EASTER STORY

Ka hming chu Josephus a ni a, Jerusalema piang leh seilian ka ni. Ka pi leh pu, ka nu leh pate hian kan Juda hnam tungding leh tur hian Jehovan a mi ruat Messiah a la rawn tir dawn tih hi min hrilh thin a, chu chu nghakhlel takin kan thlir thin. Nikum Kalhlen Kut laia kan Puithiam leh hotuten an man, Isua an tih,  Rom sawrkar phalna laa kraws-a an khenbeh tak chanchin kha sawi sep sep a tam a, mipui ngaihdan a in
ang lo khawp mai a. Amah Isua khan Pathian mi ruat, ‘Messiah Pathian Fapa’ ti khan a insawi a. Kan hotute ang bawk khan Pathiana insiam tum, Pathian sawichhia leh  mipui bum tum ni khan ka lo ngai a, engah mah ka lo bengkhawn lo va. Mahse a chanchin zel leh amah zuitute ka han zir chian hian ka rilru a buai tlat mai a, a chhan thil pahnih a awm a.

Pakhat chu Isua kha a thih hnuin ni thum hnuah a tho leh tih hi. He thu hi Jerusalemah a thang nasa hle a, mahse mi tam tak angin kei pawhin ka awih lo va. Tichuan Gethsemani huanah ka han kal ta a, Isua an phumna thlan ngei chu ka han hmu a, thlanah chuan mitthi ruang a awm lo va, a ruak ngei tih ka han hre ta a. Kan thlahtute pawh an thi a, an thlante pawh a la awm a, Lal Davida thlan ngei pawh a la awm a (Tirh.2:29), mahse tumah an tho leh tih kan hre si lo. Hetia Isua thlan hi a ruak ngei a, mi thenkhatin an sawi angin a zirtirten ru chhuak ni se Jerusalem CID te hian an chhui chhuak tawh ngei ngei ang. Mahse Isua ruang an hmu si lo. Chutih laiin mi tam takin an hnenah a rawn inlar an ti bawk si. Chuvangin amahin a sawi ang ngeiin thlan ata a tho leh tih hi rinawm riauin ka hre ta a.

A pahnihnaah chuan, Isua chu thlan ata tho leh ni se, khawiahnge a awm ang tih hian min tibuai leh a. Mi ka zawt kual a, Lal Isua zirtirte kha Bethani khuaa Lazarate unau inah an awm thin tih min hrilh a, ka va zawng chhuak ve chawt mai a. An hotupa Petera pawh a lo awm hlauh a. Ani pawh hi kan hotute bawk khan lung inah an lo khung niin. A chhan lah chu, Isua kha a tho leh tak zet a ni tih a hril vang a ni lek a. Mak tak maiin Pathianin Petera  chu tan in ata a hruai chhuak a, hotute chu a hlau tawh viau ang chu tihnak alaiin, Isua hming avanga tihduhdah a tuar chu a lo lawm em em mai hi a lo ni a. Engemaw tak chuan a mawlh a nih hi ka tih lai chuan, Isuan a thih hmaa a sawi –  vana a chhoh hunah Thlarau Thianghlim Pain a rawn tir ang a tih chu a takin a lo thleng a ni, a ti mai a. An lo huaiin  Isua chanchin sawite chu an thiam ta em em mai a. Ka han zawh chian chuan, “Lal Isuan, ‘in hnenah ka awm zel ang’ a ti a, tunah hian kan hnenah a thlarauin a awm reng a ni, kan thinlung hi a chenna in a ni,” an ti mai a. Mak ka ti em em a, ka thinlungah hian an neih ang chu neia an hriat ang chu hriat ve ka chak ta em em a.
In neitupa Lazara pawh chu a thi tawh hnu Isua khan a lo kaitho leh niin. Isua chuan mitthi pawh a kaitho va, amah ngei pawh mitthi zing ata tho lehin  a nung reng a ni ang tih hi ka ring ta a. Petera chuan, “Unaupa, i rinna mit timeng turin Pa Pathian hnenah ka han tawngtai ang e aw, ” a ti a. Min han tawngtaisak lai chuan ka thinlung hi a mawih ta emaw ka ti mai a. A han tawngtai zawh chuan, “Lal Isu, keipawhin ka ring chea, dam chhungin i hnung ka zui ve tawh ang,” ka ti chhuak phawng mai a. Isua chu ka pi leh puten an sawi Messiah kha a ni ngei tih hi ka chiang ta em em a.

Hei kum khat dawn chu Lal Isua zuiin a thuhretu ka lo ni ve ta reng mai. Lal Isua lo chu thil dang engmah thlakhlelh ka nei ta lo.