Tirhkohte Thiltih Zirlai 19-na. Tirhkohte 4:1-4

TIRHKOHTE 4:1-4 MIZCLBSI

Petera leh Johanan mipuite hnêna thu an sawi lai chuan, puithiam chu Tempul pulis hotupa nên, Sadukai-hote nên an hnênah an lo kal a. [2] Isua thawhlehna thu sawiin mitthi thawhlehna thu mipui an zirtîr avâng chuan an lungni lo êm êm a. [3] Tichuan, an man a, tlai lam a nih avângin a tûk thlengin tân inah an khung ta a. [4] Nimahsela, an thu ngaithlatute zînga tam tak chuan an ring ve ta a, an za chuan sângnga lai an tling a.

Sawi Zauna:

Fiahna, trials hian rinna leh thlarau hnathawh tak zia a ti chiang thin. Thlarau thiltihtheihna chu dodalna hnuaiah a chak zia a lang chiang thin. Fiahna kal tlang ngai lo rinna chu a tlo lo hle tihna a ni thei a. Thlarau hnathawh dodal ni ngai lo chuan thiltihtheihna a keng tlem a ni maithei.

Temple pulis hotupa (captain of the temple guards) mawhphurhna chu temple-a buaina chin fel a ni a. Buaina siamtu a man thei bawk a ni. Rom sawrkar hian sakhaw thilah a ram awpte zalenna a pe zau hle a. An duh anga ro an inrel a phal a. Sakhaw hotute hian thi turin mi chungthu erawh an rel thei lo. Ram awptu, governor chauhin chu thuneihna chu a nei a ni. He mi tum hian mipui an lo punkhawm tak chiam avangin buaina a chhuah loh nan temple pulis hotupa hi a rawn inrawlh a ngai a ni.

Sadukaiho hi khawtlang roreltu puithiam chi an ni a. Sakhaw lamah pawh thu neitu berte an ni a. Rorelna khawl, Sanhedrin hi an thuhnuaia awm a ni. Mitthi thawhlehna a awm an ring lo a. Hei vang hian Isua thawhleh thu sawi an hriat hian an thinur ta em em mai a ni. Petera leh Johana-te hi an man ta a ni.

Rorel chungchangah hian rel sual an hlauh avangin an fimkhur em em a. Ni tlak hnu-ah mi chungthu ngaihtuahin ro an rel ngai lo. A tuk an nghak thin. Zing lamah rorel an tan thin a, khaw en laiin zawh hman an tum thin. Thiam loh chantir tura thu ti tluk a nih chuan a ni-ah a hrem dan tur an puang ngai lo. A tuk an nghak thin. Ngaihtuah kim loh thil enge maw an lo neih tak mialin, an ti a ni.

Isua chanchin hian mihring hi hnihah min then phawk a, ringtu leh hnawltu. Hemi tum pawh hian mi sangnga laiin an ring a ni.

Ngaihtuah a tan:

32. I rinna fiahna engte nge i hmachhawn thin, chung fiahna chu i kal tlang thei thin em, nge i hnung tawlh leh thin zawk? (Eng pawh ni se beidawng ngai suh. Lalpa ropuina chu beiseina min pe thin hi a ni.) Engte nge i chak lohna, eng tiangin nge hma i sawn ang?