CHHUNGKUAA RAWNGBAWLNA – Lalchuangliana

Introduction: Thil engpawh, pawimawh leh tha em em em te hi a Pathian thu bul (theology) kan man fuh loh chuan kawng dik lo lamah min hruaibo thei a. Entirnan: hmangaihna kan tihte pawh hi a theology a dik loh chuan khurbinnaah min hruai daih thei a, sum leh tangkate a pawimawh, mahse a theology kan man fuh loh chuan nasa taka min hruaibotu a ni thei a ni. Vawiina sawiho tura kan chhawp chhuah ‘Chhungkua’ kan tih te, ‘Rawngbawlna’ kan tihte pawh hi Pathianin a ruahman dan leh a duh dan hre lova, a theology dik kan man loh chuan Pathian tum leh duhna kan thelh duai thei a ni.

4th September 2011 khan SDMI inkhawmah Dr. K.L. Biakchungnunga khan ‘KRISTIAN CHHUNGKUA’ tih hi a sawi a. Ani aia sawi chiang thiam kan awm lo mai thei a; chuta a sawi hi han bih zawr zawr ila:

Pathianin chhungkua a din chhan:

1. Chi thlah, Amah Pathian ngaihsaktu a zawng (Malakia 2:15)
2. Khawvel tana malsawmna ni turin (Gen 12:1-3)
3. Krista leh Kohhran inpumkhatna tarlanna a ni (Eph 5:31)
   

Kristian chhungkaw nihphung leh awmzia:

1. Kristian chhungkua hi Kohhran a ni. Chu Kohhran lu chu Krista a ni (Mat.20:18; 1
   Kor.11:3; Eph. 5:23)
2. Nu leh pate hi an fate thutaka chawmtu tur an ni (Deut.11:18-21)
3. Kristian chhungkua chu an inhmangaih tawn leh inngeih dial dial tur an ni (1 Tim.5:8; Sam 133:1-3; 1 Jn. 4:20-21)
4. Hotu pahnih leh sum rawngbawltu ni lova, Pathian ram leh a felna zawngtu an ni (Mat 6: 24, 33)
5. An thupui ber chu Pathian rawngbawl a ni (Joshua 24:15)
6. Kristian chhungkuaah maichama mei a nung reng thin (Lev.6: 12,13)
7. Kristian chhungkua chu midang tan malsawmna a ni (Mat.5:13-16)
8. Kristian chhungkua chu Pathianin an thiltih sualah a thunun thin (Amosa 3:2)

Lehkhabu pakhat ‘Jukes-Edwards: A Study in Education and Heredity’ tih Albert Edward Winship-a ziakah chuan, chhungkaw pahnih, Max Jukes chhungkua leh Jonathan Edwards chhungkaw chanchin kan hmu a. Max Jukes hi 1700 kumah a piang a, Pathian awm ring lo (atheist) a ni a, piangthar lo nupuiah a nei a. Pathian hming lam ngai lohna chhungkua an din ta a ni. An thlahte 1200 an chhui zuinaah chuan:

1. 310 chu in leh lo nei lova vak vak (professional vagrants) an ni a
2. 440 chu bawnra tak leh dukdak lo taka damchhung hun hmang an ni a
3. 130 chuan Jail bang an zut a (7 chu tualthah vangin, average age 13 years)
4. 100 chuang zu ngawl vei an ni a.
5. 60 chu rukruk ching (habitual thieves) an ni a
6. 190 chu nawhchizuar an ni a.
7. 200 sumdawng, 10 hian Jail chhunga an thiamna hi an zir a la ni zui
8. Mi 285-in serh natna Dadu (Syphilis) an vei.

Jukes chhungkua avanga New York State-in sum a sen ral hi 1.5 million dollars a ni. Jonathan Edwards hi 1703-ah a piang a, a pa hi Pastor a ni a, a nu pawh Pastor fanu a ni. Amah pawh hi Pastor a ni a, Native American zinga missionary a ni bawk. Hun puma Isua tana rawngbawl a ni. A nupui Sarah Pierpont pawh hi Pathian tih mi a ni a, an inneih zanah hian an inneihna chu Pathian hnenah an hlan a ni. A nupui hi a nun a mawi hle a ni ang, Jonathan Edwards hian Kristian nun mawi leh thianghlim sawifiahna atan a hmang fo thin a ni. An thlahte 1400 an chhuinaah hetiang hian an hmuchhuak a ni:

1. Tumah dan bawhchhia an awm lo
2. 300 Clergymen (Pastor, Missionary & Theologian).
3. 100 Attorneys, 60 Judges, one Dean of a Law School.
4. 60 Doctors. One Dean of a Medical School.
5. 75 chu Army/Navy Officers an ni.
6. 60 Authors of fine classics.
7. 100 Professors,14 Presidents of Universities, 3 Mayors of large cities, 3 State Governors.
8. A Controller of US Treasury,
9. 3rd US Vice President (Aaron Burr, grandson of Jonathan Edwards) under President Thomas Jefferson.
10. US First Lady Edith Roosevelt, Theodore Roosevelt (26th US President)-a nupui kha Jonathan Edwards-a thlah a ni
    Heng hi ngaihtuah chhunzawm ila, keini hi Kristian chhungkua, Kristian nupa dik tak kan ni em?
    tih te pawh ngahtuah zawm ila, kan hlawkpui ngei ang.