnathawh dan a ni tawh, mahse tunah chuan lehlam nena thawhhona aiin hruaituten an hnung zuitute mimal agenda an fahna dawhsan an ni ta ringawt mai. Ram pum politics hi chu hnathawk thei a ni tawh meuh lo a, social media kal tlanga ram pum huapa ngaihdan sawihonate hi rah ṭha chhuahna ai chuan ṭha ang taka inlanna remchang mai an ni. Heti ang lo hian thil dik lo tam tak chu mahni khawtlangah awmze neia beih theih an ni. Khawtlang tana ṭha turah chuan mite pawhin thawhho an lo hreh lo deuh zawk a ni.

9. Thil chi hrang tam tak a awm tih pawmin.

Bible mil rorelna dik hi a ngheh bik em emna chhan pakhat chu rorelna dik lo hi chhan pakhatah a puh thlu ve mai lo hi a ni. America rama vun ngo evangelical ho tam tak chuan mimal ngaihdan fawr tak neiin chi leh chi inthliarna te hi mi dang huatna avanga mimal rilru put hmang dik lo, tum nei rana chetlaknaah an puh thlu tlat. Kawng lehlamah Critical Race Theory chuan chi leh chi inthliarna reng reng chu khawtlang rorelna kalphung fuh loh vangah a ngai tlat thung. A chung lama kan hmuh tawh angin Bible mil rorelna dik chuan a eng zawk mah ni a puh ve lo va, thil tam tak a awm thei tih pawmna entirna ṭha deuh chu Anthony Bradley-a lehkhabu ‘Ending Overcriminalization and Mass Incarceration’ tihah a awm. Bradley-a chuan U.S. a misual chunga rorelna kalphung hi a chhui chiang a, kawng tam takah dik lohna a hmu a, mahse engtia tih tur nge? A bung tawp lam pahnih hian an sawi chiang khawp mai. An hmingte chu: “Toward Structural Solutions at the State Level” leh “Toward Civil Society Solutions” tih a ni.

“Civil society” tih hian sorkar emaw commerce lamin emaw an kalpui ni lo group leh association tam takte sawina a ni. Chu’ngte chu ‘mediating structures’ (pawl lian zawka mimal thlung khawmtu) an ni a, chhungkua, kohhran biak in, synagogue, mosque leh ṭhenawm khawveng leh NGO pawlte an ni. Conservative ho chuan retheihna leh rorelna dik lote hi he’ng civil society te siamṭhat turah an dah deuh tlat a, liberal leh progressive ho chuan khawtlang huap policy-ah an dah vek thung. Bible mil rorelna dik an hriat avangin Kristiante erawh chuan rorelna dik lo hi chhan tam tak a awm tih an pawm a, a siamṭhatna tur pawh chi hrang hrang an hmang thiam ang.

chhunzawm tur

*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world.  He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/