KRISMAS~Lalchuangliana

Krismas lai leh a han thlen dawn vel hian suangtuahna a kal thui duh hle mai a. Tihian suangtuahna han tikal ta ila. Chatuan Pathiana mi pathumte chu an inrâwnkhawm a. Pa ber chuan, “Keimahni anga kan siam mihringte chuan thuawih lohna sual rah chu sengin mihrang an lo ni ta si a. Mahse anmahni ka hmangaihna a chuai chuang si lo. Anni nena lêng hova chhûngkuaa insiam leh hi ka va duh êm,” a ti a. Fapa chuan, “Ka pa, an thiltih sual chu ngaidam tawp mai ila a theih lâwm ni?” a ti a. Pa chuan, “Sual man chu thihna a ni tih hi kan ṭhiat ngawt thei lo, chu sual man chu pêk a ngai a ni,” a ti a. Fapa chuan, “Chuti chu ka Pa, chu sual man chu keiman ka pe mai ang e, mihringte chu chhandam an niha chatuana an nun leh theih nan keima nunna ka hlan mai ang e,” a ti a. Vantirhkohte chuan, “Lalpa, chu êm zawng ni suh se, keimahni hian kan zu chhan thei lawm ni?” an ti a. Pa chuan, “Nangni zawngin in thei lo vang, ka Fapa chuan a nunna a hlan a ngai dawn a ni, ka neih hlu ber leh ka neih chhun ngawih ngawih hian min liamsan poh a ni ang chu,” a ti a. Thlarau Thianghlim chuan, “Chuti chu khawvelah mihringte anga piang tûrin rem ka lo ruat e. Nazareth khaw nula thianghlim Mari khu amah paia, lo enkawl seilian tûrin ka tifel e. Mihring famkim, hrehawm leh tihduhdahna tinrêng tuâr tur, nunna pe tur leh Chhandamtu ni bawk si chanchin chu zu hrilh turin Gabriela hi ka tir dawn a. A hmingah pawh keimahni mihringte hnena zu cheng ve ta kan nih avangin ‘Immanuela’ tih ni se, a mite chhandamtu tûr a nih bawk avangin ‘Isua’ tiha koh ni bawk sela, Gabriela chu kal nghal rawh se,” a ti a. Vantirhkohten inthlahna leh ṭhenna hla mawi an rem a, vanram pawh chu a hnîm ruai mai a, an Lal Fapa chu lei lamah an thlîr liam ta a.

Bethlehemah Lal Isua a lo pian chuan mi hnuaihnung bera ngaih, berâmpute, khawvelin an ngaihsan em em mi fing te, lei ram mi ni lo angel rualten chibai an rawn bûk a. Thilpêk an rawn hlan te chuan chatuana Pathian leh mihring inkara Puithiam a nihna te, misual ber thihna tura an siam, rapthlak leh mualphothlâk ber, kraws-a thi tur a nih leh thlanah phûm a nih tur te, ropui taka chatuana Lalberte Lalber a nih tur te a rawn hril nghal a. Mihring fate hi Pathian fate kan nih leh theihna tura leia a rawn kal chhan ber hna chu ti zovin tunah kan tan chatuan atan a nung a, min ṭawngṭai sak a, rei lo teah min lam turin a lo kal leh dawn a ni a va ropui em !

Krismas hunah hian, chuti taka min ngaihtuah leh a Fapa ngei pawh zuah lova kan tana rawn tirtu kan Pa Pathian hnenah engtinnge lawmthu kan sawi ve tak ang le ? Krismas thawhlawm kan thawh a, keimahnin ruai ṭheh leh intihhlimna atana kan hman leh mai hi chu a nih a rinawm lo va. Kan aia pachhe zâwkte hnena thilpêk kan pêk te pawh hi a nih ber loh hmêl. Pa Pathianin a duh ber chu a thilpek hlu ber, a Fapa Lal Isua ngei hi Lal leh Chhandamtuah lo pawm a, kan thinlungah lo chêng tura sawm luh a, a Thlarau min pek nghal nena inpâwl a, amah hmangaih deuh deuh va, a thupek kan awih zel hi a ni zâwk. Krismas hlim taka hmanga Isua Krista nena intawh tum lo la. Lal Isua i neih tawh zâwk avanga a thlarau nen in inzawm tlat avangin Krismas hi hlim takin hmang tawh zawk ang che. Ropuina, chawimawina, lalna leh thuneihna zawng zawng kan Pathian – Pa, Fapa leh Thlarau Thianghlim hian chang kumkhua rawh se.