“Rinna in Abrahama chu kohva a awm lai khan, a rochun tur hmuna lut turin kal chhuah thu a pawm ta a; tin a kalna tur lam pawh hre lovin a kal chhuak ta a.” Hebrai 11:8
Thil thleng kha han mitthla teh: A thil lo hriat tawh zawng zawng hmawra dinga, hmun ruak zau tak ngawt mai Abrahama’n a thlir lai chu. A hnungah chuan ropuina el zawh rual loh nei Ur khua chu a awm a; a in te chu van hawlha sang, a bang te chu sut tlang zawh rual loh, a kawtthler te pawh engkim a nih dan tur thlap anihna, mihring nunphung leh khawtlang inrelbawlnain a thlen chin sang ber a thlenna hmun, nawmsakna avanga mite an inthlahdah zawh tawhna hmun chu. A hmaa inpharh duai erawh…engmah. Kawlkil ruak. Thlaler tawp chin nei lo. Hriatloh ram chiah chu.
Mahse Abrahama chu khawvel finna zawng zawng kalh van lam hriattirna zawng mai vuan chungin, thil theihloh kawngkhar bulah chuan a ding a.
Pathian in thu a lo sawi a ni.
“Chhuak rawh”.
“Remchanna tha zawk hmu turin chhuak rawh” tih lam a ni lo; “Thil hlauhawm a lo thlen dawn avangin chhuak rawh” tih lam pawh a ni hek lo. “Chhuak rawh” tia nawrna a ni tawp mai. A mihring finna zawng zawng nena chhutin Abrahama chuan thu dang hriatbelh a duh ngei ang. Khawi lam panin maw a chhuah ang? Eng atan nge a chhuah ang? Eng vangin nge a chhuah ang? Mi huaisen lo deuhte chuan Pathian chu dawr phet an tum ang a, thil ti thlap thlap mite chuan thu thar dang an nghak ang a, mi hlauthawng mite chuan ngaihruatna maiah an puh ang a, thinlung dawih mite chuan midang ngaih dan an ngaichang hmasa ang. Mahse Abrahama chuan hawi let hauh lovin thutlukna nghet a siam thung. Atthlak taka kalsanna a ni lo, hriatthiamna thuk tak a neih vang a ni zawk.
Abrahama’n a kalsan tak kha han ngaihtuah teh. Ur kha khawpui pakhat ve mai a ni lo; hmanlaia an Mumbai, Singapore, Manhattan, London ve a ni a sin. A awmzia chu Abrahama khan a hunlaia khawpui changkang lutuk tak mai kha puan in atan a thleng tihna a nih chu. Hriat sa ram chu hriat loh ram atan. Himna chu thil chiang lo ruai atan. Chianna chu thil sut leh mai mai theih loh atan (Hebrai 6:18 en la) [sut leh mai mai theih loh (immutable) a tih hi Pathian thuthiam leh a inchhalna (oath) sawina a ni; letlingtu hrilhfiahna]
Rilru tibuai tham thudik chu hei hi a ni: Abrahama kha a tim hauh lo.
Tih leh loh mai a rilruk lo a. Kar tam inbuatsaih nan hun a hmang lo a. Inthlah nan mite a tlawh kual vel hek lo. Bible chuan chiang takin tihian a nihna min hrilh: Pathianin thu a lo sawi a, Abrahama chu a che chhuak mai a ni. Hei hi rinna mitdel a ni lo; rinna pan ding lam nei, rinna mit var, a kawngchin hriat thlap aia Pathian awmpuina a pawimawh zawk ani tih hriatthiamna rinna a ni.
He thil timak zual leh em em tu chu Abrahama thil hriat loh te kha an ni. Hnam hrang hrangte pa a la ni dawn tih a hre lo a. A thlahte chu arsi aia tam an la ni ang tih a hre lo a. A hma zinkawngah chuan pa niin a fapa chu Moria tlangah a hlan a la ngai ang tih pawh a hre lo. Thil pakhat zawng a hria: Pathianin thu a lo sawi a, chu chu Abrahama tan a tawk a ni.
