LUNGAWINA – Lalchuangliana

“In thil neih chhun chungahte lungawi rawh u.” ( Heb.13:5)

Hman lai Kohhran hruaituten  thihpui tham sual lian pasarih (7 Mortal Sins) nia an sawi thin chu : chapona, duhamna, itsikna, thinurna, zauthau, chaw heh leh dawngdah te an ti thin. Heng sual lian nia sawi thin bul hi enge ni ang tih ngaihtuah ta ila, lungawilohna hi a ni mai awm e. Miin min tham lova kan hriat  azarah kan chapo hlauh va, engkim mai duh tawk nei lovin a aia tam leh sang leh ropui kan duh vangin kan lungawi thei lo va. Mi dang anga  hausa, hmeltha, thiam leh thei nia kan inhriat loh vangin mi kan itsik a. Kan zauthau leh chakna ti rehtu kan hmu lo va, kan ei leh in ah duh tawk kan hre lo va, lungawi lohnain ‘a sawt chuang lo,’ tiin mi dawngdah leh zelthelah min siam bawk thin. Tirhkoh Paula angin, “….lungawi zel ka ching tawh si a,” ( Phil 4:11) ti thei ila chuan heng sual lian pui pui hi kan hneh thei dawn a lo ni.

Hman ni chu thiante nen kan titi honaah “Nangni in rawngbawlnaah hian sum indaih lohte in nei thin em?” tiin min zawt a. Fiamthu titak deuh hian, “Chutianga indaih loh kan nei ngai lo. Kan neih ang hi kan hmang mai a, hman chuan a awm lo va, indaih loh pawh a awm lo,” tiin ka chhang a. Ka ngaihtuah zui ta zel a, hetianga rilru kan pu hi kan hlimna leh lungawina, mangang leh lungngaia min awmtir ngai lotu chu a lo nih ber hi tiin Lalpaa ka lawmna leh thlamuanna chu nasa taka belhchhahin a awm a. Tute tihdan ang deuhin, ka lawm veng veng ni ber hian ka hria. Sum leh tanpuitu chu kan mamawh na meuh mai. Lalpa kan dil a, kan dil ang zawng zawng hmu lo mah ila kan  mamawh ang tawk chu kum hei leh chen hi min lo pe tawh a. Leiba kan nei miah lo va, kan neih loh chuan kan hmang lo mai a. Lalpa ramah phei chuan
keini chhiahhlawh ve mai te hian a neitu ang hrima lo lungkham chiam hi a tul lo a nih hi tih te ka ngaihtuah ta zel a. Lal Isua zarah ka hma a eng tih ka hre bawk si a, ka lung hi a awi em em hian ka inhria a, ‘a va ropui em’  tih mai loh chu sawi  dan tur dang pawh ka hre lo.

Sum leh pai leh in leh lote kan mamawh a. Amaherawhchu mi tam takin kan duh leh nei tura theihpatawp chhuaha kan beih hi kan mamawh lem loh an lo ni fo mai. Kan duh kan mamawh si lohte hi min tibuaitu lek an ni duh. Fiamthu titaka an sawi hi dik maw… Mizoramah chuan BPL chhungkua TV tha ve tawk tak nei lo hi an awm lo, an tih hi.  TV an nei hi an lawmpuiawm a, mahse Electric Bill leh TV pawh man a lo awm zel si a, TV thar an faten an ngen leh bawk si ang a. Mi ang nih ve loh vanga lungawi lohna tam takin a tlakbuak ngei ang. Chutiang zel chuan cheng nuai tam income neite pawh kan ni tho ang.

Hahdam leh lung muanga kan awm theih nan kan neih chhun chungah lungawi i zir ang u.