COUNSELLOR HUANG – ‘RINNA AVANGA THIAMCHANNA’ by Dr. KL Biakchungnunga

• Dr. KL Biakchungnunga

(Thu lakna : 17th April 2011, Thalaite Thian)

Pathianni hmasà, April 10, 2011 DMI Inkhâwmah khân Sande Sikul zirlai 4-na, “Rinna avanga thiamchanna” tih Galatia 3:1-14— Pu V.L.Luaha’n min zirtir a nih kha. Zirlai pawimawh tak a nih avângin kan ennawn leh dawn a ni.

Dân avânga thiamchanna:

Vânrama lùt turin thiamchanna kan neih a ngài a, Pathian rorêlnaah “not guilty” kan nih a ngài. Eden huana Evi leh Adama bawhchhiatna avângin, mihring zawng zawng hi thiam loh chang tawh sà (guilty) kan ni vek. Thiamchanna chi hnih—‘Dân avânga thiamchanna’ leh ‘Rinna avânga thiamchanna’ Paula hian min hrilh a. A hmasa zâwk hi, Mosia Dân zawm hrâm hrâm avanga thiam chan tumna a ni. Pathian rorêlnaa thiamchang ni tùr chuan Mosia Dân zawng zawng hi kan zawm vek a ngâi a, Full mark (100%) kan hmuh a ngài. Thiamchanna nei khawpin tumahin full mark kan hmu thei lo tih chu Paula’n min hrilhfiah a tum ber a ni. Mihring mihrinnaa fel hrim hrim an awm. Têt te aṭanga thil sual engmah ti lo—zûk leh hmuama fihlim, zu in ngâi lo, ruihtheihthil engmah ti lo, sex laka fihlim, nu leh pa thuawih, inkhâwm ṭhulh ngâi lo, Bible chhiar peih tak, ṭawngṭai peih tak, Kohhrana inhmang tak—pawh ni ila, Pathian rorêlnaah thiam kan chang dawn chuang lo.

Rinna avânga thiamchanna:

Eng anga mifel leh ṭhà, sawisêl tur awm lo khawpa mi ṭha famkim pawh ni ila, Hremhmuna kal tûr tho tho kan ni. Pathian tehnaah tumah hi kan tling zo lo (Rom 3:10-18). Mihring tumna leh insûmtheihna, kan felna leh ṭhatna avâng hian tumah Vânramah kan lût thei lo. Chuvângin, Pathianin a Fapa Isua Krista a rawn tir ta a ni. “Mi tirtu duhzâwng tih leh, a hna thawh zawh tûr hi ka chaw a ni,” (Johana 4:34) titu, Isua Krista chuan Mosia Dân zawng zawng chu a rawn zâwm famkim thlap a, Full Mark (mark 100-ah mark 100) a rawn hmu ta a ni. Chu Isua Krista chu nangma tana lo kal, keima tana lo kal a ni. Kan tân a rawn piang a, kan tân Mosia Dân a zâwm a, kan tân a thi a, kan tân thihna hnehin a tho leh a ni. Chuvângin, Isua Krista tel lovin thiamchanna kan nei lova, Isua Krista tel lovin Vânramah kan lût thei bawk lo (Johana 14:6).

Isua nena Inneihna:

Nula pakhat Chêmteii a awm a. A ‘aim in life’ chu officer niha, America rama awma, in ṭha tak neiha, khawvêla Car man to ber Buggatti Veyron sen ngat khalh zar zar a ni. Mahse, theihtâwpa lehkha a zir chung pawhin Matric pawh a pass thei lo. America rama awm tumin Passport a siamtir a, mahse, America rama luh phalna VISA erawh a hmu thei tlat lo. Mak tak maiin, America ram aṭangin Mizo tlangvâl, American citizenship nei thlap, officer ngat, America rama in leh lo nei, Car dang bâkah Buggatti Veyron ringawt pawh panga lai nei tawh hian Chêmteii chu nupui atân a rawn dil ta tlat mai a. Tichuan, an innei ta a, America ramah a hruai thla ta a ni. A pasal in ropui tak mai saknaah chuan Chêmteii chuan thlan far khat pawh a sêng lo. Mahse, “Ka in” a ti thei ta tlat. A pasalin hah taka a hlawh chhuah aṭanga a lei Buggatti Veyron car sen var mai pawh chu, “Ka car” a ti ve thei ta tlat a nih chu. A intih neitu poh leh, a pasal chu a lâwm zâwk mah lehnghâl!!!. “A nuamah pawh, a hrehawmah pawh…” tia a pasal nena inneihna thû an thlun tawh avângin, a pasal nihna leh dinhmun, a in leh lo leh thil neih zawng zawng chu Chêmteii tâ a ni ta vek mai a ni.

