Tirhkohte Thiltih Zirlai 17-na. Tirhkohte 3:11-16

TIRHKOHTE 3:11-16 MIZCLBSI

Tin, ani chuan Petera leh Johana a la vawn reng laiin mipui chu Solomona hulhliap an tihah chuan an lo tlân khâwm a, mak an ti êm êm a. [12] Peteran chu chu a hmuhin mipui hnênah chuan, “Nangni Israel mite u, engati nge hei hi mak in tih? He mi hi keimahni theihna emaw, kan ṭhat bîk vâng emawa kan kaltîr ang êm chuan engati nge min en reng? [13] Abrahama Pathian, Isaka Pathian, Jakoba Pathian, min thlahtute Pathian chuan a chhiahhlawh Isua a chawimawi ta a nih hi. Ani chu in mantîr a, rorêltu Pilatan chhuah a tum pawhin in hnial tlat a nih kha. [14] Mi thianghlim leh fel tak kha in duh lo va, tual that kha chhuahsak che u in ngên ta zâwk a. [15] Nunna petu chu in thahtîr a; nimahsela, Pathianin ani chu mitthi zîng ata a kaitho leh ta a, chumi thuhretute chu kan ni. [16] “Isua hminga thiltihtheihna leh chu hming rinna chuan in hmuh leh in hriat ṭhina hi a tidam ta a; amah rinna avâng chuan he mi hi in zaa in hmuh ang hian a dam ta viah a”.

Sawi Zauna: Pentecost ni a Thlarau Thianghlim a lo thlena Peteran a sawi fiah ang chiah khan, kebai lo dam ta avanga mak ti a mipui rawn tlan khawmte hnenah Petera chuan thil awmzia a sawi fiah leh ta a. Pentecost ni a Thlarau hnathawh uain an rui emaw an tih ang deuh khan, kebai ke a kal ta chu Petera leh Johana tih dam emaw an ti a. Kebai ti damtu tak, thiltihtheihna neitu chu an biak thin, a hnena an inthawina an hlan thin, fakna hlate an hlan thin Pathian ngei kha a ni a. Chu Pathian chuan Isua hmingin kebai a ti dam ta a ni, tiin Petera chuan a sawi fiah a. Isua chunga an thil tih chu a sawi leh ta phiar phiar mai a ni. Isua nihna Peteran a tar lante chu: Pathian Chhiahhlawh (Isaia bu a Lalpa chhiahhlawh. Isaia 42, 49, 50, 52, 53), Mi thianghlim leh fel tak, Nunna Petu tihte a ni. Abrahama, Isaka leh Jakoba-te leh anmahni ngei pawh lo hruaitu Pathian chuan tunah enge a tih tak a, eng tiangin nge a inpuana a in hriattir tak tih ngaihtuah turin a ti a ni. Pathian mi ruat, a hriakthih Isua chu mitthi zing ata kaihthawha awmin, Isua hming rinna avangin kebai chuan damna a lo chang ta a ni. Thuthlung Hluia Israel fate hruaitu, kawng hrang hranga in hriattir thin Pathian ngei kha, tunah chuan Isua-in a rawn inpuang chhuak ta a ni.

Ngaihtuah atan:

29. Isua thihna leh thawhlehnaa mipuite thil tih, an part play leh Pathian hnathawh heta lo lang hi enge?

30. ‘Petera chuan, “Tangka leh rangkachak eng mah ka nei lo; nimahsela, ka neih chhun ka pe ang che, Nazaret Isua Krista hmingin kein kal tawh rawh,” a ti a. A kut ding lam a vuan a, a kai tho va, a ke leh a kheimit te chu a lo chak ta nghâl a,’ tih kan hmu a. (Chang 6,7)

Chang 12-ah, ‘Peteran chu chu a hmuhin mipui hnênah chuan, “Nangni Israel mite u, engati nge hei hi mak in tih? He mi hi keimahni theihna emaw, kan ṭhat bîk vâng emawa kan kaltîr ang êm chuan engati nge min en reng?’, tih a awm bawk a.

Chang 16-ah, ‘Isua hminga thiltihtheihna leh chu hming rinna chuan in hmuh leh in hriat ṭhina hi a tidam ta a; amah rinna avâng chuan he mi hi in zaa in hmuh ang hian a dam ta viah a,’ tih a awm bawk a.

He kebai damna tura Petera tih ve, a role a play hi enge ni ta ber le, enge i zir chhuah, ringtu i nihnaa i tih tur zir chhuah i nei em, i tih theih chin leh theih loh chinte i hre thei em?