2. Rorelna dik lan chhuah dan hrang hrangte
He’ng thupuite hi Bible mil rorelna dik ang kawng liin a lang chhuak ṭhin a. Bible mil rorelna dikah chuan thilphalna zau tak, mi zawng zawng intluktlanna, nun thlak danglam khawpa mi dinsak ngamna leh mawhphurhna inbuk tawk lo deuhte hi an tel vek a ni.
THILPHALNA
Bible-a rorelna dik lan chhuahna hmasa ber chu thilphalna zau takah hian a ni. Lei lam danah individualism chuan i sum chu i ta a ni a tih laiin socialism chuan i sum chu Ram ta a ni a ti ve thung, mahse Bible chuan i sum zawng zawng chu Pathian ta a ni a, i enkawl atan a hlan mai che a ni (1 Chronicles 29:14; 1 Korinth 4:7) a ti. Luka 16:1-16 ah Isuan sum enkawltu fing ni turin min ko a. Heta enkawltu hi a neituin a aiawha enkawltu tura a dah a ni a, hotu a nih rualin chhiahhlawh a ni tel bawk. Chuti angin kan sum pawh hi kan ta a nih rualin kan ta a ni lo a nih chu.
Heti ang thil kan hmuhna pakhat chu Mosia danah khan a ni. Rukruk hi thil dik lo a ni reng, mi sum emaw neih thil emaw laksak hi an dikna chanvo rahbehna a ni. Chutih rualin dan tam tak chuan he’ng neitu nihna chanvote hi thu tawp an ni lo tih an tilang ve bawk. Sabbath kum dan chuan kum sarihna zelah leiba zawng zawngte chu ngaihdam tur an ni a ti a (Deuteronomy 15:7-10). Chu aia la phal zau zawk dan chu “Jubilee” kum dan kha a ni. Kum 50 zelah ram chu a neitu pangngai hnenah kir leh tur a ni (Leviticus 25:8-55). Chawh rualin mimal tin emaw chhung tinin emaw dam chhungin vawi khat tal bul ṭan ṭhatna hun an nei zel dawn a ni, leiba lo ngah eng ang mah se.
Buh seng chungchanga dante an awm leh a. Lo neitute chuan nakina thil ṭha ti hming puin an hausakna aṭanga mi retheite ṭanpuina tur hlep tam tuma hlawkna umin an vau femte thlengin buh an seng vek tur a ni lo. Lo neitute chuan an buh thar ṭhenkhatte chu an seng bang tur a ni a, he’ngte hi an hlawhfa chhawrte bakah mi rethei, a mamawh apiangten tha thawhin an rawn seng ve zawk ang (Leviticus 19:9-10; 23:22). Deuteronomy 24:19 chuan he’ng buh seng tur an zuahte hi “ram dang mi te, pa nei lo te, hmeithaite ta tur a ni” a ti a. Heta Hebrai ṭawnga “ta tur” tih hman thumal hi neitu nihna tilangtu a ni. Pathian chuan kan sumdawnna aṭanga hlawkna kan tel ṭhenkhatte hi chu kan ta ni lo vin pachhiate ta a nih thu a sawi a. Hei hi chhiartuten socialism ang riauva kan hriat loh nan Deuteronomy 23:24-25 a lo lang a, lo neitu chu duham taka a neih rawn ei tumtute lakah a rawn veng leh hlauh bawk a. Mosia Dan hian rosum zawng zawng insem liam liam lam ngawr ngawr a kawk lo va, khawtlanga nihna sang leh hniam nuai bo ngawr ngawr pawh a kawk chuang lo. Heti anga thilpek inpek hi duh thlannaa inpek a ni lo va, ram inrelbawlnain a sem pawh a ni hek lo.
Pathian thu thiam Calvin-a te angho khan Mosia Dana hausakna leh rorelna dik chungchanga Pathian thute kha an la ding zel tih an sawi a. Bible zirmi Craig Blomberg chuan he’ng dan phena rosum thlir dan lo langte hi tunlai dan emaw hmanlai dan emaw nen hmehbel theih an ni lo tih a sawi ve bawk. Jubilee leh sabbath dante hian sum lu neitu nihna dante hi capitalist ramin an thlir dan angin an pawm ve lem lo. Lehlamah kan hmuh tawh angin Ramin neitu nihna a hauh leh insem tlan vek tih lam chu a lang chuang lo. Blomberg-a hian Bible chuan, “…mi kutkawih hausakna pawisa hauh lova Ramin a chuh tlat leh khawtlang ngaihtuah lek lo va mimal inchhek arbawmna ang hi a do tlat a ni” tiin a ziak a. Chuti ang aiin Pathian leh ṭhenawm hmangaihna avangin “Mi fel (saddiq) chuan khawtlang hlawkna turah chuan mahni hlawkna tur a dah ṭha a, mi sual erawh chuan mahni hlawkna turah chuan khawtlang hlawkna tur a dah ṭha thung.”
Chu vang chuan zau taka thilphalna hi khawngaihna lam thu ni lo vin rorelna dik lam thu a ni zawk kan ti thei ang. Ezekiela 18:5 hi mi fel, saddiq, chuan rorelna dik a nunpui thuin a inṭan a, chu chu miin he’ng thilte a tihlan dan sawm leh pakhatin a chhunzawm zui bawk. Chu’ng sawm leh pakhat zinga pakhat pawh tihhlawhtlin theih loh chu rorelna dik hlen lo nihna a ni a, chu’ng zingah chuan “rilṭam hnena ei tur pea, saruak puan silhtir (chang 7)” tih te an tel. Uikawm chu rorelna dik hlen lohna a nih chu. Joba 29 leh 31, Isaia 1 leh 58 pawhin he thu bawk hi a ni an sawi ni.
Luka 12:16-21 ah Isuan mi hausa a chungchang tehkhin thu a sawi a, “Pathian lama ngah” si lo vin ama tan ro a lo khawl khawm vak mai a ni. “Pathian lama ngah” chungchang Isuan a sawi chiang a, a awmzia chu “Pawl tlemte u, hlau suh u; ram pek che u hi in Pa lawm zawng tak a ni. In neih apiang hralh ula, mi retheite hnenah pe rawh u” (Luka 12:32-33) tih hi a ni. Chhuitute chuan “in neih apiang” tih hian neih zawng zawng a kawk lo va, chutih rualin inpek ralna tel hauh lo va pek pawh a kawk chuang lo tih an sawi.
Socialism leh libertarianism te chuan mi retheite hnena pek chu a “sir sawn” zawngin an dah a. Left lamah chuan sum hi Ram ta a ni a, mi retheite hnena pek chu duh vang renga pek a ni kher lo ang. Right lamah ve thung chuan sum chu mahni ta bil a ni a, mi retheite hnena pek chu mahni duh thu leh phalna a ni ang. Bible-in min zirtir dan erawh chuan a “chunglam kawk” zawng a ngai pawimawh ber a, chu chu Pathian nena inlaichinna sawina a ni. I sum chu i ta liau liau a ni a, tu mahin an chhuhsak tur che a ni lo. Chutih rualin Pathian leh i ṭhenawmte lakah mawhphurhna i nei a, i sum chu mahni hmasial lo leh thilphalna zau tak nen, i theih ang leh an mamawh ang zela mi dangte hmangaih nana hman a ni.
chhunzawm tur
*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world. He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/
Discover more from NUN HRUAITU
Subscribe to get the latest posts sent to your email.