Isua Krista rinna kan tih hian, Isua Krista nena inneihna a ni. Isua Krista nena kan inneih tawh chuan—a felna, a thianghlimna, a thihna leh thawhlehna te chu—ka felna, ka thianghlimna, ka thihna, ka thawhlehna—kan ti ve thei ta a ni. A va ropui êm! Isua Krista chu fakin awm rawh se! Duh taka Krista neitute hnênah hian Pathianin Thlarau Thianghlim a pe ṭhin a ni. “Krista chu kan aia anchhedawng lo niin, Dân ânchhe lak ata min tlan chhuak ta; (“Thinga khaikàn apiang chu ânchhe dawng an ni,” tih ziak a ni si a); chutichuan, Abrahama chunga malsâwmna chu Krista Isuaah chuan Jentailte chungah a lo awm thei ang a; tichuan rinna avângin Thlarau tiam chu kan hmu thei ang.” (Galatia 3:13, 14).

Keimah ka ni tawh lo..

Inngaihzâwnna ringawtah pawh hian kan bialnu leh bialpa te ngaihṭhatlohna tura awm hi kan hreh hle a nih hi. Pasal nei tawh hnuah phei chuan, pasalte ngaihdân a ni lo palh ang tih hi an nupuite chuan hlau êm êm a ni. Duh aia an lên chhuah rei pawhin, an pasalte’n khawiah nge an awm tiin an lo zawng palh ang tih an hlau va, an awmna chin tal hrilh lo chuan ngaihngam takin an awm thei lo. Pasalte hriat loha tlangvâl nena Cinema en te, Pub vela lo kal daih te phei chu nu pângngâi îk chuan an ngam lo. Anmahni hringtu nu leh pa emaw, an pianpui unaute in pawh ni se, pasalte phalna la hmasa lovin zan khat pawh an riak bo ngam lo. “Keimah ka ni tawh lo, keimahah hian ka pasal/nupui a awm ve tawh tlat..” tih hi kawppui nei tawhte testimony a ni ngei ngei ti ila, thu uar lutuk kan ni lo vang. Krista nên an inneih tawh tlat avângin, Paula paw’n, “Krista hnênah khenbehin ka awm ta; nimahsela ka nung a ni; keimah erawh ka ni tawh lo. Krista chu keimahah a nung tawh zâwk a ni..” (Galatia 2:20) tiin a sawi tih zirlai pathumnaah kan zir tawh kha. Helaia ‘khenbehin ka awm ta’ a tih pawh hi—‘Isua nên kan inzawm tlat tawh’ a tihna ni theiin a lang. Mizo upa ṭawngkam han hawh ta ila, “Krista nên kan in-bahra-ngul-zem tawh” a tihna a ni.

Tisa pumkhat an ni tawh ang:

Kan thil neih nên hian chhûngrilah inzawmna kan nei tlat ṭhin. Sum tam tak sênga i lei, i Car kha miin tubohin lo chhu khuar dûk mai se, i na vawng vawng ang a, i thin pawh a rim hle ang. Hmangaih tak leh duh taka i neih i nupui kha miin lo pâwngsual ta se, i nun pumpui a buai zo vek ang a, zânah i muhil thei lo ang a, i na vawng vawng ang. Krista nêna kan inneihna hian Amah Krista nên min zawm tlat tawh avângin, kan natnaah Krista a na ve ṭhin a, kan lâwmnaah pawh a lâwm ve ṭhin a lo ni.

Upa Dr. KL Biakchungnunga hi April 23th 1964 ah Rev. KL Vanngaia leh Pi Tlangmawii te inkarah a piang a. Zirnaah hian a graduate hnu-ah Pathian thu lamah pawh sulhnu neiin M.Div a zir zo va, M.A, M.Phil tha taka a zawh hnuah Ph.D pawh tha takin a zo leh a ni. Kum 1996 atangin Baptist Higher Secondary School (BHSS) ah Mizo subject a zirtir a, kum 2003-2008 chhungin Headmaster hna a chelh bawk. A lehkhabu chhuah te zinga mi hriat hlawh zual chu ‘Point of view – Volume I,II,III’ te an ni.