Tirhkohte Thiltih Zirlai 10-na, Tirhkohte 2:15-21 – Dr. A. Zothansanga

TIRHKOHTE 2:15-21 MIZOVBSI

Hêngho hi in rin angin an rui lo ve, fehrehsân lai chauh a nih hi. [16] Hêng hi zâwlnei Joelan a sawi kha a ni zâwk:

[17] ‘Pathianin, Ni hnuhnûngahte chuan heti hi a ni ang a, Mi zawng zawng chungah ka Thlarau ka leih ang a; Tichuan, in fapate, in fanuten ka thu an hril ang a; In tlangvâlten inlârnate an hmu ang a, In putarten mumangah an mang ang a. [18] A ni, chûng nîahte chuan ka bâwihpate, ka bâwihnute chungah pawh, Ka Thlarau ka leih ang a, ka thu an hril ang. [19] Tin, chung lam vânah thilmak te, Hnuai lam leiah chhinchhiahna te ka hmuhtîr ang a; Thisen te, mei te, meikhu hu te nên: [20] Nî thimah a chang ang a, Thla thisenah a chang ang a, Lalpa ni ropui tak leh hmingthang tak chu A lo thlen hmain; [21] Tin, heti hi a ni ang a, Tu pawh Lalpa hming lam apiang chu an him ang, a ti e,’ a tih kha.

Sawi Zauna Ni hnuhnung, last days tih hi hun thu sawina a nih rualin, a tawpah chuan, a tum ber chu, a tak tak chu tihte pawhin a hriatthiam theih a. Movie a a tawpa a changtupa-in misualpa a hnehna tura last fight ang hi a ni, ti te pawhin a hriatthiam theih awm e.

Hebrai bu tanna kha, ‘Pathian, hmasânga thlahtute hnêna bung tam tak leh kawng tinrênga zâwlneitea thu lo sawitu khân, hêng ni tâwpah hian keimahni hnênah a Fapaah chuan thu a sawi ta,’ tih a ni a. Isua hi a tawp, a tum ber, a ropui ber, a dang awm leh tawh lo tur, ti tein a sawi theih a ni.

Tichua ni hnuhnung tih chu Lalpa Isua rawn lan atanga tan, a lo kal leh thleng sawina a ni ta a ni. Ni hnuhnung tih hi Isua nena inthlun zawm tlat a ni.

‘Tu pawh Lalpa hming lam apiang chu an him ang’: ‘Lalpa’ tih sawi sawi lam a ni lem lo. Kan hriatthiam dan tur kawng khat chu Davida’n Goliatha a hmachhawn a, ‘Nang zawng khandaih te, fei te, feitê te kengin i lo thawk a; kei zawng sipaite Lalpa, Israel sipaite Pathian, i chova hmingin ka lo thawk zâwk a ni,’ (1 Samuela 17:45) a tih a, Pathian hmachhuana a hmachhawn ta ang kha a ni. Goliatha chu a chakna, a lenna, indo mi a nih a a experience hmachhuanin a thawk chhuak a. Davida erawh chu Pathian rin chhanin a thawk chhuak a, Lalpa hming a lam a ni.

Ngaihtuah atan:

16. Tute hnenah nge Pathianin a Thlarau a leih tak, duh loh emaw, hmaih palh emaw a nei em?

Thlarau Thianghlim chang vein i in hria em?

17. Lalpa hming lam apiang an him ang, tih hi i hriatthiam dan han sawi zau teh? Lalpa hming i lam ve thin em?