KHAWVEL TILINGLETTU – Lalchuangliana

Steve Jobs leh a thianpa Steve Wozniak chuan Computer thlam tiat zeta lian chu bawm te tak te, dawhkana hun mai theih turah siam dan tur an ngaihtuah a. An thil neih zawng zawng, car leh furniture te an hralh a. Apple Company an din a, $ 1500 velin bul an tan a, an Garage chu an Factory leh Office a ni nghal a. Kum 1976 khan Computer an siam hmsak ber Apple I an tih chu hralh theihin an puitlin ta a, a manah $ 666.66 an chhiar a. Kha Computer kha tunah lo kawl tha ni la $ 500,000 in i hralh thei ang- ‘collector item’ a ni tawh. Kum 8 vel hnuah chuan an Company chu $ 569 million a hlu a ni tawh a, mahse an Company than a tawp ti tih ta mai a. Steve Jobs chuan an mamawh chu ‘management thiam’ a ni tih a hria a.

Chutih laia ‘company management’ lama thiam hmingthang chu John Sculley niin Pepsi Company CEO a ni a, kum khatah $ 10 million vel a hlawh a ni. Steve Jobs chuan John Sculley chu an Apple Company rawn zawm turin a sawm thin a, mahse John Sculley chuan a hnial tlat a. Chutih lai chuan Apple Company chu zawhte tiat ni ta se, Pepsi Company chu sakei tiat a ni si a. Steve Jobs chu a bei dawng duh lo va, John Sculley chu a sawm leh thin a, anin a hnial thla zel bawk a. A tawpah chuan Steve Jobs chuan tihian a zawt ta a: “John, i dam chhunga tui thlum zawrh nge i duh khawvel tih danglam dawrh?” ( Do you want to sell
sugared- water for the rest of your life or change the world?). John Sculley chu a inngaihtuah ta rauh rauh mai a, Apple Company chu a zawm ta nge nge a. An sawi thin angin, ‘the rest is history.’ a ni ta a ni. Kum 10 a han ral leh chuan Apple Company chu $ 8.3 billion a hlu a lo ni ta a, Sculley-in a zawm tirh let 1500 a lian a lo ni ta. Khawvel tidanglamtu an lo ni ta ngei a.

Paula leh Sila chu Chanchin Tha an hril zelna lamah Thessalonika khua an lo thleng a, Jasona inah an innghat a. Inkhawmna inah thu sawiin “Isua, a thu kan hrilh che u hi amah hi Krista chu a ni,” an ti a. Judaten an ngai thei lo nghal. Misual leh mipuite an fuihpawrh a, khaw hotute hnenah an hnuk lut a, ” Khawvel chawk buaitute kha hetah an lo kal a,” an ti a. (KJV Bible chuan, “…these that have turned the world upside down … khawvel tilinglet tute” tiin a dah.) An buai tak em avangin Paulate tan pawh a him ta lo va, a zan azanin Beroia khuaah an ral tlan ta hial a ni. (Tirhkohte 17: 1-10).

Khawvel tilinglettu Paula leh Silate chanchin hril vek chu Lalpa Missionary-ten kan Zoramah an rawn hril a, kan khawvel a rawn tilinglet ta. Siapsuap leh bawhtah kawr aiah Terrycot leh Wool thawmhnaw kan inbel a, thing leh mau-va sak in aiah concrete inah kan cheng a, sikul tih hming pawh hre lo kha Doctor, Engineer, MA, BA kan lo ni fur tawh a. Hlo thlawh, bal, bahra  leh mai aiah faisa, atta, maida…. kan thil ei pawh a hming kan hriat ngai loh – avocado, apple, orange, grep tih te a ni tawh. Khawlaia vawk, bawng leh ui nena tal mai mai khan kan mual leh kawngte chu ‘black top’ kher kan ti a. Chiang lo ruaia Pialral sawi ve thin, Pawla sai hlau reng reng khan chung van Jerusalem kan thlir tawh a. Sa leh ral kan hlauhte chu mang chhiaah pawh kan mang tawh lo. Kei ngei pawh hi ka nun tihlingletin a awm.

Thessalonika khuaa Chanchin tha lo lawmtute  nun danglam takzia kha Paula lehkhathawn Thessalonoka 1&2 ah han chhiar tha leh teh. ‘Tui thlum zuartu’ nih kumkhua ai chuan Paulate anga ‘khawvel tilinglettu’ nih hi i thlang ngei ang.

Pu Lalchuangliana hian India sawrkara a hna, IAS bansanin 1973 atang khan North India-ah Missionary in a thawk a. Kum 2025 khan hun puma Missionary hna chu a chawlhsan ve ta a. A nupui Pi Thansangi nen Zotlang, Aizawlah an cheng mek a ni.