Editorial: ISUA HMEL  — Jessy Vanlalrovi

RP&NTI tih hming a put lai ani a, tunah chuan RIPANS tih alo ni ta. Nursing hostel ah chuan kan ṭhu dar dar a, zan lamah kan ENF worker Pi Lianhmingthangi (L) thusawi turin a lo kal dawn a, kan phur ru hle mai. A lo kal a, thu a sawi ta a, chu a thusawi chu zanin dar 1:15 AM a article ziah tum mek hnenah hian nitin a thar zual zel ṭhin: “In dam lo te hmel ah Isua hmel hmu ru”, tih tê mai hi. A sentence hi tawi viau mahse chhiartu duhtak, tun a he thu ziak mektu hian nursing line ah a hna harsa a tih chang pawha amah kai ngiltu ah a hmang ta fo mai. 

AIIMS ka zawm hlim khan vaiṭawng ka thiam si lo, Eye Department ah evening duty leh night duty kha mahni a duty a ngai ta si, kan va huphurh tak. Chutah ṭawngṭai nen khan ka ṭang nasa ṭhin khawp a, “Khun check ke pele kuch nai khana”, tih chauh thiam khan kan duty a, mahse ṭawngṭai nasat kha chuan mak deuh mai hian English leh Hindi thiam kawp min puitu tur a hmunah an lo awm leh nawlh ṭhin. Pathian awmpuina a hlu ṭhin, damlo te’n an na an han sawi hian kei ṭawngthiam lo ta kha chu an khum bul ah va kalchilh khan an lu ringawt te kha ka va dawm a, an chezia aṭang khan an natna lai hriat theih takin ti khan an lu te ka va chul a, kha ringawt pawh kha anni chuan an lo lawm viau mai. Hindi thiam tak zawk kan u te bul a kal ai khan na neih pawn ka bulah an rawn sawi ta zel mai a, kan thinlung ah kan lainat hmel kha an tan damdawi a lo tling hle mai. Chutiang bawkin healthcare lam ah vek thawklo mah ila, kan bul hnai a awm te kan dawnsawn dan leh biak dan hian kawngro a lo su thui hle mai ṭhin. Mahse Delhi ah kan han awm rei a, kan han inring tawk tih ah chiah hian Pathian ka lo au tlem ta viau mai. Hei tak hi ani pawi ta ṭhin. Kei pawh nasa takin ka inthlahthlam a, kan u pakhat chuan ‘gold nei lo mah ila plated gold hi han awrh ila, han thau deuh hmak bawk ila, mi in thil min rawn zawh te hian lu han thing deuh mat mat ila, kan zahawm riau’, a tifiam ṭhin a, chu chu ka awih ṭep hman a, thau kha ka pawi ti vak lo a, lu han thin met met lah ka zei ṭan riau, mahse hei hi ringtu nun ah chuan a apply chi vak lo tih ka hrechhuak a. A tir a kan sawi lan, ‘Isua hmel hmuh’ tih khi apply a lo va ṭul tak em tih ka hmu chhuak ta zel a, damlo thinchhe takte, tin thingtlang lam ‘bal ṭawp’ tak tak te kan lo tawng anih pawhin an hmel ah khan Isua hmel hmuh kan zir ta zel a, hei hi ka tan a hlu chho ta zel a ni. Mahse tiṭha emaw kan intih viau lai chang pawhin kan lo tlin loh zia kan hre zel tho mai. Ṭum khat chu kan damlo hi OT a luh dawn pawhin a chhungte kha an lo la thleng lova, a thinrim lutuk khan file pawhchhiat a tum a, khatia min rawn vin ta vel vak vak chu ka lo thinrim ve ṭan tak der lai chuan, kan u Nurse ve tho khan a thlem a, a hnem ta melh melh a, chutah damlo ringlo mi ni si chuan ‘Madam, Kristian i ni em ni?’, a ti ta hlawl mai, kan u chu Kristian niin Pathian thu a khat leh thlarau mi em em kha a ni a, a awmdan aṭang chuan ringlo mi pawn Isua hmel a hmu ta reng ani. Chutah chuan keipawh ka harh chhuak leh phut a, a rilru tawt hreawm kha lo hmuhsak thiam ila, min vin vak vak vang a va thinrim ve ai chuan, hriatthiamna nen a kan lo dawnsan khan ani pawh chawp leh chilh khan a thinrimna te kha a reh ta mai kha ani dawn si a; chumi ni chuan zirlai ropui tak ka chhar belh a, keipawn ka ṭan lakna leh insiam ṭhatna tur ka hmuh belh ni a ni ta reng ani. 

Engpawh chu nise, hei hi ka chiang ta—thusawi (sermon) ka thiam lo anih pawhin ka nunah hian Isua hmel mawi ka ti lang thei tih hi. Ka kalna hmun hrang hrang ah Isua hmel mawi tak chu ka ti lang thei tih hi ka chiang ta. Chutiang a ti thei tur chuan mite hmel ah Isua hmel hmu tlat ṭhin ila, Pathian kan hmangaih anih phawt chuan a hmel mawi kan hmuhna te chu hmangaih takin kan dawngsawng ngei ngei dawn ani. 

Jessy Vanlalrovi hi tunah Senior Nursing Officer niin, AIIMS New Delhi-a Dr. Rajendra Prasad Centre for Ophthalmic Sciences (Eye) a thawk mek ani e.