GPS khawvel, kum nga lo awm tur atana ruahmanna siama, chhiatna thleng thei tur kan inzir lawk thinna hunah hian, Abrahama’n Pathian kohna a chhan dan kha atthlak tak angin a lang a ni. Mahse chu tak chu Pathianin he thawnthu/chanchin a vawn that chhan niin ka hria. Nawmsakna avanga thlarau thuanawpna hmun ata min sawi harh turin leh rinna hi hriat loh ram kan dai hma chu rinna a ni tak tak lo tih min hriattir turin.
Tunlai Kristianna hian Abrahama thuawihna huaisen tak kha thu puarpawleng mai maiah a chantir zo tawh a. Khawvel sawinghing dawt thei a rinna te chu kan awm tinuam tawka min fuih phurtu maiah kan chantir a. Mahse Abahrama chanchin hi mi fuih phurtu a ni lo, min rawn ep tlat zawk a ni. Uluk taka kan lo din tawh kan inthlamuanna tawk lek rinna hi min thiahsak a, thlarau thila kan inham tanna thin te a rawn hailang zawk a ni. Isua ringtu tak tak tena an zir ngei ngei tur Abrahama hian a rawn hmuchhuak a, chu chu Pathianin thu a lo sawi chuan sawifiahna hian tangkaina a nei lo tih hi. Siamtu in marching order min pek chuan a chhanna awmze nei ber chu a thu awih nghal hi a ni mai.
Ringtu tin te hian an Ur hun (moment) hi an tawng vek a, van lamin kan nunphung a rawn tihbuai dawrh hun, Pathian kohna leh mihring nawmsakna a insut hun chu. Sum leh pai lam ngaihtuaha awmze nei map lo hna kan thawh zawk a ngaih hun te a ni maithei; emaw kan rilru in a inhuam piah lama midangte ngaihdam a ngaih hun te pawh a ni thei; rawngbawlnaa kawng inhawng, i huphurh ngawih ngawih te pawh. I Ur chu engpawh ni se, hei hi hre reng ang che: Abrahama rinna kha a thil hmuh theih hmanga teh a ni lo a, tunge a rin tih hmang zawkin a ni. Amah hriatrengna lung pawh mihring finnaah ni lovin Pathian rinawmnaah zawk phun ngheh a ni. Ur atanga Abrahama kochhuaktu Pathian vek khan thil theih loh te ti turin i awmna nuam tak atang khan a ko ve che a, zawhna awm ta chu a ruahmanna chuan i tan awmzia a nei em tih aiin, a mizia/a nihna vangin i ring ngam dawn em tih hi a ni.
Rinna hi hriat ngai loh atana thil hriat sa te kan thlah theih hma loh leh himna aia inhlan pumhlumna (surrender) i thlan hma loh chuan rinna a ni thei lo. Abrahama khan engmah awm lohnaah Pathianin a laka thu a tiam tih chauh loh chu ken luh a nei lo, mahse Pathianin thil engkimah a siam thung. Vanram lehkhabuah chuan hriatthiam famkimna aiin thuawih nghalna hi a buk a rit zawk zel a ni.
Enge i Ur chu ni ve ang le? Ral leh lam i hmuh theih loh vang maia Pathian kohna che hnial mek enge i neih? I rinna vanga miten i a ta em ni tih an zawh hnuhnung ber che kha engtik nge?
Hriat loh ram chuan a nghak a che. Pathian aw chu a la thangkhawk zel a ni: “Chhuak rawh” tiin.
I ip te chu i siamfel nghal dawn nge, Ur-ah him leh nuamsa takin i awm chhunzawm dawn?
“Chutichuan, Abrama chu LALPAN a hnena a sawi angin a kal ta a…” Genesis 12:4
Discover more from NUN HRUAITU
Subscribe to get the latest posts sent to your email.