Tirhkohte Thiltih Zirlai 6-na, Tirhkohte 1:20-26

TIRHKOHTE 1:20-26 MIZOVBSI

([20] Fakna Hla Buah hêng thu hi ziak a ni: ‘A awmna tihramin awm rawh se, A chhûngah tu mah awm suh se,’ tih leh, ‘A hotu nihna chu mi dangin chang rawh se,’ tih hi.)

[21-22] Chutichuan, Lal Isua, kan zînga lût ṭhîn, chhuak ṭhîna a awm chhûng zawnga, Johana baptisma achin, kan hnên ata vâna hruai chhohva a awm ni thleng khân, hêng min pâwl ṭhînte zîngah hian mi pakhat, a thawhlehna min hriatpuitu atân a awm tur a ni,” a ti a. [23] Tin, mi pahnih an ruat a, pakhat chu Josefa, Barsaba an tiha chu (a hming dang Justa an ti bawk a); tin, pakhat chu Matthia a ni a. [24,25] Tin, an ṭawngṭai a, “Nang, Lalpa, mihring zawng zawng rilru hretu, Juda chuan ama awmnaa kal tûrin hêng rawngbâwl leh tirhkoh hna a tlâwmsan hi, a ai awh tûrin he mite pahnih hi, a tu zâwk nge i thlan min hriattîr ang che,” an ti a. [26] Tin, ai an ensak a, an ai en chu Matthia chungah a lo tlu a; tichuan, ani chu tirhkoh sâwm leh pakhatte zîngah chuan chhiar tel a ni ta a.

Sawi zauna: Juda Iskariota thlaktu tur hian Isua baptisma chan atanga vana hruai chhoha a awm thlenga zui zeltu, zirtirte zingah tel zui ve zel anni tur a ni, an ti. He thlitfimna hi Thlarau Thianghlim hriattir an nih tarlan a ni hran lo. Anmahni hriatna, Pathianin a pek an common sense an hmang mai niin a rinawm. Hei hian mi tamtak a hnawl ang a, thlan chhuah pawh a ti awlsam sawt ang.

An thlan chhuahin a tih tur chu Isua thawhlehna hriatpuitu, a witness nih a ni. Witness chu thu hretu, a tul hunah a thil hriat puang chhawngtu a ni. Boaza khan Naomi ram a lei khan hriatpuitu a ruai tih kan hmu a. Mi thiam loh changte hi a tihsual hretu, hmutu, a witness-te hian kut an thlak hmasa ber thin. Mi thi tura a chungthu rel tur chuan hretu, witness pahnih tal an awm a ngai. Hriatpuitu dik lo chu an hrem thin bawk. Witness hi Greek tawng martus, martar tih atanga lak chhuah a ni a. Witness chuan an thu hriatte an thihpui ngam tur a ni tihna a ni.

Thum hi an vawr fo thin. Temple vengtu tur hriat nan 1 Chronicle 26 ah khan thum an vawr a. Jerusalema awm tur hriatnan Nehemiah 11:1 ah khan thum an vawr bawk. Mi thenkhat, ‘An tawngtaia thum an vawr leh tho si a, chuvangin an tisual a ni, Paula zawk hi Pathian ruat chu a ni,’ ti an awm. Vanramah Pathian thu dik chu kan la hria ang. Mihringte kan buaiin, kan ngaihdan a in ang lo thin. Pathian erawh a buai ve ngai lo va, a tum leh dun dan, a tha tih zawng a thlak ngai bawk hek lo.

A pawimawh lai chu Pathian an ringa, an tawngtaia, a kutah thutlukna an dah kha a ni. Mihring hian thutlukna siam lai, a tawpa thil thleng hi kan buaipui chawk thin. Davida chuan mi lian, mi chak Goliatha a hneh kha mite hriat chu a ni. Goliatha hneh tura Pathianin a hruaina kalkawng, nitin an in pawlna, a beram vennaa a lo humhim thinna, Pathian ringtu nun rei tak a lo neih tawhna, fianriala Pathian fiahna a lo paltlang tawhna zawng zawng kha a pawimawh lai chu a ni. Pathian ringa, tawngtaia thil ti an ni, tih hi a pawimawh lai chu a ni. Lalpa pawh kha zirtir 12 a thlan dawn khan zankhuain a tawngtai kha.

Ngaihtuah Zui atan:

10. Matthia thlang tur hian thum an vawr hi tha i ti em, engtiangin nge thutlukna siam se i tih?

(Mi 120 khan vote se, Zirtir 11-te khan thlang mai se, Petera kutah dah mai se.) Engtiangin nge thutlukna i siam ve thin?

11. Tirhkohte bung 1 hi uluk takin chhiar leh la, zir chhuah thar i neih te a awm em?